വൃക്കരോഗത്തെ പലപ്പോഴും 'നിശബ്ദനായ കൊലയാളി' (Silent Killer) എന്ന് വിളിക്കുന്നു. കാരണം, രോഗം ഏകദേശം 60-70 ശതമാനം വരെ ഗുരുതരമാകുന്നത് വരെ പലപ്പോഴും പ്രകടമായ ലക്ഷണങ്ങള് കാണാറില്ല. വൃക്കകളുടെ പ്രവര്ത്തനം പൂര്ണ്ണമായി നിലയ്ക്കുന്ന അവസ്ഥയെ 'കിഡ്നി ഫെയിലിയര്' (Kidney Failure) എന്ന് പറയുന്നു. വൃക്കരോഗം പലപ്പോഴും നിശബ്ദമായാണ് ശരീരത്തെ ബാധിക്കുന്നത്, അതിനാല് തുടക്കത്തിലേയുള്ള ചെറിയ മാറ്റങ്ങള് പോലും ശ്രദ്ധിക്കുന്നത് വളരെ പ്രധാനമാണ്. കണ്ണുകളിലെ തടിപ്പും ഓക്കാനവും വൃക്കരോഗത്തിന്റെ ലക്ഷണമാകാം. വൃക്കകളുടെ പ്രവര്ത്തനം തകരാറിലാകുന്നതിന്റെ അഞ്ച് സൂചനകളെക്കുറിച്ച് അനസ്തേഷ്യോളജിസ്റ്റും ഇന്റര്വെന്ഷണല് പെയിന് മെഡിസിന് ഫിസിഷ്യനുമായ ഡോ. കുനാല് സൂദ് തന്റെ ഇന്സ്റ്റാഗ്രാം പേജിലൂടെ വിശദീകരിക്കുന്നു.
1. മൂത്രത്തില് വിട്ടുമാറാത്ത നുര - വൃക്കകളിലെ രക്തം ശുദ്ധീകരിക്കുന്ന ചെറിയ രക്തക്കുഴലുകള്ക്ക് (glomeruli) കേടുപാടുകള് സംഭവിക്കുന്നത് മൂലം പ്രോട്ടീന് പുറന്തള്ളപ്പെടുമ്പോഴാണ് മൂത്രത്തില് നുരയുണ്ടാകുന്നത്. പ്രോട്ടീന് ഒരു സര്ഫാക്റ്റന്റ് (surfactant) ആയി പ്രവര്ത്തിക്കുന്നതിനാല് കുമിളകള് പെട്ടെന്ന് പൊട്ടിപ്പോകാതെ നുരയായി നിലനില്ക്കുന്നു. എന്നാല് ഇത് മാത്രം കണ്ട് രോഗം ഉറപ്പിക്കാനാവില്ല, കൃത്യമായ മൂത്രപരിശോധന ഇതിനായി ആവശ്യമാണ്.
2. കടും നിറത്തിലോ ചായയുടെ നിറത്തിലോ ഉള്ള മൂത്രം - മൂത്രത്തില് രക്തത്തിന്റെ അംശമോ അല്ലെങ്കില് പേശികളുടെ നാശം മൂലമുണ്ടാകുന്ന പദാര്ത്ഥങ്ങളോ (Myoglobin) കലരുമ്പോഴാണ് മൂത്രം കടും നിറത്തില് കാണപ്പെടുന്നത്. ഇത് വൃക്കകള്ക്ക് അമിതമായ സമ്മര്ദ്ദമോ പരിക്കോ ഉണ്ടെന്നതിന്റെ സൂചനയാകാം.
3. കണങ്കാലിലെ നീരും കണ്ണുകളിലെ തടിപ്പും (Oedema) - ശരീരത്തിലെ ഉപ്പിന്റെ അംശവും ദ്രാവകങ്ങളുടെ അളവും നിയന്ത്രിക്കാനുള്ള വൃക്കകളുടെ കഴിവ് കുറയുമ്പോഴാണ് നീര് ഉണ്ടാകുന്നത്. പ്രോട്ടീന് നഷ്ടപ്പെടുന്നത് മൂലം കലകളിലേക്ക് ദ്രാവകം കബളിക്കുകയും, ഇത് കണങ്കാലുകളില് നീരായും കണ്ണുകള്ക്ക് താഴെ തടിപ്പായും പ്രത്യക്ഷപ്പെടുകയും ചെയ്യുന്നു.
4. വിട്ടുമാറാത്ത ക്ഷീണം - വിട്ടുമാറാത്ത വൃക്കരോഗമുള്ളവരില് (CKD) ഏകദേശം 70 ശതമാനം പേര്ക്കും കടുത്ത ക്ഷീണം അനുഭവപ്പെടാറുണ്ട്. ശരീരത്തില് വിഷാംശങ്ങള് അടിഞ്ഞുകൂടുന്നതും (Uraemia), വിളര്ച്ചയും (Anaemia) ഉപാപചയ പ്രവര്ത്തനങ്ങളിലെ അസന്തുലിതാവസ്ഥയും ഊര്ജ്ജസ്വലത കുറയ്ക്കുന്നു.
5. വിശപ്പില്ലായ്മയും ഓക്കാനവും - വൃക്കകളുടെ പ്രവര്ത്തനം കുറയുമ്പോള് ശരീരത്തിലെ മാലിന്യങ്ങള് പുറന്തള്ളപ്പെടാതെ രക്തത്തില് കലരുന്നു. ഇത് ദഹനവ്യവസ്ഥയെ ബാധിക്കുകയും ഓക്കാനം, രുചി വ്യത്യാസം, വിശപ്പില്ലായ്മ, അമിതമായി ഭാരം കുറയുക എന്നിവയ്ക്ക് കാരണമാവുകയും ചെയ്യുന്നു.
