മലയാളത്തിലെ ആദ്യത്തെ സൂപ്പര്ഹീറോ സിനിമയായിരുന്നു മിന്നല് മുരളി. ഗോദ എന്ന ചിത്രത്തിന് ശേഷം ടോവിനോയെ നായകനാക്കി ബേസിൽ ജോസഫ് സംവിധാനം ചെയ്ത ഈ സിനിമ ഒരു മിന്നല്പ്പിണര് പോലെ പ്രേക്ഷകര്ക്ക് മുന്നിലെത്തി ഇടിമുഴക്കം പോലെ ബ്ലോക്ക്ബസ്റ്ററായ സിനിമയാണ്. ആക്ഷനും ഇമോഷനും ചേർന്നുള്ള ഒരു കിടിലൻ ഐറ്റമായിരുന്നു മിന്നല് മുരളി.
മാർവെൽ സൂപ്പർ ഹീറോ സിനിമകളിലെപോലെ വില്ലന്റെ വ്യക്തിത്വത്തിനും പ്രധാന്യം നല്കുന്ന, നായകനൊപ്പം കട്ടക്ക് നില്ക്കുന്ന പ്രതിനായകനായിരുന്നു ഈ സിനിമയുടെ ഏറ്റവും ഹൈലൈറ്റ്. വില്ലന് ഒരേസമയം നിഷ്കളങ്കനും ക്രൂരനുമാകാന് കഴിയുമോ എന്നു തോന്നിപ്പിക്കുന്നതായിരുന്നു ഇതിലെ വില്ലന്. കഥാപുസ്തകങ്ങളില് മാത്രം കണ്ടിട്ടുള്ള സൂപ്പര്ഹീറോയെ ബിഗ്സ്ക്രീനില് കാണാന് കഴിഞ്ഞ സന്തോഷത്തില് കുട്ടികളും കുടുംബവുമൊക്കെ മിന്നല് മുരളിയെ ഹൃദയത്തിലേക്ക് ചേര്ത്തു നിര്ത്തി.
ഇപ്പോഴിതാ കുറുക്കൻമൂലയിലെ സൂപ്പർഹീറോയായി, മിന്നല് മുരളിയായി നിത്യഹരിത നായകൻ പ്രേം നസീർ എത്തിയാലെങ്ങനെയുണ്ടാകുമെന്ന് പങ്കിടുകയാണ് ഒരു എഐ വീഡിയോ. എഐ മാന്ത്രികതയിൽ പിറന്ന ‘മിന്നൽ മുരളി’യുടെ പുത്തന് പുതിയ വേര്ഷന് സോഷ്യല് മീഡിയയില് ട്രെന്ഡിംഗാകുകയാണ്. ടൊവിനോ തോമസിന് പകരം പ്രേം നസീർ ടൈറ്റിൽ റോളിൽ എത്തുന്നത് പ്രേം നസീറാണ്.
ചിത്രത്തിൽ ഏറെ കൈയ്യടി നേടിയ വില്ലന് കഥാപാത്രമായിരുന്നു ഗുരു സോമസുന്ദരത്തിന്റെ സൂപ്പർ പവറുകളുള്ള ഷിബു എന്ന കഥാപാത്രം. ഷിബുവായി എത്തുന്നത് കരുത്തുറ്റ വില്ലൻ കഥാപാത്രങ്ങളിലൂടെ മലയാളികളെ ഒരുപാട് രസിപ്പിച്ച ബാലൻ കെ. നായരാണ്. നസീറും ബാലൻ കെ. നായരും തമ്മിലുള്ള പോരാട്ടവും എഐയിലുണ്ട്. പ്രേക്ഷകര് ഏറെയിഷ്ടപ്പെടുന്ന ആ എവർഗ്രീൻ കാലഘട്ടത്തെ ഓർമ്മിപ്പിക്കുന്നതാണ് ഈ എഐ വീഡിയോ. നായികയായ ബ്രൂസ്ലി ബിജിയായി വീഡിയോയിൽ എത്തുന്നത് ജയഭാരതിയാണ്. ലേസി ഡിസൈനര് എന്ന ഇന്സ്റ്റഗ്രാം പേജിലൂടെ പങ്കിട്ട ഈ രസകരമായ വീഡിയോയ്ക്ക് ധാരാളം കമന്റുകളും ലൈക്കുകളും ലഭിക്കുന്നുണ്ട്.
മിന്നല് മുരളിക്ക് ഇന്ത്യയൊട്ടാകെ വൻ സ്വീകാര്യതയാണ് ലഭിച്ചിരുന്നത്. ഇതിനോടകം നിരവധി അംഗീകാരങ്ങൾ ചിത്രത്തെ തേടിയെത്തി. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം റിലീസ് ചെയ്തത്. ആദ്യ വാരം 11 രാജ്യങ്ങളിലെ ടോപ്പ് 10 ലിസ്റ്റിലും ചിത്രം ഇടംപിടിച്ചിരുന്നു. മിന്നൽ മുരളി 30 രാജ്യങ്ങളിലെ ടോപ് 10ൽ ഇടംപിടിച്ചിരുന്നു. ഏഷ്യയിൽ ഗൾഫ് രാജ്യങ്ങൾക്ക് പുറമെ ബംഗ്ലാദേശ്, മലേഷ്യ, മാലദ്വീപ്, പാകിസ്താൻ, സിംഗപൂർ, ശ്രീലങ്ക എന്നിവിടങ്ങളിലും മിന്നൽ മുരളി ട്രെൻഡിംഗായിരുന്നു.
