അമ്പലപ്പുഴ: പരിശോധനയുടെ പേരില് ബൈക്കിന് പിന്നില് പോലീസ് ജീപ്പ് ഇടിപ്പിച്ചു. പരുക്കേറ്റ ബൈക്ക് യാത്രക്കാരെ ആശുപത്രിയിലെത്തിക്കാതെ പോലീസ് കടന്നു. ദേശീയപാതയില് തോട്ടപ്പള്ളി സ്പില്വേ പാലത്തിന് വടക്ക് ഭാഗത്ത് കഴിഞ്ഞ ദിവസം രാത്രിയിലായിരുന്നു സംഭവം.
വണ്ടാനം വൃക്ഷ വിലാസം ഷാജി- ജസീല ദമ്പതികളുടെ മകന് ആഷിക്ക് (18), സുഹൃത്ത് തൗഫീക്ക് എന്നിവര് ഹരിപ്പാട് നിന്ന് ഐസ്ക്രീം കച്ചവടത്തിന് ശേഷം വീട്ടിലേക്ക് മടങ്ങുന്നതിനിടെ തോട്ടപ്പള്ളി ഭാഗത്തു വെച്ച് പോലീസ് ജീപ്പ് ബൈക്കിന് പിന്നിലിടിക്കുകയായിരുന്നു.
മറ്റേതോ കേസിലെ പ്രതികളെ അന്വേഷിച്ചിറങ്ങിയ പോലീസ് തെറ്റിദ്ധാരണയുടെ പേരിലാണ് ഇവരെ പിടികൂടിയത്. തുടര്ന്ന് ബൈക്ക് യാത്രക്കാരെയും വാഹനവും പരിശോധിച്ച ശേഷം പോലീസ് കടന്നു കളഞ്ഞു. ജീപ്പിടിച്ച് പരുക്കേറ്റ നിലയിലായിട്ടും ഇരുവരെയും ആശുപത്രിയിലെത്തിക്കാന് പോലീസ് തയാറായില്ല.
ആഷിക്ക് വിളിച്ചറിയിച്ചനുസരിച്ച് ബന്ധുക്കളും സുഹൃത്തുക്കളുമെത്തി ഇവരെ ആലപ്പുഴ മെഡിക്കല് കോളജ് ആശുപത്രിയില് പ്രവേശിപ്പിക്കുകയായിരുന്നു. പോലീസിനെതിരേ മുഖ്യമന്ത്രിക്കും ഡി.ജി.പിക്കും പരാതി നല്കുമെന്നു ബന്ധുക്കള് അറിയിച്ചു.
