ന്യൂസിലന്ഡിലെ ഓക്ലന്ഡില് റോഡരികില് മാലിന്യം തള്ളിയ ഇന്ത്യന് യുവാവിന് നേരെ തദ്ദേശവാസിയുടെ അസഭ്യവര്ഷം. അല്ഫ്രിസ്റ്റണ് എന്ന സ്ഥലത്താണ് സംഭവം നടന്നത്. യുവാവും സുഹൃത്തും ചേര്ന്ന് വലിയ കാര്ഡ്ബോര്ഡ് കഷ്ണങ്ങള് റോഡരികിലെ കാടുപിടിച്ച ഭാഗത്ത് ഉപേക്ഷിക്കുന്നത് കണ്ട ഒരു ന്യൂസിലന്ഡ് പൗരന്, ഇത് വീഡിയോയില് പകര്ത്തുകയും ഇവരെ രൂക്ഷമായി പരിഹസിക്കുകയും ചെയ്യുകയായിരുന്നു. സംഭവത്തിന്റെ ദൃശ്യങ്ങള് സോഷ്യല് മീഡിയയില് വ്യാപകമായി പ്രചരിച്ചതോടെ വലിയ ചര്ച്ചകള്ക്കാണ് ഇത് വഴിവെച്ചിരിക്കുന്നത്.
അവധി ദിവസമായതിനാല് മാലിന്യങ്ങള് റീസൈക്കിള് ചെയ്യുന്ന സ്ഥാപനങ്ങള് അടഞ്ഞുകിടക്കുകയായിരുന്നുവെന്നും, അതിനാലാണ് അവ തിരികെ കൊണ്ടുപോകുന്ന വഴിയില് റോഡരികില് ഉപേക്ഷിച്ചതെന്നുമാണ് യുവാവിന്റെ വിശദീകരണം. എന്നാല് ഇത് ശ്രദ്ധയില്പ്പെട്ട ന്യൂസിലന്ഡ് പൗരന് തന്റെ വാഹനം നിര്ത്തി ഇവരെ അസഭ്യം പറയുകയായിരുന്നു. 'ഞങ്ങളുടെ രാജ്യത്തേക്ക് വന്ന് ഇവിടെ മാലിന്യം തള്ളരുത്, എന്നോട് മാപ്പ് പറയേണ്ടതില്ല, ഞങ്ങളുടെ രാജ്യത്തേക്ക് വരരുത്' എന്നിങ്ങനെ വംശീയമായ അധിക്ഷേപങ്ങള് ഉള്പ്പെടെ ഇയാള് വീഡിയോയില് പറയുന്നുണ്ട്. തുടര്ന്ന് യുവാക്കള് തള്ളിയ മാലിന്യം അവിടെനിന്നും തിരികെ എടുത്തു.
വീഡിയോ സോഷ്യല് മീഡിയയില് വൈറലായതോടെ തനിക്ക് സുരക്ഷാഭീഷണി ഉണ്ടെന്ന് കാട്ടി ഇന്ത്യന് യുവാവ് പോലീസില് പരാതി നല്കിയിട്ടുണ്ട്. വീഡിയോ ചിത്രീകരിച്ച വ്യക്തി തന്റെ കാറിന് കേടുപാടുകള് വരുത്തിയെന്നും റിയര്വ്യൂ മിറര് തകര്ത്തുവെന്നും പരാതിയില് പറയുന്നു. വംശീയമായ അധിക്ഷേപങ്ങള് തന്നെ മാനസികമായി തളര്ത്തിയെന്നും, വീഡിയോ ഓണ്ലൈനില് നിന്ന് നീക്കം ചെയ്യാന് ശ്രമിച്ചെങ്കിലും അധികൃതര് അതിന് തയ്യാറായില്ലെന്നും യുവാവ് വ്യക്തമാക്കി.
തന്റെ പ്രവര്ത്തിയില് പോലീസിനോടും നാട്ടുകാരോടും മാപ്പ് പറഞ്ഞ യുവാവ്, നിയമപരമായ പിഴ ഒടുക്കാന് തയ്യാറാണെന്നും അറിയിച്ചു. യുവാവിന്റെ പരാതി ലഭിച്ചതായി ന്യൂസിലന്ഡ് പോലീസ് സ്ഥിരീകരിച്ചിട്ടുണ്ട്. വിദേശ രാജ്യങ്ങളില് താമസിക്കുന്നവര് അവിടുത്തെ നിയമങ്ങള് പാലിക്കുന്നതില് പുലര്ത്തേണ്ട ജാഗ്രതയെക്കുറിച്ചും, അതേസമയം നിയമലംഘനങ്ങള്ക്കെതിരെ പ്രതികരിക്കുമ്പോള് പാലിക്കേണ്ട മര്യാദകളെക്കുറിച്ചും സോഷ്യല് മീഡിയയില് സമ്മിശ്ര പ്രതികരണങ്ങളാണ് വരുന്നത്.
