ക്രെറ്റയുടെ പുത്തന് പതിപ്പുമായി ഹ്യുണ്ടായി രംഗത്തെത്തി. വേനല്ക്കാല യാത്രകള് കൂടുതല് ആസ്വാദ്യകരമാക്കാന് ലക്ഷ്യമിട്ടാണ് കമ്പനി 'ക്രെറ്റ സമ്മര് എഡിഷന്' (Hyundai Creta Summer Edition) വിപണിയില് എത്തിച്ചത്. ക്രെറ്റയുടെ തിരഞ്ഞെടുത്ത വേരിയന്റുകളില് അത്യാധുനിക സവിശേഷതകള് ഉള്പ്പെടുത്തിയാണ് സമ്മര് എഡിഷന് അവതരിപ്പിച്ചിരിക്കുന്നത്. ഈ പ്രത്യേക പതിപ്പിന് 12.05 ലക്ഷം രൂപ മുതല് 17.89 ലക്ഷം രൂപ വരെയാണ് എക്സ്-ഷോറൂം വില വരുന്നത്. അടിസ്ഥാന വകഭേദമായ ഇഎക്സ് (EX) സമ്മര് എഡിഷനില് സ്മാര്ട്ട് കീ, പുഷ് ബട്ടണ് സ്റ്റാര്ട്ട് തുടങ്ങിയ സൗകര്യങ്ങള് ഉള്പ്പെടുത്തിയിട്ടുണ്ട്. ഇതിന്റെ പെട്രോള് മാനുവല് പതിപ്പിന് 12.05 ലക്ഷം രൂപയും ഡീസല് മാനുവലിന് 13.61 ലക്ഷം രൂപയുമാണ് വില.
സൗകര്യങ്ങള്ക്കും രൂപഭംഗിക്കും മുന്ഗണന നല്കുന്നവര്ക്കായാണ് EX(O) സമ്മര് എഡിഷന് തയാറാക്കിയിരിക്കുന്നത്. ക്വാഡ്-ബീം എല്ഇഡി ഹെഡ്ലാമ്പുകള്, എല്ഇഡി ടെയില് ലാമ്പുകള്, ഡിആര്എല്ലുകള്, റിയര് ക്യാമറ, റിയര് സണ്ഷെയ്ഡ് എന്നിവ ഇതിന്റെ പ്രത്യേകതയാണ്. എഞ്ചിന്, ട്രാന്സ്മിഷന് ഓപ്ഷനുകള്ക്ക് അനുസരിച്ച് 13.13 ലക്ഷം മുതല് 16.04 ലക്ഷം രൂപ വരെയാണ് ഇതിന്റെ വില. സുരക്ഷയ്ക്കും സാങ്കേതികവിദ്യയ്ക്കും പ്രാധാന്യം നല്കുന്ന S(O), നൈറ്റ് എഡിഷനുകളില് ഡാഷ് ക്യാമറ അധികമായി നല്കിയിട്ടുണ്ട്. S (O) വേരിയന്റുകള്ക്ക് 14.19 ലക്ഷം മുതല് 17.25 ലക്ഷം രൂപ വരെയാണ് വില നിശ്ചയിച്ചിരിക്കുന്നത്. നൈറ്റ് എഡിഷന്റെ പെട്രോള് പതിപ്പിന് 14.38 ലക്ഷവും ഡീസല് പതിപ്പിന് 15.99 ലക്ഷം രൂപയുമാണ് വിപണിയിലെ വില.
SX സമ്മര് എഡിഷനില് 10.25 ഇഞ്ച് ഡിജിറ്റല് ഇന്സ്ട്രുമെന്റ് ക്ലസ്റ്ററും ഡാഷ് ക്യാമറയും ലഭ്യമാണ്. ഇതിന്റെ പെട്രോള് മാനുവല് വേരിയന്റിന് 15.03 ലക്ഷം രൂപയാണ് വില. ഏറ്റവും ഉയര്ന്ന വകഭേദമായ SX പ്രീമിയം സമ്മര് എഡിഷന് അത്യാധുനിക സവിശേഷതകളാല് സമ്പന്നമാണ്. 10.25 ഇഞ്ച് ഡിജിറ്റല് ക്ലസ്റ്റര്, സറൗണ്ട് വ്യൂ മോണിറ്റര്, ബ്ലൈന്ഡ്-സ്പോട്ട് വ്യൂ മോണിറ്റര്, ഫ്രണ്ട് പാര്ക്കിംഗ് സെന്സറുകള് എന്നിവ ഇതിലുണ്ട്. ഇതിന്റെ വില 16.33 ലക്ഷം മുതല് 17.88 ലക്ഷം രൂപ വരെയാണ്. സാങ്കേതികമായി ക്രെറ്റയുടെ അതേ കരുത്തുറ്റ എഞ്ചിനുകള് തന്നെയാണ് സമ്മര് എഡിഷനിലും ഉപയോഗിച്ചിരിക്കുന്നത്. 1.5 ലിറ്റര് പെട്രോള്, ഡീസല് എഞ്ചിന് ഓപ്ഷനുകള് ഇതില് ലഭ്യമാണ്. ഉപഭോക്താക്കളുടെ താല്പ്പര്യത്തിന് അനുസരിച്ച് മാനുവല് അല്ലെങ്കില് ഓട്ടോമാറ്റിക് ഗിയര്ബോക്സ് തിരഞ്ഞെടുക്കാം.
