തിരുവനന്തപുരം: ബിജെപിയുടെ പ്രകടനപത്രികയില് പറഞ്ഞിട്ടുള്ള തിരുവനന്തപുരം ആസ്ഥാനമാക്കിയുള്ള എല്ലാ പദ്ധതികളും നടപ്പാക്കുമെന്നും രണ്ടു മെട്രോകള് ഉള്പ്പെടെയുള്ള പദ്ധതികള് നടപ്പിലാക്കാന് കഴിയുമെന്നും തിരുവനന്തപുരം മേയര് വി.വി. രാജേഷ്.
ബിജെപി സര്ക്കാര് കേരളത്തില് അധികാരത്തില് വന്നാല് പ്രകടനപത്രികയില് പറഞ്ഞിട്ടുള്ളതെല്ലാം നടപ്പാക്കും. എയിംസ് പോലെയുള്ള പദ്ധതികള് നടപ്പിലാക്കാന് ശേഷിയുണ്ട്. ഗവണ്മെന്റ് വന്നാല് ആദ്യ നാലുകൊല്ലം കൊണ്ടു തന്നെ എയിംസ് ഉള്പ്പെടെയുള്ള പദ്ധതികള് നടപ്പിലാക്കും. സമയബന്ധിതമായി ബിജെപി അത് നടപ്പിലാക്കുമെന്ന് ജനങ്ങള്ക്ക് വിശ്വാസം ഉണ്ടെന്നും പറഞ്ഞു.
ശബരിമല സ്വര്ണ്ണക്കൊള്ളയില് കൃത്യമായി അവസാനപ്രതികളെ വരെ അറസ്റ്റ് ചെയ്യണം. ഇതുമായി ബന്ധപ്പെട്ട അന്വേഷണം വന്നാല് നാളുകളായി നടക്കുന്ന കൊള്ളകളൊക്കെ പുറത്തുവരും. നന്നായിട്ട് ചോദ്യം ചെയ്താല് വിവരങ്ങളൊക്കെ പുറത്തുവരും.
സ്വര്ണ്ണക്കൊള്ളയുടെ വിവരങ്ങള് പുറത്തുവരേണ്ടതും പ്രതികള് അകത്താകേണ്ടതും ശബരിമലയുടെ മാത്രമല്ല വിശ്വാസികളുടെ കൂടി ആവശ്യമാണെന്നും പറഞ്ഞു. അത് തങ്ങള്ക്ക് സാധ്യമായ കാര്യമാണെന്നും പറഞ്ഞു.
എല്ഡിഎഫിന്റെയും യുഡിഎഫിന്റെയും പഴകിതേഞ്ഞ നടപ്പിലാക്കാന് കഴിയാത്ത പ്രകടനപത്രികകള് കണ്ട് ജനം മടുത്തിരിക്കുകയാണ്. അതുകൊണ്ടു തന്നെ ബിജെപിയുടെ പ്രകടനപത്രിക ജനം ഇരുകയ്യും നീട്ടി സ്വീകരിക്കുമെന്നും പറഞ്ഞു.
ബിജെപിയ്ക്ക് ഏറ്റവും കൂടുതല് സ്ഥാനാര്ത്ഥികള് ജയിക്കുന്നതും ഏറ്റവും വലിയ ഭൂരിപക്ഷം കിട്ടുന്നതും തിരുവനന്തപുരം ജില്ലയില് ആയിരിക്കുമെന്നും വിവി. രാജേഷ് പ്രത്യാശ പ്രകടിപ്പിച്ചു. ബിജെപിയുടെ സംസ്ഥാനപ്രസിഡന്റും ജില്ലാ പ്രസിഡന്റുമെല്ലാം മത്സര രംഗത്തുണ്ട്. മുഴുവന് സ്ഥാനാര്ത്ഥികളും ജയിക്കുമെന്നും ഇവര്ക്കെല്ലാം വലിയ ഭൂരിപക്ഷം തന്നെ കിട്ടുമെന്നും പറഞ്ഞു.
