കാലം പുരോഗതി പ്രാപിച്ചതോടെ മനുഷ്യര്ക്കിടയില് ജാതിചിന്തകള്ക്കും സ്ഥാനമില്ലാതായി എന്നാണ് ഭൂരിഭാഗം ആളുകളും കരുതുന്നത്. എന്നാല് ഇപ്പോഴും ചില ആളുകളില് ഇത്തരം ചിന്തകള് ശക്തമായി നിലനില്ക്കുന്നുവെന്ന് വ്യക്തമാക്കുകയാണ് 'ദ് ഡേറ്റ് ക്രൂ' എന്ന റിലേഷന്ഷിപ്പ് വെബ്സൈറ്റ് ഉടമയായ ഓയന്ദ്രില കപൂര്. മുപ്പത്തിരണ്ടു വയസ്സുള്ള, വിദ്യാസമ്പന്നയായ ഒരു യുവതി തന്റെ ജീവിതപങ്കാളിയെ തേടിയെത്തിയപ്പോള് മുന്നോട്ടുവെച്ച വിചിത്രമായ നിബന്ധനകളെക്കുറിച്ചാണ് ഓയന്ദ്രില വീഡിയോയില് വിവരിക്കുന്നത്. ബ്രാഹ്മണനോ ക്ഷത്രിയനോ ആയ പങ്കാളിയെ വേണമെന്നതായിരുന്നു യുവതിയുടെ ആവശ്യം.
മറ്റു ജാതികളില്പ്പെട്ട അനുയോജ്യരായ യുവാക്കളെ പരിഗണിച്ചുകൂടേ എന്ന ചോദ്യത്തിന് യുവതി നല്കിയ മറുപടിയാണ് ഏറെ ശ്രദ്ധേയമായത്. പങ്കാളിക്ക് എണ്പത് ലക്ഷം രൂപയെങ്കിലും വാര്ഷിക വരുമാനമുണ്ടെങ്കില് ജാതി പ്രശ്നമല്ലെന്നായിരുന്നു യുവതിയുടെ നിലപാട്. ആധുനിക ലോകത്ത് ജാതിവ്യവസ്ഥ എന്നത് വെറും വിശ്വാസമല്ലെന്നും, അത് സാമ്പത്തിക നിലവാരത്തെയും സമൂഹത്തിലെ പദവിയെയും ആശ്രയിച്ചുള്ള ഒന്നായി മാറിയിരിക്കുകയാണെന്നും ഓയന്ദ്രില നിരീക്ഷിക്കുന്നു.
യുവതിയുടെ ഈ നിലപാട് സോഷ്യല് മീഡിയയില് വലിയ ചര്ച്ചകള്ക്ക് തുടക്കമിട്ടു. 'ഞാനൊരു രജപുത്ര വംശജനാണ്. എന്റെ കസിന് വിവാഹം കഴിച്ചിരിക്കുന്നത് മറ്റൊരു ജാതിയില്പ്പെട്ട യുവതിയെയാണ്. ഞങ്ങളുടെ കുടുംബചരിത്രത്തിലെ ആദ്യത്തെ സംഭവമായിരുന്നു അത്. അവനെ ഓര്ത്ത് എനിക്ക് അഭിമാനം തോന്നുന്നു. സ്നേഹത്താല് അവന് ജാതിയുടെ മതില്ക്കെട്ടുകള് തകര്ത്തു.' ഒരു യുവാവ് കുറിച്ചു. ജീവിതരീതിയും പദവിയുമാണ് ഇന്ന് പലര്ക്കും ജാതിയേക്കാള് പ്രധാനമെന്ന് ഒരു വിഭാഗം വാദിക്കുമ്പോള്, ഉയര്ന്ന വരുമാനമുണ്ടെങ്കില് മാത്രം ജാതി വേണ്ടെന്നു വെക്കുന്നത് കാപട്യമാണെന്ന് മറ്റുള്ളവര് വിമര്ശിക്കുന്നു. വിവാഹബന്ധങ്ങളില് പുരുഷന്റെ സാമ്പത്തിക ഭദ്രതയും കുടുംബ പാരമ്പര്യവും നോക്കുന്നത് സ്വാഭാവികമാണെന്ന അഭിപ്രായങ്ങളും വീഡിയോയ്ക്ക് താഴെ ഉയരുന്നുണ്ട്.
പ്രണയത്തിലൂടെ ജാതിയുടെ മതിലുകള് തകര്ത്തവരുടെ അനുഭവങ്ങളും ഈ ചര്ച്ചകള്ക്കിടയില് പങ്കുവെക്കപ്പെടുന്നുണ്ട്. ജാതിരഹിതമെന്ന് അവകാശപ്പെടുന്ന പുതുതലമുറ പോലും വിവാഹക്കാര്യം വരുമ്പോള് ജാതിയിലും വരുമാനത്തിലും തൂങ്ങിക്കിടക്കുന്നത് സമൂഹത്തിന്റെ ഇരട്ടത്താപ്പാണെന്ന് പലരും കുറ്റപ്പെടുത്തുന്നു.
