മലപ്പുറം: മഞ്ചേരിയില് നിക്കാഹ് കഴിഞ്ഞതിന് പിന്നാലെ വീട്ടില് തൂങ്ങി മരിച്ച നിലയില് കണ്ടെത്തിയ നവവധുവിന്റെ പോസ്റ്റുമോര്ട്ടം ഇന്ന് നടക്കും. മഞ്ചേരി മെഡിക്കല് കോളേജിലാണ് പോസ്റ്റുമോര്ട്ടം നടക്കുക. ആമയൂരില് മരിച്ചത് 18 വയസ്സുള്ള ഷേര്ഷ സിനിവറിന്റെ മകള് ഷൈമ സിനിവര് ആണ്. ഇന്നലെ വൈകിട്ട് 6 മണിയോടെയാണ് ഷൈമ സിനിവറിനെ തൂങ്ങിയ നിലയില് കണ്ടെത്തുകയായിരുന്നു.
ഷൈമ മരിച്ചതറിഞ്ഞ് 19കാരനായ ആണ്സുഹൃത്ത് കൈ ഞരമ്പ് മുറിച്ച് ആത്മഹത്യക്ക് ശ്രമിച്ചിട്ടുമുണ്ട്. ഇയാളെ മഞ്ചേരി മെഡിക്കല് കോളേജ് ആശുപത്രിയില് പ്രവേശിപ്പിച്ചിരിക്കുകയാണ്. കഴിഞ്ഞ വെള്ളിയാഴ്ചയായിരുന്നു ഷൈമയുടെ നിക്കാഹ് നടന്നത്.
വിവാഹത്തിന് ഷൈമക്ക് താത്പര്യമില്ലായിരുന്നു എന്നാണ് പൊലീസ് പറയുന്നത്. ആണ്സുഹൃത്തായ 19കാരനെ വിവാഹം കഴിക്കാനായിരുന്നു പെണ്കുട്ടിക്ക് ആഗ്രഹമെന്നാണ് പൊലീസ് പറയുന്നത്. താത്പര്യമില്ലാത്ത വിവാഹം നടന്നതിന്റെ മനോവിഷമത്തിലായിരുന്നു പെണ്കുട്ടിയെന്നും ഇതേത്തുടര്ന്ന് ജീവനൊടുക്കിയതെന്നാണ് പ്രാഥമിക നിഗമനമെന്നും പൊലീസ് പറയുന്നു.
ആത്മഹത്യയ്ക്ക് ശ്രമിച്ച ആണ്കുട്ടി അപകടനില തരണം ചെയ്തിട്ടുണ്ട്. ഇരുവരും തമ്മില് പ്രണയത്തിലായിരുന്നുവെന്നാണ് ലഭിക്കുന്ന പ്രാഥമിക വിവരം. ഷൈമയുടെ മൃതദേഹം മഞ്ചേരി ഗവ.മെഡിക്കല് കോളജ് ആശുപത്രി മോര്ച്ചറിയിലേക്ക് മാറ്റി. ജീവനൊടുക്കാന് ശ്രമിച്ച യുവാവും മഞ്ചേരി മെഡിക്കല് കോളേജില് ചികിത്സയിലാണ്. സംഭവത്തില് കൂടുതല് അന്വേഷണം നടന്നുവരികയാണ്.
(ആത്മഹത്യ ഒന്നിനും പരിഹാരമല്ല. മാനസീകസമ്മര്ദ്ദം അതിജീവിക്കാന് ശ്രമിക്കുക. മറികടക്കാന് കഴിയില്ലെങ്കില് വിദഗ്ദ്ധരെ സമീപിക്കുക)
