പത്തനംതിട്ട: ഗുണ്ടാ സംഘങ്ങള് തമ്മിലുണ്ടായ അടിപിടിക്കിടെ യുവാവിനെ കാര് ഇടിപ്പിച്ച് കൊലപ്പെടുത്തി. പത്തനംതിട്ട റാന്നി മന്ദമരുതിയില് നടന്ന സംഭവത്തില് ഇന്നലെ രാത്രിയാണ് അരും കൊല നടന്നത്. ചെതോങ്കര സ്വദേശി അമ്പാടിയാണ് മരിച്ചത്.
ബീവേറേജസ് മദ്യവില്പ്പന ശാലയ്ക്ക് മുന്നില് രണ്ട് ഗുണ്ടാ സംഘങ്ങള് തമ്മിലുള്ള അടിപിടി തുടര്ന്നുള്ള വൈരാഗ്യമാണ് കൊലപാതകത്തില് കലാശിച്ചതെന്ന് പൊലീസ് പറഞ്ഞു. അജോയ്, ശ്രീക്കുട്ടന്, അരവിന്ദ് എന്നിവരാണ് സംഭവത്തിലെ പ്രതികളെന്ന് പോലീസ് പറഞ്ഞു.
പ്രതികള്ക്കായി പൊലീസ് അന്വേഷണം ആരംഭിച്ചിട്ടുണ്ട്. കീക്കൊഴൂരില് വാടകയ്ക്ക് താമസിക്കുന്ന ആളാണ് 24 കാരനായ അമ്പാടി. യുവാവിനെ കൊലപ്പെടുത്തിയശേഷം യുവാക്കള് കാര് ഉപേക്ഷിച്ച് ഒളിവില് പോവുകയായിരുന്നു.
റാന്നിയില് നടന്നത് ഗ്യാങ് വാറാണെന്ന് പൊലീസ് പറഞ്ഞു. റാന്നി ബിവറേജസിനു മുന്നില് ഇരു വിഭാഗങ്ങള് തമ്മില് തര്ക്കമുണ്ടായി. പിന്നീട് മടങ്ങിപ്പോയവര് ഇരു കാറുകളിലായി മന്ദമരുതിയില് എത്തി. ഒരു കാറില് നിന്ന് അമ്പാടി പുറത്തിറങ്ങിയപ്പോള് എതിര് ഗ്യാങ് കാര് കൊണ്ട് ഇടിച്ചു വീഴ്ത്തുകയായിരുന്നു. അമ്പാടിയുടെ ശരീരത്തിലൂടെ കാര് കയറ്റി ഇറക്കുകയും ചെയ്തതായി പോലീസ് പറയുന്നു.
