കാസര്കോട്: മഞ്ചേശ്വരം നിയസഭാ മണ്ഡലത്തില് പ്രവാസികളുടെ വോട്ടുകള് ഉപയോഗിച്ച് കള്ളവോട്ട് ചെയ്യാന് യുഡിഎഫ് വ്യാപകമായ ക്രമക്കേടുകള്ക്ക് പദ്ധതിയിടുന്നതായി ബിജെപി സംസ്ഥാന അദ്ധ്യക്ഷന് കെ. സുരേന്ദ്രന്. മുസ്ലീം ലീഗിന് ശക്തമായ സ്വാധീനമുള്ള മഞ്ചേശ്വരം, കുമ്പള, മംഗല്പ്പാടി, വോര്ക്കാടി പഞ്ചായത്തുകളിലെ 25 ബൂത്തുകളിലാണ് പ്രധാനമായും ക്രമക്കേട് ലക്ഷ്യമിടുന്നത്.
നിലവില് നാട്ടിലില്ലാത്ത പ്രവാസികളുടെ വോട്ടര് സ്ലിപ്പുകള് യുഡിഎഫ് പ്രവര്ത്തകര് കൈക്കലാക്കിയതായി സുരേന്ദ്രന് ആരോപിച്ചു. ഇവ ഉപയോഗിച്ച് വോട്ട് രേഖപ്പെടുത്താനാണ് നീക്കം. ഇതിനെതിരെ കര്ശന ജാഗ്രത വേണമെന്നും ബിജെപി സ്ഥാനാര്ത്ഥി അദ്ദേഹം പറഞ്ഞു.
ഈ ബൂത്തുകളില് കടുത്ത നിരീക്ഷണം ഏര്പ്പെടുത്തണം. അല്ലാത്തപക്ഷം സുതാര്യമായ ഒരു തിരഞ്ഞെടുപ്പ് മഞ്ചേശ്വരത്ത് അസാധ്യമാകുമെന്ന് അദ്ദേഹം പറഞ്ഞു. എല്ഡിഎഫ് സര്ക്കാരിനെതിരെയുള്ള അമര്ഷം പോലെ തന്നെ മണ്ഡലത്തില് മുസ്ലീം ലീഗിനെതിരായ വികാരവും ശക്തമാണെന്ന് സുരേന്ദ്രന് നിരീക്ഷിച്ചു. അതുകൊണ്ട് തന്നെ ഇത്തവണ വലിയ വിജയപ്രതീക്ഷയുണ്ടെന്നും അദ്ദേഹം കൂട്ടിച്ചേര്ത്തു.
യുഡിഎഫ് പതിവായി ഉപയോഗിക്കുന്ന വര്ഗീയതയുടെ രാഷ്ട്രീയം ഇത്തവണ മഞ്ചേശ്വരത്ത് വിജയിക്കില്ല. മുസ്ലീം സമുദായത്തില്പ്പെട്ടവര് പോലും വര്ഗീയ പ്രചാരണങ്ങള്ക്കെതിരെ നിലപാടെടുത്തു കഴിഞ്ഞു. യുഡിഎഫിന്റെ അവിശുദ്ധ നീക്കങ്ങളെ ജനങ്ങള് തള്ളിക്കളയുമെന്നും സുതാര്യമായ രീതിയില് വോട്ടെടുപ്പ് നടന്നാല് ബിജെപിക്ക് മണ്ഡലത്തില് മികച്ച മുന്നേറ്റം നടത്താന് കഴിയുമെന്നുമാണ് കെ. സുരേന്ദ്രന്റെ അവകാശവാദം. വീഴ്ച വരുത്തുന്ന ഉദ്യോഗസ്ഥര്ക്കെതിരെ നടപടി വേണമെന്നും അദ്ദേഹം ആവശ്യപ്പെട്ടു.
