മെലഡി റൊമാന്റിക് ഗാനങ്ങളിലുടെ പ്രേക്ഷകരുടെ മനസ്സ് കീഴടക്കിയ ഗായകനാണ് സോനു നിഗം. ഹിന്ദി, തമിഴ്, തെലുങ്ക്, കന്നട, മലയാളം, മറാത്തി തുടങ്ങിയ ഭാഷകളിലായി നിരവധി ഗാനങ്ങൾ ആലപിച്ച താരത്തിന് മികച്ച ഗായകനുള്ള ദേശീയ പുരസ്കാരം ലഭിച്ചിട്ടുണ്ട്. മലയാളത്തിൽ ഉറുമി എന്ന ചിത്രത്തിന് വേണ്ടിയാണ് സോനു പാടിയത്. റൊമാന്റിക് ഗാനങ്ങള്ക്ക് സോനുവിന്റെ ശബ്ദം കൂടിയാകുമ്പോള് അതിന്റെ ഭംഗി ഇരട്ടിയാകാറുണ്ട്. സോഷ്യല് മീഡിയയിലും സജീവമായ താരം എല്ലാ വിശേഷങ്ങളും അതിലൂടെ പങ്കിടാറുമുണ്ട്.
ഇപ്പോഴിതാ പൂനെയില് നടക്കുന്ന ഷോയ്ക്ക് തൊട്ടു മുമ്പ് അസഹനീയമായ വേദന അനുഭവിച്ചതിന്റെ വീഡിയോ ഇന്സ്റ്റാഗ്രാമില് പങ്കുവെച്ചിരിക്കുകയാണ് സോനു നിഗം. മറ്റുള്ളവരുടെ സഹായത്തോടെ വേദിയില് നിന്ന് ഇറങ്ങുന്ന ദൃശ്യങ്ങളില് വേദന കൊണ്ട് പുളയുന്ന സോനുവിനെയും എഡിറ്റ് ചെയ്ത വീഡിയോയില്, സോനു കിടക്കയില് കിടന്ന് സംസാരിക്കുന്നതും കാണാം.
സോനു മറ്റുള്ളവരുടെ സഹായത്തോടെയാണ് പൂനെയിലെ വേദിയില് നിന്ന് ഇറങ്ങിയത്. എന്നാല് സംഗീത പരിപാടിക്ക് തൊട്ട് മുന്പ് നടന്ന പ്രശ്നം സോനുവിന്റെ ആവേശത്തെ തളര്ത്തിയില്ല. ഇന്സ്റ്റാഗ്രാമില് പങ്കിട്ട ക്ലിപ്പില് ഈ വേദന അനുഭവിക്കുമ്പോഴും സോനു പിന്നീട് വേദിയില് നൃത്തം ചെയ്യുന്നതും കാണാം. ‘‘ഇന്നലെ രാത്രി സരസ്വതി ജി എന്റെ കൈ പിടിച്ചു...’’ എന്ന ക്യാപ്ഷന് നല്കിയാണ് സോനു ഈ വീഡിയോ പങ്കിട്ടിരിക്കുന്നത്. ഏറ്റവും ദുഷ്കരമായ ദിവസങ്ങളില് ഒന്ന് എന്നാണ് സോനു ഇതിനെ വിശേഷിപ്പിച്ചത്.
‘‘എന്റെ ജീവിതത്തിലെ ഏറ്റവും ദുഷ്കരമായ ദിവസങ്ങളില് ഒന്നായിരുന്നു കടന്നു പോയത്. പക്ഷേ വളരെ സംതൃപ്തിയുണ്ട്. എങ്ങനെ നൃത്തം ചെയ്യുമെന്നൊക്കെ ചിന്തിച്ചിരുന്നെങ്കിലും ജനങ്ങളുടെ മുന്നിലെത്തിയപ്പോള് കിട്ടിയ ഊര്ജം വല്ലാത്ത അനുഭൂതി പകര്ന്നു, എല്ലാം നന്നായി പോയി. . നട്ടെല്ലില് സൂചി കുത്തുന്നത് പോലെ അനുഭവമാണ് ഉണ്ടായത്....’’ സോനു നിഗം വീഡിയോയില് പറഞ്ഞു.
പൂനെയില് ഗില്ലിന്- ബാരെ സിന്ഡ്രോം രോഗബാധ വ്യാപിച്ചു കൊണ്ടിരിക്കുന്നതിനിടയിലുള്ള സോനുവിന്റെ പോസ്റ്റ് ആരാധകര്ക്കിടയില് ആശങ്ക ഇരട്ടിപ്പിച്ചിട്ടുണ്ട്.
