ഹൃദയസ്പര്ശിയായ ഒട്ടനവധി വീഡിയോകള് സോഷ്യല് മീഡിയയിലൂടെ വൈറലാകാറുണ്ട്. അതിപ്പോള് മനുഷ്യരുടെയായലും മൃഗങ്ങളെ സംബന്ധിക്കുന്നതായാലും കാഴ്ചക്കാര് ഏറെയാണ്. ഏതായാലും ഇത്തരത്തിലുള്ള ഒരു വീഡിയോയാണ് ഇപ്പോള് നെറ്റീസണ്സിന്റെ മനസ്സ് കീഴടക്കിയിരിക്കുന്നത്. നടുറോഡില് ഒരു അമ്മ മാന് തന്റെ കുഞ്ഞിന് പാല് കൊടുക്കുന്നതും ഇതുകണ്ട് ഇരുവരെയും ശല്യം ചെയ്യാതെ ക്ഷമയോടെ കാറുകളും ബൈക്കുകളും കാത്തുനില്ക്കുന്നതുമായ ദൃശ്യങ്ങളാണിത്. തിരക്കേറിയ റോഡായിട്ടുപോലും ആരും ഹോണടിച്ചോ കൂക്കി വിളിച്ചോ ശബ്ദമുണ്ടാക്കുന്നില്ല. എല്ലാവരും ക്ഷമയോടെ ആ അമ്മയ്ക്കും കുഞ്ഞിനുമായി കാത്ത് നിന്നു.
എന്നാല് ഇത്തരം കാഴ്ചകള് പലപ്പോഴും വിദേശ രാജ്യത്താണ് കാണാറുള്ളത്. എന്നാല് വൈറലായ ഈ ദൃശ്യങ്ങള് ഇങ്ങ് ചെന്നൈയിലുള്ള മദ്രാസ് ഐഐടിയിലെ ഒരു പതിവ് കാഴ്ചയാണ്. മദ്രാസ് ഐഐടിയിലെ മനുഷ്യരും വന്യജീവികളും തമ്മിലുള്ള സമാധാനപരമായ സഹവര്ത്തിത്വം നേരത്തെയും സമൂഹ മാധ്യമങ്ങളില് വൈറലായിരുന്നു. മദ്രാസിലെ ഇന്ത്യന് ഇന്സ്റ്റിറ്റിയൂട്ട് ഓഫ് ടെക്നോളജിയില് നിന്നുള്ള വീഡിയോയില്, ഒരു അമ്മ മാന് റോഡിന്റെ നടുവില് ശാന്തമായി തന്റെ മാന്കുട്ടിയ്ക്ക് പാല് കൊടുക്കുന്നത്. കാണാം. ഇത് ഗതാഗതം പൂര്ണ്ണമായും സ്തംഭിപ്പിച്ചു. കാറും ടെമ്പോ വാനും ബൈക്കും മാത്രമല്ല. സൈക്കിള് ഒടിച്ച് അതുവഴി പോവുകയായിരുന്ന ഒരു സ്ത്രീ പോലും സൈക്കിള് ചവിട്ടുന്നത് നിര്ത്തി കാത്ത് നിന്നു. ഒടുവില് കാറില് നിന്നും ഒരു യുവതി ഇറങ്ങി അമ്മമാനിനും കുഞ്ഞുമടുത്തേക്ക് നടക്കാന് തുടങ്ങിയതോടെ ഇരുവരും റോഡില് നിന്നും മാറി. ഇതോടെ വാഹനങ്ങള് മുന്നോട്ട് എടുക്കുന്നതും വീഡിയോയില് കാണാം.'
ഐഐടി മദ്രാസ് കാമ്പസിന്റെ സമ്പന്നമായ ജൈവവൈവിധ്യം ഏറെ പേരുകേട്ടതാണ്. ചെന്നൈയിലെ ഒരു വനപ്രദേശത്തിന് സമീപത്തുള്ള സ്ഥാപനത്തോട് ചേര്ന്ന് പുള്ളിമാന്, കൃഷ്ണമൃഗം, മുതല നിരവധി പക്ഷികള് തുടങ്ങിയവയുടെ ആവാസ കേന്ദ്രമാണ്. അവ മനുഷ്യ സാന്നിധ്യത്തിലും ഏറെ സമാധാനത്തോടെ ജീവിക്കുന്നു. മനുഷ്യരും വന്യജീവികളും തമ്മിലുള്ള ഈ സമാധാനപരമായ സഹവര്ത്തിത്വത്തെ എടുത്തുകാണിച്ച് കൊണ്ട് നിരവധി പേരെഴുതി. റോഡില് ആളുകള് പ്രകടിപ്പിച്ച ക്ഷമയെയും പൗരബോധത്തെയും പലരും പ്രശംസിച്ചു.
