തിരുവനന്തപുരം: പിഎം ശ്രീ പദ്ധതിയില് ഒപ്പുവെച്ച സംസ്ഥാന സര്ക്കാര് നടപടിക്കെതിരേ പ്രതിഷേധവുമായി സിപിഐയുടെ വിദ്യാര്ത്ഥി സംഘടനയായ എഐഎസ്എഫും സിപിഐ അധ്യാപക സംഘടന എകെഎസ്ടിയുവും. സംസ്ഥാന സര്ക്കാരിന്റെ നടപടി തികഞ്ഞ വഞ്ചനയും വിദ്യാര്ത്ഥി വിരുദ്ധവും പൊതു സമൂഹത്തോടുള്ള വെല്ലുവിളിയുമാണെന്ന് എഐഎസ്എഫ് പ്രസ്താവനയിലൂടെ അറിയിച്ചു.
ഇടത് മുന്നണിയുടെ പ്രഖ്യാപിത നയത്തെ അട്ടിമറിക്കുന്നതാണ് വിദ്യാഭ്യാസമന്ത്രിയുടെ നിലപാടെന്നും പറഞ്ഞു. സര്ക്കാരിന്റെ വിദ്യാര്ത്ഥി വഞ്ചനക്കെതിരെ കടുത്ത പ്രതിഷേധങ്ങള് സംഘടിപ്പിക്കാനൊരുങ്ങുകയാണ് എഐഎസ്എഫ്. വിദ്യാഭ്യാസ വകുപ്പിന്റെ നടപടി ആശങ്കപ്പെടുത്തുന്നതാണ്. സംഘ പരിവാര് അജണ്ട നടപ്പാക്കാനുള്ള ശ്രമത്തിനെതിരെ അതിശക്തമായ സമരങ്ങള്ക്ക് ഇടതുപക്ഷം നേതൃത്വം നല്കുമ്പോള് അതിനെ ദുര്ബലപ്പെടുത്തുന്ന നിലപാടാണ് വിദ്യാഭ്യാസ വകുപ്പ് സ്വീകരിച്ചിട്ടുള്ളതെന്നും എകെഎസ്ടിയു പറഞ്ഞു.
കെഎസ് യു വും യൂത്ത് കോണ്ഗ്രസും പ്രതിഷേധവുമായി എത്തും. ഇന്ന് നടത്തുന്ന കൂടിയാലോചനയില് ഇത് സംബന്ധിച്ച അന്തിമ തീരുമാനം എടുക്കും. പിഎം ശ്രീ പദ്ധതി ഉപേക്ഷിക്കണമെന്ന ആവശ്യമുന്നയിച്ച് സമരത്തിനിറങ്ങാനാണ് കോണ്ഗ്രസ് സംഘടനകളുടെ നീക്കം. അതേസമയം പി എം ശ്രീ പദ്ധതിയില് ഒപ്പുവെച്ച സര്ക്കാര് തീരുമാനത്തിന് പിന്നാലെ വിദ്യാഭ്യാസ മന്ത്രിയെ എബിവിപി അഭിനന്ദിച്ചു.
എബിവിപി നേതാക്കള് മന്ത്രിയുടെ ഔദ്യോഗിക വസതിയിലെത്തിയാണ് അനുമോദിച്ചത്. സിപിഐയുടെ കടുത്ത എതിര്പ്പ് അവഗണിച്ചാണ് വിദ്യാഭ്യാസ സെക്രട്ടറി പദ്ധതിയില് ഒപ്പുവെച്ചത്. ഇതോടെ പിഎം ശ്രീയുടെ ഭാഗമാകുന്ന 34ാമത്തെ ഭരണസംവിധാനമായി കേരളം മാറി. പിന്നാലെ തടഞ്ഞു വെച്ച ഫണ്ട് ഉടന് നല്കുമെന്ന് കേന്ദ്രം അറിയിച്ചു. 1500 കോടി രൂപ ആദ്യ ഗഡുവായി ഉടന് സംസ്ഥാനത്തിന് കൈമാറും.
കൂടിയാലോചനയില്ലാതെ പിഎം ശ്രീ പദ്ധതിയില് ഒപ്പുവെച്ച വിദ്യാഭ്യാസ വകുപ്പിന്റെ നടപടിയില് സിപിഐക്ക് കടുത്ത അതൃപ്തിയുണ്ട്. പിഎം ശ്രീയില് ഒപ്പിടുന്നത് സംബന്ധിച്ച് മന്ത്രിസഭയില് ചര്ച്ച വന്നാല് ശക്തമായി എതിര്ക്കാന് ബിനോയ് വിശ്വം സിപിഐ മന്ത്രിമാരോട് നിര്ദേശിച്ചിരുന്നു. എന്നാല് മന്ത്രിസഭയില് വിഷയം ഉന്നയിച്ചിട്ടും മുഖ്യമന്ത്രി ഗൗനിക്കാത്തതില് സിപിഐക്ക് കടുത്ത അമര്ഷമുണ്ട്.
ണ്ടായിരുന്നു. പാര്ട്ടി തീരുമാന പ്രകാരം റവന്യു മന്ത്രി കെ രാജന് മന്ത്രിസഭയില് വിഷയം എടുത്തിട്ടിട്ടും മുഖ്യമന്തി പിണറായി വിജയനോ വിദ്യാഭ്യാസ മന്ത്രി വി ശിവന്കുട്ടിയോ പ്രതികരിച്ചിരുന്നില്ല. അതിനിടെയാണ് എതിര്പ്പുകളെല്ലാം മറികടന്ന് പിഎം ശ്രീ ധാരണാ പത്രത്തില് സംസ്ഥാനം ഒപ്പുവെച്ചത്. സംഭവത്തില് പ്രതികരിക്കാന് ബിനോയ് വിശ്വം ഇന്ന് മാധ്യമങ്ങളെ കണ്ടേക്കും.
