സാംസങിന്റെ ഏറ്റവും പുതിയ മിഡ്-റേഞ്ച് സ്മാര്ട്ട്ഫോണുകളായ ഗാലക്സി എ37, ഗാലക്സി എ57 മോഡലുകളുടെ വിലയും പ്രധാന സവിശേഷതകളും പുറത്ത്. 8 ജിബി + 128 ജിബി റാമും സ്റ്റോറേജ് കോണ്ഫിഗറേഷനുമുള്ള സാംസങ് ഗാലക്സി എ37-ന് വിയറ്റ്നാമില് 10,990,000 വെങ്ഡാന് (ഏകദേശം 39,000 രൂപ) വില വരുമെന്ന് സൂചനയുണ്ട്. അതേ കോണ്ഫിഗറേഷനിലുള്ള ഗാലക്സി എ57-ന് ഏകദേശം 44,400 രൂപ വരെ വില വരാനാണ് സാധ്യതയെന്നാണ് ലീക്ക് റിപ്പോര്ട്ടുകള്.
റിപ്പോര്ട്ടുകള് അനുസരിച്ച് മുന് മോഡലുകളായ എ36, എ56 എന്നിവയുടെ വിലകളുമായി താരതമ്യം ചെയ്യുമ്പോള്, പുതിയ മോഡലുകള്ക്ക് കൂടുതല് വില ഉയര്ന്നതായി കാണാം. മുന് ലീക്കുകള് പ്രകാരം, ഗാലക്സി എ57-ന്റെ ഉയര്ന്ന വേരിയന്റ് (12 ജിബി + 256 ജിബി) തായ്ലന്ഡില് ഏകദേശം 51,000 രൂപ വിലയാകാമെന്ന് റിപ്പോര്ട്ടുകള് സൂചിപ്പിക്കുന്നു. അതേസമയം, എ37 5ജി-ന്റെ 8 ജിബി + 256 ജിബി മോഡല് 40,000 രൂപ വിലയില് എത്തും. ക്യാമറ സംവിധാനത്തില് 50 എംപി പ്രധാന ക്യാമറ, 8 എംപി അള്ട്രാവൈഡ്, 5 എംപി മാക്രോ ലെന്സ് എന്നിവയും 12 എംപി സെല്ഫി ക്യാമറയും ഉള്പ്പെടും. ആന്ഡ്രോയ്ഡ് 16 അടിസ്ഥാനമാക്കിയ വണ് യുഐ 8.5 ഉപയോഗിച്ച് പ്രവര്ത്തിക്കുന്ന ഈ ഫോണുകള്ക്ക് ആറ് വര്ഷം വരെ അപ്ഡേറ്റുകള് ലഭിക്കുമെന്ന് പ്രതീക്ഷിക്കുന്നു.
രണ്ട് ഫോണുകള്ക്കും മുന് പതിപ്പുകളേക്കാള് സ്ലിം ലുക്കും പുതുക്കിയ ക്യാമറ മോഡ്യൂളും ലഭിക്കും. Key Island ബട്ടണ് ഡിസൈന് തുടരുന്നുണ്ട്. ബോക്സില് സാധാരണയായി യുഎസ്ബി കേബിള്, സിം ഇജെക്റ്റര്, ഡോക്യുമെന്റുകള് എന്നിവ മാത്രം ഉള്പ്പെടുന്നതായിരിക്കും. സ്പെസിഫിക്കേഷനുകള് നോക്കിയാല്, ഗാലക്സി എ37-ല് എക്സിനോസ് 1480 പ്രോസസര് ഉപയോഗിക്കുമ്പോള്, എ57-ല് കൂടുതല് ശക്തമായ എക്സിനോസ് 1680 ചിപ്പ് ലഭിക്കും. രണ്ട് ഫോണുകള്ക്കും 6.7-ഇഞ്ച് ഡിസ്പ്ലേയും 120 ഹെര്ട്സ് റിഫ്രെഷ് റേറ്റും ലഭിക്കും. 5,000 എംഎഎച്ച് ബാറ്ററിയും 45 വാട്സ് ഫാസ്റ്റ് ചാര്ജിംഗും എ37-ല് ഉള്പ്പെടും.
