പീരുമേട്: പെരുവന്താനം ടി.ആര്. ആന്ഡ് ടി എസ്റ്റേറ്റില് കാട്ടാന ആക്രമണത്തില് സ്ത്രീ കൊല്ലപ്പെട്ടു. പെരുവന്താനം പഞ്ചായത്ത് ഏഴാം വാര്ഡില് ചെന്നാപാറ കൊമ്പന്പാറ നെല്ലിവിള പുത്തന്വീട്ടില് ഇസ്മയിലിന്റെ ഭാര്യ സോഫിയ(45)യാണ് മരണമടഞ്ഞത്.
എസ്റ്റേറ്റ് അതിര്ത്തിയിലൂടെ ഒഴുകുന്ന തോട്ടില് കുളിക്കുന്നതിന് ഇന്നലെ വൈകിട്ട് ആറിനു പോയ സോഫിയയെ ഏഴായിട്ടും തിരികെ കണ്ടില്ല. തുടര്ന്നു നടത്തിയ അന്വേഷണത്തിലാണ് കൈകാലുകള് ഒടിഞ്ഞ നിലയില് ജഡം കണ്ടെത്തിയത്.
ഇരുട്ടു പരന്നതിനാല് ആനയെ സോഫിയ കണ്ടില്ലെന്ന നിഗമനത്തിലാണ് പ്രദേശവാസികളും വനം വകുപ്പും. പെരുവന്താനം പോലീസും മുറിഞ്ഞപുഴ വനം വകുപ്പ് അധികൃതരും സ്ഥലത്തെത്തി മൃതദേഹം വീണ്ടെടുക്കാന് ശ്രമം തുടങ്ങി.
അതേസമയം, പ്രതിഷേധവുമായി നാട്ടുകാര് രംഗത്തെത്തി. കലക്ടര് സംഭവ സ്ഥലത്തെത്താതെ മൃതദേഹം എടുക്കാന് സമ്മതിക്കില്ലെന്നു നാട്ടുകാര് പറഞ്ഞു. ടി.ആര്. ആന്ഡ് ടി എസ്റ്റേറ്റില് കഴിഞ്ഞ മൂന്നു വര്ഷമായി സ്ഥിരമായി ആനശല്യമുണ്ട്.
ഏതാനും ദിവസം മുമ്പു രാവിലെ റബര് ടാപ്പിങ് തൊഴിലാളി ആനയുടെ മുമ്പില്നിന്ന് അത്ഭുതകരമായാണ് രക്ഷപ്പെട്ടത്. 27 ആനകള് അടങ്ങുന്ന കാട്ടാനക്കൂട്ടം പ്രദേശത്തു മുമ്പു വ്യാപകമായ നാശം വിതച്ചിരുന്നു. കൃഷി വകുപ്പുമായി ചേര്ന്നു വനം വകുപ്പ് തൂക്കു സുരക്ഷാവേലി സ്ഥാപിക്കുമെന്നു വനം മന്ത്രി കഴിഞ്ഞ വര്ഷം പീരുമേട് സന്ദര്ശിച്ചവേളയില് അറിയിച്ചെങ്കിലും പ്രഖ്യാപനം ജലരേഖയായി മാറിയിരുന്നു.
