നമ്മളെല്ലാവരും തന്നെ ബാങ്കുകള് വഴി പല തരത്തിലുള്ള പണമിടപാടുകളും നടത്താറുണ്ട്. അങ്ങനെയിരിക്കെ പെട്ടന്നൊരു ദിവസവം നമ്മുടെ സ്വന്തം ബാങ്ക് അക്കൗണ്ടില് അപ്രതീക്ഷിതമായി കോടികള് വന്നാല് എന്തുചെയ്യും? മിക്കവരും അമ്പരന്നു നില്ക്കുമ്പോള് ഉത്തര്പ്രദേശിലെ മെയിന്പുരി സ്വദേശിയായ റീത്ത എന്ന സാധാരണ വീട്ടമ്മ ചെയ്ത കാര്യമാണ് സോഷ്യല് മീഡിയയില് കയ്യടി നേടുന്നത്. ഒരു കര്ഷകന്റെ ഭാര്യയായ റീത്ത, പണം പിന്വലിക്കാന് എടിഎമ്മില് എത്തിയപ്പോഴാണ് തന്റെ അക്കൗണ്ടില് ഏകദേശം പത്ത് കോടി രൂപ (9,99,49,588 രൂപ) ഉള്ളതായി കണ്ടത്. ബാലന്സ് കണ്ട് ആദ്യം വിശ്വസിക്കാനായില്ലെങ്കിലും, തുകയില് മാറ്റമില്ലെന്ന് ഉറപ്പായതോടെ അവര് ഒരു രൂപ പോലും പിന്വലിക്കാതെ ആ ദൃശ്യം മൊബൈലില് പകര്ത്തി അധികൃതരെ അറിയിക്കുകയായിരുന്നു.
അക്കൗണ്ടില് ഇത്രയും വലിയ തുകയുണ്ടായിട്ടും അതില് നിന്നും ഒരു രൂപ പോലും പിന്വലിക്കില്ലെന്ന് റീത്ത തീരുമാനിച്ചു. അത് തന്റെ അധ്വാനഫലമല്ലെന്ന കൃത്യമായ ബോധ്യമാണ് ഈ തീരുമാനത്തിന് പിന്നില്. അധികൃതരില് നിന്ന് വ്യക്തമായ വിശദീകരണം ലഭിക്കുന്നത് വരെ പണത്തില് തൊടരുതെന്ന് അവര് തന്റെ കുടുംബാംഗങ്ങള്ക്കും കര്ശന നിര്ദ്ദേശം നല്കി. ഈ സത്യസന്ധമായ നിലപാട് സോഷ്യല് മീഡിയയില് വൈറലായതോടെ റീത്തയെ പ്രശംസിച്ചുകൊണ്ട് നിരവധി പേരാണ് രംഗത്തെത്തിയത്.
സംഭവം വാര്ത്തയായതോടെ ബാങ്ക് ഓഫ് ഇന്ത്യ അധികൃതരും പ്രതികരണവുമായി എത്തി. സാങ്കേതിക തകരാറോ ഇടപാടിലെ പിഴവോ ആകാം ഇത്രയും വലിയ തുക അക്കൗണ്ടില് കാണിക്കാന് കാരണമെന്ന് കരീംഗഞ്ച് ബ്രാഞ്ച് മാനേജര് ഋഷികാന്ത് പാണ്ഡെ വ്യക്തമാക്കി. കഷ്ടപ്പാടുകളുണ്ടെങ്കിലും ആ തുകയില് നിന്നും ഒരു രൂപാ പോലും തൊടില്ലെന്ന് തീരുമാനിച്ച റീത്തയുടെ നിലപാടിനെ കയ്യടിയോടെയാണ് ആളുകള് സ്വീകരിക്കുന്നത്.
