എഐ പ്ലാറ്റ്ഫോമായ ജെമിനിയില്, ഗൂഗിള് പുതിയൊരു സവിശേഷത ചേര്ക്കാന് തയ്യാറെടുക്കുന്നതായി റിപ്പോര്ട്ടുകള്. ഉപയോക്താക്കള്ക്ക് സ്വന്തം 3D അവതാര് സൃഷ്ടിക്കാന് സാധിക്കുന്ന ഈ ഫീച്ചര് 'അവതാര്' എന്ന പേരിലാണ് അറിയപ്പെടുന്നത്. ഈ ഫീച്ചര് ഡിജിറ്റല് ഉള്ളടക്കം സൃഷ്ടിക്കുന്ന പ്രക്രിയയെ കൂടുതല് ലളിതവും വേഗത്തിലുമാക്കും എന്നാണ് വിലയിരുത്തല്. ഈ ഫീച്ചര് ഇപ്പോള് വികസന ഘട്ടത്തിലാണെന്നും ബീറ്റ ടെസ്റ്റിംഗ് ഉള്പ്പെടെ സാധാരണ ഉപയോക്താക്കള്ക്ക് ലഭ്യമല്ലെന്നും ആന്ഡ്രോയ്ഡ് അതോറിറ്റി പ്രസിദ്ധീകരിച്ച റിപ്പോര്ട്ടുകള് വ്യക്തമാക്കുന്നു.
ഉള്ളടക്കം സൃഷ്ടിക്കുന്ന പ്രക്രിയ വേഗത്തിലാക്കുക എന്നതാണ് പ്രധാനമായും ഇതിന്റെ ലക്ഷ്യം. ഉദാഹരണത്തിന്, '@me' എന്ന കമാന്ഡ് ഉപയോഗിച്ച് ഉപയോക്താവിന് തന്റെ അവതാര് നേരിട്ട് ചിത്രങ്ങളില് ഉള്പ്പെടുത്താന് കഴിയും. ഇതോടെ, ഓരോ തവണയും സെല്ഫി അപ്ലോഡ് ചെയ്യേണ്ട ആവശ്യം ഒഴിവാകും. ആന്ഡ്രോയ്ഡ് പ്ലാറ്റ്ഫോമിലെ ഗൂഗിള് ആപ്പിന്റെ 17.11.54.sa.arm64 പതിപ്പിന്റെ എപികെ പ്രക്രിയയില് നിന്നാണ് ഈ ഫീച്ചറിന്റെ സാന്നിധ്യം കണ്ടെത്തിയത്. നിലവില് ഇത് ആപ്പിന്റെ കോഡിനുള്ളില് മാത്രം ഉള്പ്പെടുത്തിയിട്ടുള്ളതും ഉപയോക്താക്കള്ക്ക് ലഭ്യം അല്ലാത്തതുമാണ്.
ഈ സവിശേഷതയുമായി ബന്ധപ്പെട്ട നിരവധി സ്ക്രീന്ഷോട്ടുകളും ആന്ഡ്രോയ്ഡ് അതോറിറ്റി പുറത്തു വിട്ടിട്ടുണ്ട്. അവയില് ഫീച്ചറിന്റെ പരിചയപ്പെടുത്തല്, വിശദീകരണം, കൂടാതെ അവതാര് സൃഷ്ടിക്കുന്നതിന് ഉപയോക്താവിനെ സഹായിക്കുന്ന ഘട്ടങ്ങള് എന്നിവ കാണാം. എങ്കിലും സെര്വര് സൈഡ് ആക്ടിവേഷന് ലഭ്യമാകാതെ ഈ സംവിധാനം പ്രവര്ത്തനക്ഷമം ആകില്ലെന്നാണ് റിപ്പോര്ട്ട്.
ഗൂഗിള് മുമ്പ് ആന്ഡ്രോയ്ഡ് എക്സ്ആര് പ്ലാറ്റ്ഫോമില് അവതരിപ്പിച്ച ലൈക്-നെസ് സാങ്കേതികവിദ്യയുമായി ഈ അവതാര് ഫീച്ചറിന് സാമ്യമുണ്ട് എന്ന് വിദഗ്ധര് പറയുന്നു. വീഡിയോ കോളുകളിലും ഓണ്ലൈന് മീറ്റിംഗുകളിലും ഉപയോക്താവിന്റെ ഡിജിറ്റല് രൂപം സൃഷ്ടിക്കാനാണ് ആ സാങ്കേതികവിദ്യ ഉപയോഗിച്ചിരുന്നത്. എന്നാല്, പുതിയ അവതാര് ഫീച്ചറിന്റെ ലക്ഷ്യം അതിനേക്കാള് വിപുലമാണ് എന്നാണ് സൂചന.
