കൊച്ചി: നടി ഹണി റോസിന്റെ പരാതിയില് റിമാന്ഡിലായ ബോബി ചെമ്മണൂരിനെ കൊണ്ടുപോയ പോലീസ് വാഹനം എറണാകുളം ജില്ലാ ആശുപത്രി പരിസരത്ത് വെച്ച് ബോബി അനുകൂലികള് തടഞ്ഞത് നാടകീയ രംഗങ്ങള്ക്കും സംഘര്ഷത്തിനും ഇടയാക്കി. കോടതിയില് ദേഹാസ്യാസ്ഥ്യമുണ്ടായതോടെ ബോബിയെ വൈദ്യ പരിശോധനക്ക് വേണ്ടി എറണാകുളം ജനറല് ആശുപത്രിയിലെത്തിച്ചിരുന്നു.
പരിശോധനകള്ക്ക് ശേഷം കാക്കനാട്ടെ ജയിലിലേക്ക് കൊണ്ടു പോകാന് ശ്രമിക്കുന്നതിനിടെയാണ് ബോബി അനുകൂലികള് വാഹനം തടഞ്ഞ് പ്രതിഷേധിച്ചത്. ഇതേ തുടര്ന്ന് സ്ഥലത്ത് സംഘര്ഷാവസ്ഥയണ്ടായി. പ്രതിഷേധക്കാരെ മറികടന്ന് പോലീസ് ജീപ്പ് ആശുപത്രിയില്നിന്ന് ജയിലേക്ക് പുറപ്പെട്ടു. അതേസമയം, ബോബി ചെമ്മണൂരിനെ കൊണ്ടുപോയ പോലീസ് വാഹനം തടഞ്ഞ സംഭവത്തില് എറണാകുളം ടൗണ് സെന്ട്രല് പോലീസ് കേസ് രജിസ്റ്റര് ചെയ്യും. ഒൗദ്യോഗിക കൃത്യനിര്വഹണം തടസപ്പെടുത്താനുള്ള ശ്രമമെന്നു വിലയിരുത്തിയാണ് പോലീസ് നടപടി.
അതിനിടെ, പോലീസിന്റെ ഗുണ്ടായിസമാണ് ആശുപത്രിയിലും പുറത്തും നടന്നതെന്നും ശരിക്കും പരിശോധന നടത്തിയിട്ടില്ലെന്നും പ്രതിഭാഗം അഭിഭാഷകന് ആരോപിച്ചു. ബോബി ചെമ്മണൂരിന്റെ ആരോഗ്യനില തൃപ്തികരമാണെന്നും എക്സറേ, ഇ.സി.ജി, ഓക്സിജന് ലെവല്, ബ്ലഡ് പ്രഷര് എന്നിവ സാധാരണ നിലയിലായണെന്നും പരിശോധിച്ച ഡോക്ടര്മാര് അറിയിച്ചു.
കൊച്ചി: രണ്ടു ദിവസം മുമ്പ് വീണ തനിക്കു നട്ടെല്ലിന് പരുക്കുണ്ടെന്നു ബോബി ചെമ്മണൂര്. ജാമ്യഹര്ജി പരിഗണിക്കവെയാണു പ്രതിഭാഗം ഇക്കാര്യം കോടതിയെ അറിയിച്ചത്. ശരീരത്തില് ചില പരുക്കുകളുണ്ടെന്നും എന്നാല്, പോലീസിനെതിരേ പരാതിയില്ലെന്നും ബോബി കോടതിയെ അറിയിച്ചു. ജാമ്യഹര്ജിയെ എതിര്ത്ത പോലീസ് കുറ്റം ഗൗരവമേറിയതാണെന്നും വാദിച്ചു. എന്നാല്, ആരോപണം വ്യാജമാണെന്നായിരുന്നു ബോബി ചെമ്മണൂരിനു വേണ്ടി ഹാജരായ അഡ്വ. ബി. രാമന്പിള്ളയുടെ വാദം.
അതേസമയം, ജാമ്യമില്ലെന്ന ഉത്തരവ് കേട്ട ബോബി ചെമ്മണൂര് കോടതിയില് കുഴഞ്ഞുവീണു. ജഡ്ജി ഉത്തരവ് വായിച്ചു കഴിഞ്ഞതോടെ ബോബി ബെഞ്ചിലേക്ക് ഇരിക്കുകയും തുടര്ന്നു കുഴഞ്ഞുവീഴുകയുമായിരുന്നു. 12.30 നാണു ബോബിയെ കോടതിയില് ഹാജരാക്കിയത്. രണ്ടോടെ വാദം തീര്ന്നു. മൂന്നുമണിക്കൂറോളം ബോബി കോടതിക്കുള്ളില് തന്നെയായിരുന്നു. വാദം അവസാനിച്ചപ്പോള് ബോബിയെ കോടതിക്കു പുറത്തേയ്ക്കു കൊണ്ടുപോകേണ്ടെന്നു പോലീസിനോടു നിര്ദേശിച്ചിരുന്നു.
ജാമ്യ ഉത്തരവു വായിക്കുമ്പോള് പ്രതിക്കൂട്ടില് നില്ക്കുകയായിരുന്ന ബോബി, റിമാന്ഡ് ചെയ്യുകയാണെന്ന ഭാഗം വായിച്ചുതുടങ്ങിയപ്പോഴാണു ദേഹാസ്വാസ്ഥ്യം പ്രകടിപ്പിച്ചു തുടങ്ങിയത്. രക്തസമ്മര്ദം ഉയര്ന്നതിനേത്തുടര്ന്നാണു കുഴഞ്ഞുവീണതെന്നാണു വിവരം.
