കൊച്ചി: പ്രതിപക്ഷ നേതാവ് വി.ഡി. സതീശനെതിരേ പി.വി. അന്വര് എം.എല്.എ. ഉയര്ത്തിയ 150 കോടിയുടെ അഴിമതിയാരോപണം അനേ്വഷിക്കാന് അഡ്വക്കേറ്റ് ജനറലില്നിന്നു സര്ക്കാര് നിയമോപദേശം തേടി. പി.വി. അന്വര് നിയമസഭയില് നടത്തിയ പ്രസംഗത്തിനു സഭയുടെ പ്രിവിലേജ് ഉണ്ടോ, വിജിലന്സിനു കേസെടുക്കാന് നിയമ തടസമുണ്ടോ എന്നീ കാര്യങ്ങളിലാണു നിയമോപദേശം തേടിയത്.
സര്ക്കാരിനു ലഭിച്ച പരാതിയുടെ അടിസ്ഥാനത്തിലാണു അനേ്വഷിക്കുന്നത്. സംസ്ഥാന സര്ക്കാരിന്റെ കെ-റെയില് പദ്ധതി അട്ടിമറിക്കാന് പ്രതിപക്ഷ നേതാവ് 150 കോടി രൂപ വാങ്ങിയെന്നാണ് പി.വി. അന്വര് നിയമസഭയില് ആരോപിച്ചത്.
ആരോപണത്തില് സതീശനെതിരേ കേസെടുക്കണമെന്നാവശ്യപ്പെട്ടു നേരത്തെ കേരളാ കോണ്ഗ്രസ് (എം) നേതാവ് എ.എച്ച്. ഹഫീസ് വിജിലന്സ് കോടതിയെ സമീപിച്ചിരുന്നു. എന്നാല്, നിയമസഭാ പ്രസംഗത്തിനു സഭയുടെ പ്രിവിലേജുള്ളതിനാല് കേസെടുക്കാന് ബുദ്ധിമുട്ടാണെന്നു നിയമോപദേശം ലഭിച്ചതായി വിജിലന്സ് കോടതിയെ അറിയിച്ചതോടെ ഹര്ജി അന്നു കോടതി തള്ളി.
കേസെടുക്കാന് അനുമതി ആവശ്യമില്ലെന്നു പറയുന്ന നിയമസഭാ സെക്രട്ടറിയേറ്റിന്റെ കത്ത് ഹര്ജിക്കാരന് കോടതിക്കു അന്നു കൈമാറിയിരുന്നു. എന്നാല്, ആരോപണത്തിനു കൃത്യമായ തെളിവു വേണമെന്നും വെറുതെ ആരോപണം ഉന്നയിച്ചിട്ടു കാര്യമില്ലെന്നുമായിരുന്നു കോടതി വ്യക്തമാക്കിയത്.
സതീശനെതിരേ താന് ഉന്നയിച്ച ആരോപണം അന്വര് തന്നെ തള്ളിയതിനു പിന്നാലെയാണു വിജിലന്സ് അനേ്വഷണത്തിനു സര്ക്കാര് സാധ്യത തേടുന്നത്. മുഖ്യമന്ത്രിയുടെ പൊളിറ്റിക്കല് സെക്രട്ടറി പി. ശശി പറഞ്ഞിട്ടാണു അഴിമതി ആരോപിച്ചതെന്നു കഴിഞ്ഞാഴ്ച അന്വര് വെളിപ്പെടുത്തിയിരുന്നു. വി.ഡി. സതീശനോട് അന്വര് മാപ്പുചോദിക്കുകയും സതീശന് മാപ്പു സ്വീകരിക്കുകയും ചെയ്തിരുന്നു.
എല്.ഡി.എഫ്. വിടുകയും മുഖ്യമന്ത്രിക്കും സര്ക്കാരിനുമെതിരേ ആഞ്ഞടിക്കുകയും ചെയ്ത പി.വി. അന്വറിനായി വാതില് തുറക്കാന് യു.ഡി.എഫ്. ആലോചിക്കുന്നതിനിടെയാണു വി.ഡി. സതീശനെതിരേ അനേ്വഷണം വരുന്നത്.
