മലയാളികളുടെ മനസ്സിലെന്നും നിറഞ്ഞു നില്ക്കുന്ന കൃഷ്ണഭക്തയായ ബാലാമണിയാണ് നവ്യ നായര്. കരിയറില് തിളങ്ങി നില്ക്കുന്ന വിവാഹിതയായ താരം പിന്നീട് അഭിനയത്തില് നിന്ന് ഇടവേളയെടുത്തിരുന്നു. മടങ്ങിവന്നപ്പോള് സിനിമയേക്കാളേറെ നൃത്തവേദികളിലൂടെയാണ് നവ്യ ആരാധകരുടെ ഹൃദയം കീഴടക്കിയത്. സോഷ്യല് മീഡിയയില് നിറയെ നവ്യയുടെ ചടുലതാളങ്ങളടങ്ങിയ നൃത്തച്ചുവടുകളുടെ വീഡിയോയും ചിത്രങ്ങളുമാണ് നിറഞ്ഞു നില്ക്കുന്നത്. സോഷ്യല് മീഡിയയിലും നിറഞ്ഞു നില്ക്കുന്ന താരമായ നവ്യ എല്ലാ വിശേഷങ്ങളും ചിത്രങ്ങളും അതിലൂടെ പങ്കിടാറുണ്ട്.
ഇപ്പോഴിതാ ഭര്തൃമാതാവിന്റെ വിയോഗവാര്ത്ത പങ്കുവയ്ക്കുകയാണ് നവ്യ നായര്. ഭര്തൃമാതാവിനൊപ്പമുളള ചിത്രങ്ങള്ക്കൊപ്പം ഹൃദയഭേദകമായ കുറിപ്പും നവ്യ സോഷ്യല് മീഡിയയില് പങ്കുവച്ചു. ശാന്ത മേനോന് എന്നാണ് ഭര്തൃമാതാവിന്റെ പേര്. സംസ്കാരച്ചടങ്ങുകള് വൈകിട്ട് മൂന്നുമണിക്ക് ചങ്ങനാശേരിയില് നടക്കുമെന്നും നവ്യ സോഷ്യല് മീഡിയ കുറിപ്പിലൂടെ പങ്കുവച്ചു.
‘‘അങ്ങനെ ആ വിളക്ക് അണഞ്ഞു....
എന്നും ഏതിനും ധൈര്യമായിരുന്നു, മരുമകളായിട്ടല്ല മകളായി സ്നേഹിച്ചു , എല്ലാ സങ്കടങ്ങളിലും മക്കള് വിഷമിക്കണ്ട അമ്മേടെ പ്രാർഥനയും അനുഗ്രഹവും കൂടെ ഉണ്ടാവും എന്ന് പറഞ്ഞു കൂടെ നിർത്തി. അമ്മ ആഗ്രഹിച്ചത് പോലെ ഇതുവരെ എല്ലാം ചെയ്തു. അമ്മേടെ സ്നേഹത്തിന് മുന്നിൽ എന്റെ നഷ്ടങ്ങൾ ഞാൻ സഹിച്ചു.
എന്റെ നൃത്തം ഏറെ ഇഷ്ടപെട്ട അമ്മ, അവസാനമായി മാതംഗി ഫെസ്റ്റിവലിൽ വന്നു എന്റെ കച്ചേരി മുഴുവൻ കണ്ടു. രണ്ട് മണിക്കൂർ നൃത്തം ചെയ്തു എന്ന് അഭിമാനത്തോടെ എല്ലാരോടും പറഞ്ഞു.
‘മക്കളേ...’ ആ വിളി കാതുകളിൽ മുഴങ്ങി നിൽക്കുന്നു...‘മക്കടെ വിളക്ക് ഒരുകാലത്തും കെടില്ല, അമ്മയാ പറയുന്നേ...’ നിത്യ ശാന്തി നേരുന്നു....’’ എന്നാണ് ഭര്ത്താവിന്റെ അമ്മയുടെ വിയോഗത്തിന്റെ വീഡിയോ പങ്കിട്ട് നവ്യ നായര് കുറിച്ചത്. അടുത്തിടെ നവ്യയുടെ നൃത്തം കാണാന് സന്തോഷിന്റെ അമ്മ വന്നത് താരം തന്നെ സോഷ്യല് മീഡിയയിലൂടെ പങ്കിട്ടിരുന്നു.
