പോളണ്ടിലെ വാര്സോ നഗരത്തില് കാട്ടുപന്നികളെ ഒരു റോബോട്ട് ഓടിക്കുന്ന ദൃശ്യങ്ങള് സമൂഹമാധ്യമങ്ങളില് വലിയ തോതില് പ്രചരിക്കുകയാണ്. 'എഡ്വേര്ഡ് വാര്ചോക്കി' എന്ന് പേരിട്ടിരിക്കുന്ന, യൂണിട്രീ ജി1 വിഭാഗത്തില്പ്പെട്ട ഈ ഹ്യൂമനോയിഡ് റോബോട്ട് ഒരു പാര്ക്കിങ് ഗ്രൗണ്ടിലൂടെ പന്നിക്കൂട്ടത്തെ പിന്തുടരുന്നതാണ് വീഡിയോയിലുള്ളത്. റോബോട്ടിന്റെ അസാധാരണ രൂപം കണ്ട് പന്നികള് ഓടിപ്പോയപ്പോള്, അവയെ കിട്ടാത്ത നിരാശയില് റോബോട്ട് ആകാശത്തേക്ക് കൈകള് ഉയര്ത്തുന്ന ദൃശ്യം ആളുകളില് ചിരി പടര്ത്തിയിട്ടുണ്ട്.
യഥാര്ത്ഥത്തില് കാട്ടുപന്നികളെ തുരത്താന് വേണ്ടി ഔദ്യോഗികമായി നിര്മ്മിച്ചതല്ല ഈ റോബോട്ട്. ഇതൊരു മാര്ക്കറ്റിംഗ് തന്ത്രത്തിന്റെ ഭാഗമാണെന്നാണ് റിപ്പോര്ട്ടുകള് സൂചിപ്പിക്കുന്നത്. 'ഞാന് കാട്ടുപന്നികളെ കാട്ടിലേക്ക് ഓടിക്കുകയാണ്' എന്ന രസകരമായ അടിക്കുറിപ്പോടെയാണ് വീഡിയോ പങ്കുവെക്കപ്പെട്ടത്. പോളണ്ടിലെ ധനകാര്യ മന്ത്രിയെ സന്ദര്ശിച്ചും ടിവി പരിപാടികളില് പങ്കെടുത്തും എഡ്വേര്ഡ് വാര്ചോക്കി ഇതിനോടകം തന്നെ അവിടെ ഒരു സെലിബ്രിറ്റിയായി മാറിക്കഴിഞ്ഞു.
റോബോട്ടിന്റെ ഈ പ്രകടനം കണ്ട പലരും ഇത് ഭാവിയുടെ തുടക്കമാണെന്ന് അഭിപ്രായപ്പെട്ടു. സ്കൂളുകളിലും മറ്റും അക്രമികളെ തടയാന് ഇത്തരം റോബോട്ടുകളെ ഉപയോഗിക്കാമോ എന്ന ഗൗരവകരമായ ചര്ച്ചകള്ക്കും ഈ വീഡിയോ വഴിതുറന്നു. ചിലര് ഇതൊരു പബ്ലിസിറ്റി സ്റ്റണ്ട് മാത്രമാണെന്ന് പറയുമ്പോഴും, സാങ്കേതികവിദ്യയും വിനോദവും ചേര്ന്ന ഈ ദൃശ്യങ്ങള് വലിയ കൗതുകത്തോടെയാണ് എല്ലാവരും സ്വീകരിച്ചിരിക്കുന്നത്.
zaganiam dziki do lasu pic.twitter.com/Pjxkn0kfob
— Edward Warchocki (@edwardwarchocki) April 12, 2026
