സ്ത്രീവിരുദ്ധത ഉള്ളിൽ കൊണ്ടുനടക്കുന്ന പുരുഷ കേന്ദ്രീകൃത സമൂഹത്തെ ആക്ഷേപഹാസ്യത്തിൽ മുക്കി അവതരിപ്പിച്ച ചിത്രമായിരുന്നു ജയ ജയ ജയഹേ. അൽപം ചിരിയും കൂടുതല് ചിന്തയും പകര്ന്നു നല്കിയ വിപിന് ദാസ് സംവിധാനം ചെയ്ത കുടുംബചിത്രത്തില് ബേസില് ജോസഫും ദര്ശന രാജേന്ദ്രനുമായിരുന്നു നായിക നായകന്മാര്. ഏറെ സ്വീകാര്യതയും നിരൂപക പ്രശംസയും നേടിയെടുത്ത ഈ ചിത്രം വലിയ രീതിയില് ശ്രദ്ധിക്കപ്പെട്ടിരുന്നു.
ജയ ജയ ജയഹേ എന്ന ചിത്രം ആക്ഷേപഹാസ്യരൂപേണയാണ് കഥ പറഞ്ഞത്. അസീസ് നെടുമങ്ങാട്, അജു വര്ഗീസ്, മഞ്ജു പിള്ള തുടങ്ങിയവരും ഈ സിനിമയില് പ്രധാനവേഷത്തിലെത്തിയിരുന്നു. സിനിമയിലുടനീളമുള്ള കഥാപാത്രമായിരുന്നു അസീസിന്റേത്.
ഇപ്പോഴിതാ ചിത്രത്തിന്റെ സെറ്റില് അഭിനയിക്കാന് ചെന്നപ്പോഴുണ്ടായ രസകരമായ അനുഭവം പങ്കിടുകയാണ് അസീസ് നെടുമങ്ങാട്. ഒരു ചിരിയോ കളിയോ ഒന്നും അതിന്റെ സെറ്റില് ഇല്ലായിരുന്നെന്നും ചത്ത വീട് പോലെയായിരുന്നു അതിന്റെ ലൊക്കേഷനെന്നും അവിടെയുള്ള ആര്ക്കും അതിന്റെ കഥയറിയില്ലായിരുന്നുവെന്നുമാണ് അസീസ് പറഞ്ഞത്.
‘‘ജയ ജയ ജയഹേ എന്ന സിനിമ കണ്ടിട്ടില്ലേ, ചത്ത വീട് പോലെയായിരുന്നു അതിന്റെ ലൊക്കേഷന്. ഒരു ചിരിയോ കളിയോ ഒന്നും അതിന്റെ സെറ്റില് ഇല്ലായിരുന്നു. കാരണം അവിടെയുള്ള ആര്ക്കും അതിന്റെ കഥയറിയില്ലായിരുന്നു. ഞങ്ങള്ക്കും അറിയത്തില്ലായിരുന്നു. ഇതൊരു കോമഡി സിനിമ എന്ന് പറയുന്നതിന് പകരം സീരിയസ് ആയിട്ടുള്ള ഫെസ്റ്റിവല് മൂവി എന്ന് പറഞ്ഞിട്ടാണ് വിപിന് ദാസ് ഞങ്ങളെ കൂട്ടി കൊണ്ട് പോകുന്നത്.
പക്ഷേ രണ്ട് ദിവസം കഴിഞ്ഞപ്പോള് എനിക്ക് കാര്യം പിടികിട്ടി. വിപിനെ മാറ്റിനിര്ത്തി ഞാന് ചോദിച്ചു വിപിനേ ഇതൊരു ഹ്യൂമാറായിട്ട് എനിക്ക് തോന്നുന്നുണ്ടല്ലോയെന്ന്. അത് കുഴപ്പമില്ല ഇക്ക ചെയ്യെന്നാണ് എന്നോട് ആദ്യം പറഞ്ഞത്.
സത്യം പറയാന് പറഞ്ഞപ്പോള് വിപിന് എന്നെ മാറ്റി നിര്ത്തിയിട്ട് സംഭവം ഹ്യൂമറാണെന്ന് സമ്മതിച്ചു. അതിലഭിനയിച്ച അമ്മയൊക്കെ ട്രാക്ക് അറിയാത്തതുകൊണ്ട് വളരെ സീരിയസായിട്ടാണ് അഭിനയിച്ചത്. ഇതുപോലെ നമ്മള് അറിയാതെ അഭിനയിച്ച് ഒട്ടും പ്രതീക്ഷിക്കാത്ത രംഗങ്ങള്ക്ക് തിയേറ്ററില് ആളുകള് പൊട്ടിച്ചിരിക്കും...’’ അസീസ് പറഞ്ഞു. ഒരു യൂട്യൂബ് ചാനലിന് നല്കിയ അഭിമുഖത്തില് സംസാരിച്ചപ്പോഴാണ് അസീസ് ഇത് പറഞ്ഞത്.
2016 ല് പുറത്തിറങ്ങിയ മുത്തുഗൗ എന്ന ചിത്രം സംവിധാനം ചെയ്ത് മലയാള സിനിമയില് അരങ്ങേറ്റം കുറിച്ച സംവിധായകനാണ് വിപിന് ദാസ്. ജയ ജയ ജയഹേയ്ക്ക് പുറമെ അന്താക്ഷരി, ഗുരുവായൂരമ്പല നടയില് തുടങ്ങിയ ചിത്രങ്ങളും വിപിന് ദാസ് സംവിധാനം ചെയ്തിട്ടുണ്ട്. തിയേറ്ററുകളില് നൂറുകോടിയും പിന്നിട്ട് തിയേറ്ററുകള് ഹൗസ്ഫുള്ളായി കുതിക്കുന്ന വാഴ 2 വിന്റെ നിര്മാതാവും തിരക്കഥാകൃത്തും വിപിന് ദാസാണ്.
