രാഷ്ട്രീയനേതാവും അഭിനേതാവുമായ കൃഷ്ണകുമാറിന്റെ കുടുംബം മുഴുവൻ സോഷ്യൽ മീഡിയയിൽ തിളങ്ങി നിൽക്കുന്ന കുടുംബമാണ്. ഭാര്യ സിന്ധുവും മക്കളായ അഹാനയും ദിയയും ഇഷാനിയും ഹന്സികയുമൊക്കെ തങ്ങളുടെ എല്ലാ വിശേഷങ്ങളും അതിലൂടെ പങ്കിടാറുണ്ട്. മൂത്ത മകള് അഹാനയും മൂന്നാമത്തെ ഇഷാനിയും അച്ഛനെപ്പോലെ സിനിമ കരിയറാക്കിയപ്പോള് രണ്ടാമത്തെ മകള് ദിയ കൃഷ്ണ ബിസിനസ്സിലാണ് തിളങ്ങി നില്ക്കുന്നത്.
സംരംഭക എന്നതിലുപരി യൂട്യൂബ് വ്ലോഗറും ഇന്ഫ്ലുവന്സറും കൂടിയാണ് ദിയ. ജീവിതത്തിലെ സന്തോഷങ്ങളും സങ്കടങ്ങളുമടക്കം എല്ലാ വിശേഷങ്ങളും സോഷ്യൽ മീഡിയയിൽ പങ്കുവയ്ക്കാറുള്ള ദിയ, ഇഇക്കഴിഞ്ഞ ദിവസം തന്റെ കുടുംബം മുഴുവന് പ്രധാനമന്ത്രി നരേന്ദ്ര മോദിയെ കണ്ട സന്തോഷം പങ്കുവച്ചിരുന്നു. ഒപ്പം മകൻ ഓമിയെ (നിയോം അശ്വിൻ കൃഷ്ണ) മോദി ലാളിക്കുന്ന ചിത്രങ്ങളും ദിയ പങ്കുവച്ചു.
ഇപ്പോഴിതാ ദിയയുടെ മകൻ ഓമിയെ ലാളിക്കുന്ന ഫോട്ടോ തന്റെ സോഷ്യൽ മീഡിയയിൽ പങ്കുവച്ചിരിക്കുകയാണ് പ്രധാനമന്ത്രി നരേന്ദ്ര മോദി. യുവ സുഹൃത്തിനൊപ്പം എന്നാണ് ക്യൂട്ട് വാവയ്ക്കൊപ്പം ചിത്രം പങ്കിട്ട് മോദി കുറിച്ചിരിക്കുന്നത്.
‘‘ഇന്നലെ 7, ലോക് കല്യാൺ മാർഗിൽ വന്ന ഒരു യുവ സുഹൃത്തിനൊപ്പം...’’ എന്ന ക്യാപ്ഷന് നല്കിയാണ് മോദി ചിത്രം പങ്കിട്ടിരിക്കുന്നത്. പ്രധാനമന്ത്രി പങ്കിട്ട ചിത്രം വളരെപ്പെട്ടെന്ന് ഇന്ത്യ മുഴുവന് ശ്രദ്ധിക്കപ്പെട്ടു. അതോടെ ചിത്രത്തിനു താഴെയായി കമന്റുകളും നിറഞ്ഞു. കൂടുതൽ പേരും കുഞ്ഞ് ആരാണ് എന്ന് ചോദിച്ചാണ് കമന്റ് ചെയ്തിരിക്കുന്നത്. അതിനു താഴെ ചില മലയാളികൾ ദിയ കൃഷ്ണയുടെ മകനാണെന്ന് മറുപടിയും നൽകിയിട്ടുണ്ട്. ഏതായാലും നിമിഷ നേരം കൊണ്ട് ‘ഓമി’ വൈറൽ താരമായി മാറിയിട്ടുണ്ട്.
കഴിഞ്ഞ ദിവസമാണ് കൃഷ്ണകുമാറും കുടുംബവും പ്രധാനമന്ത്രിയെ സന്ദർശിച്ചത്. ഈ കൂടിക്കാഴ്ചയെപ്പറ്റി ദിയ കൃഷ്ണയും സോഷ്യൽ മീഡിയയിൽ കുറിച്ചിട്ടുണ്ട്. ‘‘ബിഗ് ഫാൻ മൊമന്റ്... നമ്മുടെ പ്രിയപ്പെട്ട പ്രധാനമന്ത്രി ശ്രീ നരേന്ദ്ര മോദിജിയോടൊപ്പം ഒരു മണിക്കൂറോളം സമയം ചെലവഴിച്ചു. ഞാനും എന്റെ കുടുംബവും ഒരിക്കലും മറക്കാത്ത ഒരു ദിവസമാണത്. ഇത് സാധ്യമാക്കിയതിന് അച്ചന് നന്ദി. എന്നും എന്നേക്കും അങ്ങയുടെ വലിയ ആരാധികയാണ്...’’ എന്നാണ് മോദിക്കൊപ്പമുള്ള ചിത്രങ്ങൾ പങ്കിട്ട് ദിയ കൃഷ്ണ കുറിച്ചത്.
‘‘ബഹുമാനപ്പെട്ട പ്രധാനമന്ത്രി ശ്രീ നരേന്ദ്ര മോദി ജി യെ കാണാൻ കഴിഞ്ഞത് മറക്കാനാവാത്തതും ശരിക്കും വിനീതവുമായ ഒരു അനുഭവമാണ്. രാജ്യത്തോടുള്ള ദർശനം, സമർപ്പണം, അചഞ്ചലമായ പ്രതിബദ്ധത എന്നിവയ്ക്ക് അർഹമായ ഒരു നേതാവിന്റെ ദർശനം, സമർപ്പണം, ദശലക്ഷക്കണക്കിന് ആളുകളെ പ്രചോദിപ്പിക്കുന്നത് തുടരുന്നു. അത്തരം മഹത്വത്തിന് നേരിട്ട് സാക്ഷ്യം വഹിക്കാൻ കഴിയുന്നത് ഞാൻ എപ്പോഴും വളരെയധികം അഭിമാനത്തോടും നന്ദിയോടും കൂടി വിലമതിക്കുന്ന ഒരു നിമിഷമാണ്.
ഇത് സാധ്യമാക്കിയതിന് എന്റെ ഭാര്യപിതാവിന് എന്റെ ഹൃദയംഗമമായ നന്ദി അറിയിക്കുന്നു. ഈ അനുഭവത്തിലൂടെ, അദ്ദേഹത്തിന്റെ സ്വന്തം ദർശനം, ദീർഘവീക്ഷണം, പൊതുസേവനത്തോടുള്ള അഭിനിവേശം എന്നിവ അടുത്തുനിന്ന് കാണാനുള്ള ഭാഗ്യവും എനിക്ക് ലഭിച്ചു. ഇത് ശരിക്കും പ്രചോദനാത്മകമാണ്, ഞാൻ വളരെയധികം ബഹുമാനിക്കുന്ന ഒന്നാണ്.
ഈ നിമിഷത്തിനും, ഈ അനുഭവത്തിനും, അത് നൽകുന്ന പ്രചോദനത്തിനും നന്ദിയുള്ളവനാണ്...ജയ് ഹിന്ദ്....’’ എന്നാണ് ദിയയുടെ ഭര്ത്താവ് അശ്വിന് ഗണേശ് ഈ സന്ദര്ശനത്തെക്കുറിച്ച് സോഷ്യല് മീഡിയയില് കുറിച്ചത്.
