ന്യൂഡല്ഹി: ബിജെപിയുടേത് ജനക്ഷേമത്തെ കേന്ദ്രീകരിച്ചുള്ള കാഴ്ചപ്പാടാണെന്നും വികസിത ഭാരതം എന്ന ലക്ഷ്യത്തിനായി പാര്ട്ടി പ്രതിജ്ഞാബദ്ധമാണെന്നും പ്രധാനമന്ത്രി നരേന്ദ്ര മോദി. സ്വാര്ത്ഥതയില്ലാത്ത സേവനം, അചഞ്ചലമായ അര്പ്പണബോധം, നല്ല ഭരണത്തോടുള്ള അഭിനിവേശം എന്നിവയാണ് ബിജെപി പ്രവര്ത്തകരുടെ മുഖമുദ്രയെന്ന് അദ്ദേഹം പറഞ്ഞു.
ഭാരതീയ ജനതാ പാര്ട്ടിയുടെ സ്ഥാപന ദിനത്തില് രാജ്യത്തുടനീളമുള്ള ബിജെപി പ്രവര്ത്തകര്ക്ക് ഹൃദയംഗമമായ ആശംസകള് നേര്ന്ന് പ്രധാനമന്ത്രി നല്കിയ സന്ദേശത്തിലാണ് ഈ കാര്യങ്ങളുള്ളത്. 'ഇന്ത്യ ഫസ്റ്റ്' എന്ന തത്വത്തില് അടിയുറച്ച് പ്രവര്ത്തിക്കുന്ന ബിജെപി എന്നും സമൂഹസേവനത്തില് മുന്പന്തിയിലാണെന്ന് എക്സില് പങ്കുവെച്ച കുറിപ്പില് അദ്ദേഹം വ്യക്തമാക്കി.
'ജനക്ഷേമത്തെ കേന്ദ്രീകരിച്ചുള്ള കാഴ്ചപ്പാടാണ് ബിജെപിയുടേത്. വികസിത ഭാരതം എന്ന ലക്ഷ്യത്തിനായി പാര്ട്ടി പ്രതിജ്ഞാബദ്ധമാണ്. നമ്മുടെ കൂട്ടായ പ്രയത്നം ഇന്ത്യയെ പുരോഗതിയുടെ പുതിയ ഉയരങ്ങളിലെത്തിക്കട്ടെ, എന്നും പ്രധാനമന്ത്രി പറഞ്ഞു. ബിജെപിയുടെ രൂപീകരണം വെറുമൊരു രാഷ്ട്രീയ മാറ്റം മാത്രമല്ലെന്നും അത് ദേശീയ പുനര്നിര്മ്മാണത്തിനായുള്ള പ്രതിജ്ഞയാണെന്നും കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. 2047-ഓടെ സ്വയംപര്യാപ്തമായ വികസിത ഭാരതം കെട്ടിപ്പടുക്കുക എന്നതാണ് ലക്ഷ്യമെന്ന് ജെ.പി. നദ്ദ വ്യക്തമാക്കി.
