ന്യൂഡല്ഹി: എഫ്സിആര്എ ഭേദഗതിയില് സഭകള്ക്ക് ആശങ്കയ്ക്ക് അടിസ്ഥാനമില്ലെന്നും താന് കൂടെയുണ്ടെന്നും ബിജെപി സംസ്ഥാനസെക്രട്ടറി രാജീവ് ചന്ദ്രശേഖര്. ഇക്കാര്യത്തില് ഒരു ആശങ്കയ്ക്കും പേടിയ്ക്കും സാഹചര്യമില്ലെന്നും നിയമാനുസൃതമായി കാര്യങ്ങള് കൈകാര്യം ചെയ്യുന്നവര്ക്ക് ഒരു കുഴപ്പവുമില്ലെന്നുമാണ് ആഭ്യന്തരമന്ത്രിയേയും ന്യൂനപക്ഷ മന്ത്രിയേയും വിളിച്ചപ്പോള് കിട്ടിയ മറുപടിയെന്നും പറഞ്ഞു.
എഫ്സിആര്എ ആരേയും ലക്ഷ്യം വെച്ചുള്ളതല്ലെന്നും ചില ദുരുപയോഗങ്ങള്ക്ക് എതിരേ മാത്രമുള്ള നിയമമാണെന്നും സഭകള്ക്ക് ഒരാശങ്കയുടേയും കാര്യമില്ലെന്നും പറഞ്ഞു. എഫ്സിആര്എ വിഷയത്തില് നേരത്തേ തന്നെ സഭകള് വലിയ ആശങ്ക പുറത്തുവിട്ടിരുന്നു. താന് പ്രചരണത്തിനിടയിലായിരുന്നു. അപ്പോള് തന്നെ അമിത്ഷായും കിരണ്റിജുജുവുമായും സംസാരിച്ചു. എന്നാല് ആശങ്കയ്ക്ക് അടിസ്ഥാനമില്ലെന്നാണ് തനിക്ക് കിട്ടിയ മറുപടിയെന്നും തന്നോട് ഇരുവരും പറഞ്ഞതായും രാജീവ് ചന്ദ്രശേഖര് പറഞ്ഞു.
എഫ്സിആര്എ വഴിക്ക് കാശ് എടുക്കുന്നവര്ക്ക് ഒരു പേടിയും ഉണ്ടാകേണ്ട സാഹചര്യവുമില്ല. അത് മുസ്ളീംപള്ളിയായാലൂം തിരുപ്പതിയായാലും പള്ളികളായാലും അക്കാര്യത്തില് ഒരു മാറ്റവും വരാന് പോകുന്നില്ല. സത്യസന്ധതയോടെയും നിയമം അനുസരിച്ചും എല്ലാം ശരിയായി ചെയ്യണമെന്ന് മാത്രം. പക്ഷേ തെറ്റ് ചെയ്തിട്ട് സംരക്ഷണം ചോദിച്ചാല് കിട്ടിയില്ല അതാണ് നിയമമെന്നും പറഞ്ഞു. സഭകള്ക്ക് ആശങ്കയ്ക്ക് ഒരു കാരണമില്ല. സഭകള്ക്കൊപ്പം താനുണ്ടെന്നും എപ്പോള് വേണമെങ്കിലും വിളിക്കാമെന്നും താന് പരിഹരിക്കുമെന്നും പറഞ്ഞു.
