കന്യാകുമാരി: ദക്ഷിണേന്ത്യയിലെ ഏറ്റവും പ്രമുഖ ടൂറിസ്റ്റ് കേന്ദ്രമായ കന്യാകുമാരിയിലെ വിവേകാനന്ദ പാറയ്ക്കും തിരുവള്ളുവര് പ്രതിമയ്ക്കും മധ്യേ നിര്മിച്ച കണ്ണാടിപ്പാലം ഇന്ന് തുറക്കും. പൊതുമരാമത്ത് വകുപ്പ് നിര്മിച്ച കണ്ണാടിപ്പാലത്തിന് 77 മീറ്റര് നീളവും 10 മീറ്റര് വീതിയുമാണുള്ളത്. തുടര്ന്ന് കണ്ണാടിപ്പാലത്തില് ലേസര് ഷോയും നടക്കും.
തിരുവള്ളുവര് പ്രതിമ സ്ഥാപിച്ചതിന്റെ രജതജൂബിലി ആഘോഷത്തിന്റെ ഭാഗമായി തമിഴ്നാട് സര്ക്കാരിന്റെ പുതുവര്ഷ സമ്മാനമായാണ് പാലം തുറക്കുന്നത്. ത്രിവേണിസംഗമത്തില് 37 കോടി രൂപയാണ് പാലം നിര്മ്മാണത്തിനായി തമിഴ്നാട് സര്ക്കാര് ചെലവഴിച്ചത്. കടല്ക്ഷോഭത്തെയും കടല്ക്കാറ്റിനേയും പ്രതിരോധിക്കുവാന് ഏറ്റവും പുതിയ സാങ്കേതികവിദ്യ പ്രയോജനപ്പെടുത്തിയാണ് പാലം നിര്മിച്ചിരിക്കുന്നത്.
പാലത്തിന്റെ മധ്യത്തില് കട്ടിയുള്ള കണ്ണാടി സ്ഥാപിച്ച് തൂക്കുപാലത്തിന്റെ മാതൃകയിലാണ് പാലം നിര്മിച്ചിരിക്കുന്നത്. കണ്ണാടിപ്പാലം തുറക്കുന്നതോടെ വിവേകാനന്ദ പാറയില് നിന്ന് തിരുവള്ളുവര് പ്രതിമയിലേക്കു നടന്ന് എത്തിച്ചേരാന് സാധിക്കും. വൈകിട്ട് 5.30-ന് മുഖ്യമന്ത്രി എം കെ സ്റ്റാലിന് കണ്ണാടിപ്പാലം ഉദ്ഘാടനം ചെയ്യും. ബോട്ടുജെട്ടിക്ക് സമീപം ശില്പി സുദര്ശന് പട്നായിക് മണ്ണ് കൊണ്ടു നിര്മിച്ച തിരുവള്ളുവരുടെ പുതിയ പ്രതിമയുടെ അനാഛാദനവും ഇന്ന് നടക്കും.
നാളെ രാവിലെ 9ന് ഗസ്റ്റ് ഹൗസില് നടക്കുന്ന ചടങ്ങില് തിരുവള്ളുവര് പ്രതിമ സ്ഥാപിച്ചതിന്റെ രജതജൂബിലി ആഘോഷവും മുഖ്യമന്ത്രി ഉദ്ഘാടനം ചെയ്യും. തുടര്ന്ന് സാംസ്കാരിക സമ്മേളനം, കവിയരങ്ങ് എന്നിവയും നടക്കും.
