നമ്മളില് പലരും കാലകാലങ്ങളായി ചോദിക്കുന്ന ഒരു ചോദ്യമാണ് ഒരു ആരോഗ്യവാനായ മനുഷ്യന് പരമാവധി എത്ര വയസ് വരെ ജീവിക്കാം എന്നുള്ളത്. ഇതിനുള്ള ഉത്തരം കണ്ടെത്താനായി ഗവേഷകരും നിരവധി പഠനങ്ങള് നടത്തിയിരുന്നു. മാറാ രോഗങ്ങളോ ആരോഗ്യ പ്രശ്നങ്ങളോ ഒന്നും തന്നെയില്ലെങ്കിലും മനുഷ്യര്ക്ക് ഒരു പ്രായത്തിനപ്പുറം ജീവിക്കാന് സാധിക്കില്ല. അതായിത് കാന്സര്, ഹൃദ്രോഗം, പ്രമേഹം തുടങ്ങിയ പ്രധാന രോഗങ്ങളെ നിങ്ങള് ഒഴിവാക്കിയാലും, മനുഷ്യജീവിതത്തിന് സ്വാഭാവിക ജൈവശാസ്ത്രപരമായ പരിധിയുണ്ടാകാമെന്ന് ശാസ്ത്രം പറയുന്നു.
ജീവിതശൈലിയോ മൊത്തത്തിലുള്ള ആരോഗ്യമോ പരിഗണിക്കാതെ ശരീരത്തിന്റെ പ്രതിരോധശേഷി, സമ്മര്ദ്ദം, പരിക്ക് അല്ലെങ്കില് കോശ നാശത്തില് നിന്ന് കരകയറാനുള്ള കഴിവ് എന്നിവ പ്രായമാകുമ്പോള് ക്രമേണ കുറയുന്നുവെന്ന് സമീപകാല ഗവേഷണങ്ങള് സൂചിപ്പിക്കുന്നു. ഇത് മനുഷ്യര്ക്ക് പരമാവധി ആയുര്ദൈര്ഘ്യം 120 നും 150 നും ഇടയില് ആയിരിക്കാമെന്ന് സൂചിപ്പിക്കുന്നു. വൈദ്യശാസ്ത്ര പുരോഗതികള്, ആരോഗ്യകരമായ ജീവിതശൈലികള്, നൂതന ചികിത്സകള് എന്നിവയ്ക്ക് ആയുര്ദൈര്ഘ്യം വര്ദ്ധിപ്പിക്കാനും ഗുണനിലവാരം മെച്ചപ്പെടുത്താനും കഴിയുമെങ്കിലും നമ്മുടെ ജീവനെ വളരെ വലിയ കാലത്തേക്ക് പിടിച്ച് നിര്ത്താനാകില്ല. ചുരുക്കത്തില് പറഞ്ഞാല് അവയ്ക്ക് വാര്ദ്ധക്യ പ്രക്രിയകളെ പൂര്ണ്ണമായും മറികടക്കാന് കഴിയില്ലായെന്ന് അര്ത്ഥം.
നേച്ചര് കമ്മ്യൂണിക്കേഷനില് പ്രസിദ്ധീകരിച്ച പഠനം അനുസരിച്ച് രക്തകോശങ്ങളുടെ എണ്ണം, ദൈനംദിന ശാരീരിക പ്രവര്ത്തനങ്ങള് തുടങ്ങിയ പ്രധാന സൂചകങ്ങള് ഗവേഷകര് നിരീക്ഷിച്ചു. സിംഗപ്പൂര് ആസ്ഥാനമായുള്ള ബയോടെക് കമ്പനിയായ ഗീറോയിലെ തിമോത്തി പിര്ക്കോവ്, റോസ്വെല് പാര്ക്ക് സമഗ്ര കാന്സര് സെന്ററിലെയും മറ്റ് അന്താരാഷ്ട്ര സ്ഥാപനങ്ങളിലെയും ടീമുകളുമായി സഹകരിച്ച് നടത്തിയ പഠനം, മനുഷ്യന്റെ ദീര്ഘായുസ്സിന്റെ സ്വാഭാവിക പരിമിതികളെ എടുത്തുകാണിക്കുന്നു.
ഇതിനായി മൂന്ന് പ്രായ വിഭാഗങ്ങളിലുള്ള വ്യക്തികളെ ഗവേഷകര് നിരീക്ഷിച്ചു. ആദ്യകാല പ്രായപരിധി (16–35), മധ്യവയസ്സ് (35-65), പ്രായമായവര് (65 ഉം അതിനുമുകളിലും). ആരോഗ്യപ്രശ്നങ്ങളോ വിട്ടുമാറാത്ത അവസ്ഥകളോ തടസ്സപ്പെടുത്തിയില്ലെങ്കില് രക്തകോശങ്ങളുടെ അളവും ശാരീരിക പ്രവര്ത്തനവും ഇവരില് താരതമ്യേന സ്ഥിരതയുള്ളതായി അവര് നിരീക്ഷിച്ചു. എന്നിരുന്നാലും, കാലക്രമേണ, രോഗങ്ങള്, പരിക്കുകള് അല്ലെങ്കില് ശാരീരിക സമ്മര്ദ്ദം എന്നിവയില് നിന്ന് പൂര്ണ്ണമായും സുഖം പ്രാപിക്കാനുള്ള ശരീരത്തിന്റെ കഴിവ് പ്രായമായവരില് കുറഞ്ഞു വരുന്നതായി കണ്ടെത്തി.
മാത്രമല്ല പ്രായത്തിനനുസരിച്ച് പ്രതിരോധശേഷി കുറയുന്നു. ഇത് ശാരീരിക വെല്ലുവിളികളില് നിന്ന് കരകയറാനും ഒപ്റ്റിമല് പ്രവര്ത്തനം നിലനിര്ത്താനുമുള്ള ശരീരത്തിന്റെ ശേഷി ക്രമേണ പരിമിതപ്പെടുത്തുന്നു. അതിനാല് അവയവം മാറ്റിവയ്ക്കല് അല്ലെങ്കില് നൂതന ചികിത്സകള് പോലുള്ള മെഡിക്കല് ഇടപെടലുകള് ഇല്ലാതെ, മനുഷ്യര്ക്ക് സ്വാഭാവികമായി ഈ ആയുര്ദൈര്ഘ്യ പരിധി മറികടക്കാന് കഴിയില്ലെന്ന് പഠനം സൂചിപ്പിക്കുന്നു. 120 മുതല് 150 വര്ഷം വരെ നിലവിലെ ശരാശരി ആയുര്ദൈര്ഘ്യത്തേക്കാള് കൂടുതലാണ്. ചരിത്രത്തിലെ തന്നെ ഏറ്റവും പ്രായം കൂടിയ യുവതിയായ ജീന് ലൂയിസ് കാല്മെന്റ് ഉള്പ്പെടെയുള്ളവര് 122 വര്ഷവും 164 ദിവസവും ജീവിച്ചിരുന്നതായാണ് റിപ്പോര്ട്ട്. ഇത് റിപ്പോര്ട്ടിനെ സ്ഥിരീകരിക്കുന്നു.
