പാലക്കാട്ടെ യുഡിഎഫ് സ്ഥാനാര്ഥിയും നടനുമായ രമേഷ് പിഷാരടിയെ കോമാളിയെന്ന് പരിഹസിച്ച സിപിഎം നേതാവ് തോമസ് ഐസക്കിനെതിരെ നടന് ജോയ് മാത്യു. ഫെയ്സ്ബുക്കില് പങ്കുവെച്ച കുറിപ്പില് രൂക്ഷപരാമര്ശമാണ് ജോയ് മാത്യു ഐസക്കിനെതിരെ നടത്തിയത്. കുടുംബത്തെ അമേരിക്കയിലേക്കയച്ച് നാട്ടില് സാമ്രാജയത്വത്തിനെതിരേ പ്രസംഗിക്കുന്നവനാണോ കോമാളി എന്നായിരുന്നു ജോയ് മാത്യുവിന്റെ ചോദ്യം.
‘വയറ്റുപ്പിഴപ്പിനു വേണ്ടി അഭിനയിക്കുന്നവനാണോ കോമാളി ?അതോ ഭാര്യയെയും മകളെയും അമേരിക്കയില് താമസിപ്പിച്ച് നാട്ടില് അമേരിക്കന് സാമ്രാജ്വത്തതിനെതിരെ പ്രസംഗിക്കുന്നവനാണോ കോമാളി ? ’എന്നായിരുന്നു ജോയ് മാത്യുവിന്റെ ചോദ്യം.
കോമാളി വേഷം കെട്ടിനടക്കുന്നവരെ നടന്മാരെ ഒരുദിവസംകൊണ്ടുപോയിവെച്ചിട്ട് അയ്യോ ഞങ്ങള്ക്ക് വോട്ടുകിട്ടുന്നില്ല, ഞങ്ങടെ വോട്ട് എല്ഡിഎഫ് ഭിന്നിപ്പിക്കാന് പോകുന്നു എന്ന് പറഞ്ഞിട്ട് വല്ല കാര്യമുണ്ടോ എന്നായിരുന്നു തോമസ് ഐസക്കിന്റെ പരാമര്ശം.
ഇതിന് മറുപടിയുമായി രമേഷ് പിഷാരടി എത്തിയതിന് പിന്നാലെ തോമസ് ഐസക് ഖേദം പ്രകടിപ്പിച്ചിരുന്നു. സംസ്കാരം സമരം ചെയ്താല് കിട്ടില്ലെന്നും തോമസ് ഐസക്കിന് മറുപടി നല്കാനില്ലെന്നുമായിരുന്നു പിഷാരടിയുടെ മറുപടി. അവനവനൊപ്പമല്ലാത്തവരെല്ലാം വെറുക്കപ്പെടേണ്ടവരാണ് എന്ന പ്രത്യയശാസ്ത്രം പ്രചരിപ്പിക്കുന്നത് എന്തിനാണെന്നും പിഷാരടി ചോദിച്ചിരുന്നു.
പിന്നാലെയാണ് തോമസ് ഐസക് ഖേദം പ്രകടിപ്പിച്ചത്. തന്റെ പരാമര്ശം രമേഷ് പിഷാരടിക്ക് മനോവിഷമം ഉണ്ടക്കിയെങ്കില് ഖേദം അറിയിക്കുന്നുവെന്നും പിഷാരടിയുടെ അഭിനയ മികവിനെക്കുറിച്ച് മോശമായി ഒന്നും പറയാനല്ല താന് ഉദ്ദേശിച്ചതെന്നുമായിരുന്നു തോമസ് ഐസക്കിന്റെ വാക്കുകള്.
