ദുൽഖർ സൽമാൻ, രശ്മിക, മൃണാൽ ഠാക്കൂർ എന്നിവരെ കേന്ദ്രകഥാപാത്രങ്ങളാക്കി കൊണ്ട് ഹാനു രാഘവപടി സംവിധാനം ചെയ്ത ചിത്രമാണ് സീതാരാമം. 1965 ലെ ഇന്ഡോ- പാക് യുദ്ധത്തിന്റെ പശ്ചാത്തലത്തില് നടക്കുന്ന ഈ കഥ, ഒരു ഹിസ്റ്റോറിക്കല് ഫിക്ഷനും അതേസമയം ഒരു പ്രണയകഥയുമായിരുന്നു. തെന്നിന്ത്യന് ഭാഷകളില് റിലീസ് ചെയ്ത ഈ ചിത്രം വന് വിജയമായി മാറിയിരുന്നു.
ദുൽഖർ സൽമാനും മൃണാൾ താക്കൂറും തകർത്തഭിനയിച്ച ‘സീതാരാമം’ സിനിമ കണ്ടിറങ്ങിയ ഏതൊരു പ്രേക്ഷകന്റെയും മനസ്സിലെ വിങ്ങലായിരുന്നു ആ സിനിമയുടെ ക്ലൈമാക്സ്. റാമിന്റെയും സീതയുടെയും മനോഹരമായ പ്രണയവും അവരുടെ നഷ്ടങ്ങളും ആർക്കും അത്ര പെട്ടെന്ന് മറക്കാൻ കഴിയില്ല. എന്നാൽ ഇപ്പോഴിതാ ആ സങ്കടം മാറ്റുകയാണ് എഐ ഒരുക്കിയ പുതിയ സീതാരാമം വീഡിയോ. സിനിമയുടെ ഒടുവിൽ റാം കൊല്ലപ്പെടുന്നതും റാമിന്റെ കത്തു വായിച്ച് സീത വിങ്ങുന്നതുമായിരുന്നു പ്രേക്ഷകര് കണ്ടിരുന്നത്. എന്നാൽ ആർട്ടിഫിഷ്യൽ ഇന്റലിജൻസ് ഉപയോഗിച്ച് നിർമ്മിച്ച ഈ വീഡിയോ വഴി കഥയുടെ അവസാനം എല്ലാവരും ആഗ്രഹിച്ച തരത്തിലേക്കാണ് മാറ്റിയിരിക്കുന്നത്.
റാം സുരക്ഷിതനായി തിരിച്ചെത്തുകയും സീതയോടൊപ്പം സന്തോഷത്തോടെ ജീവിക്കുകയും ചെയ്യുന്നതായാണ് എഐ ആവിഷ്കരിച്ചിരിക്കുന്നത്. റാമും സീതയും വീണ്ടും ഒന്നിക്കുന്നതും വാര്ദ്ധക്യം ആസ്വദിക്കുന്നതുമടക്കം തന്മയത്വത്തോടെയാണ് എഐ പുനഃസൃഷ്ടിച്ചിരിക്കുന്നത്. കഥാപാത്രങ്ങളുടെ മുഖഭാവങ്ങളും പശ്ചാത്തലവും യഥാർത്ഥ സിനിമയെ വെല്ലുന്ന രീതിയില് മാറ്റിയിട്ടുണ്ട്. ഏതായാലും തങ്ങള് ഇഷ്ടപ്പെട്ട പ്രിയപ്പെട്ട കഥാപാത്രങ്ങള് ഒന്നിച്ചതിലുള്ള സന്തോഷം കമന്റ് ബോക്സിൽ ആരാധകർ പ്രകടിപ്പിക്കുന്നുണ്ട്. ഇൻസ്റ്റഗ്രാമിൽ വൈറലാകുന്ന വീഡിയോ ‘മണി ക്രിയേറ്റ്സ് എഐ’ എന്ന അക്കൗണ്ടാണ് പങ്കുവച്ചിരിക്കുന്നത്.
