ന്യൂഡല്ഹി: യുദ്ധരംഗത്ത് സ്വയംനിയന്ത്രിത ആയുധ സംവിധാനങ്ങള് വികസിപ്പിക്കാനുള്ള നടപടികള് ഔദ്യോഗികമായി ആരംഭിച്ച് ഇന്ത്യ. ഡിഫന്സ് റിസര്ച്ച് ആന്ഡ് ഡെവലപ്മെന്റ് ഓര്ഗനൈസേഷനും (ഡിആര്ഡിഒ) വിവിധ പൊതുമേഖലാ സ്ഥാപനങ്ങളും ചേര്ന്നാണ് ആയുധ സംവിധാനം വികസപ്പിക്കുക. കില്ലര് റോബോട്ടുകളെന്ന് വിശേഷിപ്പിക്കാവുന്ന മാരക പ്രഹരശേഷിയുള്ള ലീതല് ഓട്ടോണോമസ് വെപ്പണ് സിസ്റ്റം വികസിപ്പിക്കാനാണ് ഇന്ത്യ പദ്ധതിയിടുന്നത്. 2026 മാര്ച്ച് 30ന് ലോക്സഭയില് സമര്പ്പിച്ച നിര്ണായക റിപ്പോര്ട്ടിലാണ് ഇന്ത്യയുടെ ഈ സുപ്രധാന സൈനിക നീക്കത്തെക്കുറിച്ചുള്ള വിവരങ്ങള് വെളിപ്പെടുത്തിയത്.
യുദ്ധത്തിന്റെ എല്ലാ മേഖലകളിലും ആര്ട്ടിഫിഷ്യല് ഇന്റലിജന്സ് (AI) നടപ്പിലാക്കാനാണ് ഈ പദ്ധതിയിലൂടെ ലക്ഷ്യമിടുന്നത്. മാരകമായ ആക്രമണശേഷിയുള്ള ആയുധങ്ങള്ക്ക് പുറമെ സൈബര് സുരക്ഷ, കമാന്ഡ്ആന്ഡ്കണ്ട്രോള് സംവിധാനങ്ങള് എന്നിവയിലും എഐയുടെ കരുത്ത് പ്രയോജനപ്പെടുത്തും. നേരിട്ടുള്ള പോരാട്ടങ്ങളില് സൈനികരുടെ സാന്നിധ്യം കുറയ്ക്കാനും രാജ്യത്തിന്റെ സൈനിക പ്രഹരശേഷി ഗണ്യമായി വര്ദ്ധിപ്പിക്കാനും ഈ നീക്കം വഴി സാധിക്കും.
കടലിനടിയില് പ്രവര്ത്തിക്കുന്ന സ്വയംനിയന്ത്രിത വാഹനങ്ങള്, എഐ അധിഷ്ഠിത മിസൈല് സംവിധാനങ്ങള്, വേഷം മാറിയ വ്യക്തികളെ തിരിച്ചറിയാന് സഹായിക്കുന്ന 'ഫേസ് റെക്കഗ്നിഷന് അണ്ടര് ഡിസ്ഗൈസ്' എന്നിവയാണ് പ്രധാനമായും വികസിപ്പിക്കുന്നത്. സെന്സറുകളും ക്യാമറകളും ഉപയോഗിച്ച് സ്വന്തമായി തീരുമാനമെടുക്കാന് ഇത്തരം സിസ്റ്റങ്ങള്ക്ക് കഴിയുമെങ്കിലും, യുദ്ധരംഗത്ത് എഐ ഉപയോഗിക്കുന്നതില് ഇന്ത്യ അതീവ ജാഗ്രത പാലിക്കുന്നുണ്ട്.
എഐയുടെ തീരുമാനങ്ങള് എപ്പോഴും കൃത്യമാകണമെന്നില്ലെന്നും അത് അപ്രതീക്ഷിതമായ വലിയ അപകടങ്ങള്ക്ക് കാരണമായേക്കാമെന്നും റിപ്പോര്ട്ട് മുന്നറിയിപ്പ് നല്കുന്നു. അതിനാല്, യന്ത്രങ്ങള് മനുഷ്യരുടെ മേല്നോട്ടമില്ലാതെ കൊലപാതകങ്ങള് നടത്തുന്ന രീതി അനുവദിക്കില്ല. എഐ നിര്ദ്ദേശങ്ങള് നല്കിയാലും ആയുധം പ്രയോഗിക്കാനുള്ള അന്തിമ തീരുമാനം ഒരു മനുഷ്യന് എടുക്കുന്ന 'സെമി ഓട്ടോമാറ്റിക്' രീതിയാണ് പ്രതിരോധ മന്ത്രാലയം ശുപാര്ശ ചെയ്യുന്നത്.
യന്ത്രങ്ങള് കൊലപാതകങ്ങള് തീരുമാനിക്കുന്നത് ധാര്മ്മികമായി ശരിയല്ലെന്ന് കാട്ടി ഐക്യരാഷ്ട്രസഭ ഇത്തരം ആയുധങ്ങളെ എതിര്ക്കുന്നുണ്ടെങ്കിലും ആഗോളതലത്തിലുള്ള നിരോധനങ്ങളോട് ഇന്ത്യ യോജിക്കുന്നില്ല. ഇത്തരം നിരോധനങ്ങള് സാങ്കേതിക വികസനത്തെ തടസ്സപ്പെടുത്തുമെന്നാണ് ഇന്ത്യയുടെ നിലപാട്. അതേസമയം, രാജ്യത്ത് ഇത്തരം ആയുധങ്ങളെ നിയന്ത്രിക്കാന് പ്രത്യേക നിയമങ്ങളോ സമിതിയോ നിലവിലില്ല എന്നത് ഒരു വലിയ പോരായ്മയായി ചൂണ്ടിക്കാണിക്കപ്പെടുന്നു.
