ദോഹ: കലയും ആത്മീയതയും ഇഴചേർന്ന അപൂർവ്വമായ വർണ്ണക്കാഴ്ചകൾക്ക് സാക്ഷ്യം വഹിച്ച് തനിമ ഖത്തർ സംഘടിപ്പിച്ച 'ഇൻസൈറ്റ് 2026' സീസൺ 1 പെയിന്റിംഗ് മത്സരം സമാപിച്ചു. റമദാനിൽ 'ദിവ്യകാരുണ്യത്തിന്റെ പ്രാപഞ്ചിക അടയാളങ്ങൾ' എന്ന വിഷയത്തെ ആസ്പദമാക്കി നടത്തിയ മത്സരത്തിൽ സിറാജുദ്ദീൻ കെ.വി ഒന്നാം സ്ഥാനം കരസ്ഥമാക്കി. ശിഹാർ ഹംസ രണ്ടാം സ്ഥാനവും ഉമാ റാമിയ മൂന്നാം സ്ഥാനവും നേടി.ലൂസൈൽ ആർട് ഫാക്ടറിയിൽ നടന്ന സമാപന ചടങ്ങിൽ വെച്ചാണ് വിജയികളെ പ്രഖ്യാപിച്ചത്. വിവിധ രാജ്യങ്ങളിൽ നിന്നുള്ള 40-ഓളം കലാകാരന്മാർ പങ്കെടുത്ത മത്സരത്തിലെ തിരഞ്ഞെടുത്ത ചിത്രങ്ങളുടെ പ്രദർശനം ഡോ. മുഹമ്മദ് സുൽത്താൻ അൽ ദർവീശ് ഉദ്ഘാടനം ചെയ്തു.
ഖത്തറിലെ പ്രമുഖ ചിത്രകാരൻ ഇസ്മാഈൽ അസ്സാം ആണ് വിജയികളെ തിരഞ്ഞെടുത്തത്. രണ്ട് ദിവസങ്ങളിലായി നടന്ന പ്രദർശനം കാണാൻ നിരവധി സന്ദർശകരെ ത്തി.വിജയികൾക്കുള്ള ക്യാഷ് അവാർഡും സർട്ടിഫിക്കറ്റുകളും ഡോ. മുഹമ്മദ് സുൽത്താൻ അൽ ദർവീശ്, ഐ.സി.സി ജനറൽ സെക്രട്ടറി എബ്രഹാം ജോസഫ്, തനിമ രക്ഷാധികാരി ആർ.എസ്. അബ്ദുൽ ജലീൽ എന്നിവർ വിതരണം ചെയ്തു. വരും വർഷങ്ങളിൽ 'ഇൻസൈറ്റ്' കൂടുതൽ വിപുലമായി സംഘടിപ്പിക്കുമെന്ന് തനിമ ഡയറക്ടർ ജസീം സി.കെ അറിയിച്ചു.സി.ഐ.സി ജനറൽ സെക്രട്ടറി അർഷദ് ഇ, സുഹൈൽ ശാന്തപുരം, നാസർ വേളം, ഡോ. സൽമാൻ, മുജീബ് കെ.കെ തുടങ്ങി തനിമയുടെയും ആർട് ഫാക്ടറിയുടെയും പ്രമുഖ ഭാരവാഹികൾ ചടങ്ങിൽ സംബന്ധിച്ചു. പ്രമുഖ ഐ.ടി കമ്പനിയായ ടി.എസ് ഖത്തറാണ് വിജയികൾക്കുള്ള സമ്മാനങ്ങൾ സ്പോൺസർ ചെയ്തത്. ബാസിത് ഖാൻ, ഇജാസ് എന്നിവർ പരിപാടികൾക്ക് നേതൃത്വം നൽകി.
ഷഫീക്ക് അറയ്ക്കൽ
