മിമിക്രി വേദികളിലൂടെ തുടക്കം കുറിച്ച്, പിന്നീട് മിനിസ്ക്രീനില് കോമഡി പരമ്പരകളില് അഭിനയിച്ച്, ശേഷം ബിഗ് സ്ക്രീനില് തന്റേതായ ഐഡന്റിറ്റി ഉണ്ടാക്കിയെടുത്ത താരമാണ് സുരാജ് വെഞ്ഞാറമൂട്. ബിഗ് സ്ക്രീനിലും കോമഡി വേഷങ്ങളിലൂടെയാണ് സുരാജ് പ്രേക്ഷകഹൃദയം കീഴടക്കിത്തുടങ്ങിയത്. എന്നാല് പിന്നീട് ക്യാരക്ടര് വില്ലന് വേഷങ്ങള് ചെയ്ത് താരം പ്രേക്ഷകരെ ഞെട്ടിപ്പിച്ചു. കരുത്തുറ്റ നായക വേഷങ്ങളടക്കം ചെയ്ത് ഒടുവില് മികച്ച നടനുള്ള ദേശീയ പുരസ്കാരം വരെ നേടിയെടുത്തിട്ടുണ്ട് സുരാജ്.
കോമഡിയില് നിന്നും ക്യാരക്ടര് റോളുകളിലേക്കും നായകനിലേക്കുമുള്ള സുരാജിന്റെ ചുവടുമാറ്റം മലയാള സിനിമയ്ക്ക് നല്കിയത് ഒട്ടനേകം മികച്ച കഥാപാത്രങ്ങളാണ്. മലയാളം കടന്ന് തമിഴിലും തിളങ്ങുകയാണ് സുരാജ്.
ഇപ്പോഴിതാ പുതിയ തമിഴ് ചിത്രം യൂത്തിന്റെ വിജയാഘോഷ വേദിയില് സുരാജ് പറഞ്ഞ കാര്യങ്ങളാണ് ആരാധകര് ഏറ്റെടുക്കുന്നത്. എങ്ങനെ ഇത്ര വ്യത്യസ്തമായ കഥാപാത്രങ്ങളെ മികവോടെ അവതരിപ്പിക്കാനാകുന്നുവെന്ന ചോദ്യത്തിനാണ് സുരാജ് മറുപടി നല്കിയത്.
‘നിങ്ങള് ഞങ്ങളെ രസിപ്പിക്കുകയാണ്. ചിരിപ്പിക്കുകയും കരയിപ്പിക്കുകയും ചെയ്യുന്നു. ഏത് കഥാപാത്രം നല്കിയാലും ആ കഥാപാത്രമായി മാറും. കോമഡിയിലൂടെ തുടങ്ങി ദേശീയ അവാര്ഡ് വരെ എത്തി. ഇത് എങ്ങനെയാണ് സാധ്യമാകുന്നത്?...’ എന്നായിരുന്നു സുരാജിനോടുള്ള ചോദ്യം.
‘‘എനിക്ക് മൂന്ന് കുട്ടികളാണുള്ളത്. മൂന്ന് പേരും സ്കൂളില് പഠിക്കുകയാണ്. മാസാമാസം അവര്ക്ക് സ്കൂള് ഫീസ് അടയ്ക്കേണ്ടതിനെക്കുറിച്ച് ആലോചിക്കുമ്പോള് ഇതല്ല, എല്ലാ ജോലിയും ചെയ്യും. എല്ലാ കഥാപാത്രങ്ങളും എനിക്ക് ടഫ് ആണ്. സംവിധായകന് പറഞ്ഞു തരുന്നത് അത് അതേ മീറ്ററില് തിരിച്ചു നല്കാന് ശ്രമിക്കും...’’ എന്നാണ് സുരാജ് വെഞ്ഞാറമൂട് പറഞ്ഞത്.
നവാഗതനായ കെന് കരുണാസ് തിരക്കഥയെഴുതി സംവിധാനം ചെയ്ത് നായകനായി അഭിനയിച്ച സിനിമയില് കെന്നിന്റെ അച്ഛന് വേഷം ചെയ്തത് സുരാജാണ്. കമിംഗ് ഓഫ് എയ്ജ് ജോണറില് ചെയ്ത ഈ ചിത്രം മികച്ച പ്രശംസകള് ഏറ്റുവാങ്ങുന്നുണ്ട്. സിനിമയിലെ സുരാജിന്റെ അച്ഛന് വേഷവും ഏറെ അഭിനയപ്രാധാന്യമുള്ളതായിരുന്നു. അതുകൊണ്ട് തന്നെ സുരാജിനും മികച്ച പ്രേക്ഷക-നിരൂപക പ്രശംസകള് നേടാനാവുന്നുണ്ട്.
അതേസമയം തമിഴില് തുടര്ച്ചയായി കയ്യടി നേടുകയാണ് സുരാജ് വെഞ്ഞാറമൂട്. യൂത്തിന്റെ വിജയത്തിന് പിന്നാലെ ധനുഷിനൊപ്പം അഭിനയിക്കുന്ന കര, ജയിലര് 2, ടെസ്ല തുടങ്ങിയ ചിത്രങ്ങളും അണിയറയിലുണ്ട്.
