ഋഷികേശിലേക്കുള്ള വിനോദയാത്രയില് ഭീതിജനകമായ അവസ്ഥയിലൂടെ കടന്നുപോയ യുവതിയെ സംബന്ധിക്കുന്ന വാര്ത്തയാണ് ഇപ്പോള് സോഷ്യല് മീഡിയയില് ചര്ച്ചയാകുന്നത്. നോയിഡ ആസ്ഥാനമായി പ്രവര്ത്തിക്കുന്ന കോര്പ്പറേറ്റ് പ്രൊഫഷണലും ഉള്ളടക്ക നിര്മ്മാതാവുമായ 28കാരി അര്പിത സാഹുവിനാണ് ഋഷികേശിലേക്കുള്ള വിനോദയാത്ര മരണത്തിന് സമമായ അനുഭവം സമ്മാനിച്ചത്. പാറക്കെട്ടില് നിന്ന് നദിയിലേക്ക് ചാടുന്ന 'ക്ലിഫ് ജമ്പിംഗിനിടെ' അപ്രതീക്ഷിതമായുണ്ടായ ശക്തമായ ഒഴുക്കില്പ്പെട്ട് അര്പിത ഒഴുകിപ്പോവുകയായിരുന്നു. ആദ്യ രണ്ട് തവണ വിജയകരമായി ചാടിയെങ്കിലും മൂന്നാം ശ്രമത്തില് ശക്തമായ ഒഴുക്കിനെ പ്രതിരോധിക്കാന് നീന്തല് അറിയാവുന്ന അര്പിതയ്ക്ക് കഴിഞ്ഞില്ല.
നദിയില് ഒഴുക്കില്പ്പെട്ട അര്പിതയെ കൂടെയുണ്ടായിരുന്ന രാഹുല് എന്ന യുവാവും ഒരു വിദേശ സഞ്ചാരിയും ചേര്ന്നാണ് സാഹസികമായി രക്ഷപ്പെടുത്തിയത്. മരണത്തോളമെത്തിയ അപകടത്തില് നിന്നും തന്നെ കരയ്ക്കെത്തിച്ചവരോട് താന് കടപ്പെട്ടിരിക്കുന്നുവെന്ന് അര്പിത പറഞ്ഞു. ലൈഫ് ജാക്കറ്റ് ഇല്ലാതിരുന്നതാണ് അപകടത്തിന്റെ ആഘാതം വര്ദ്ധിപ്പിച്ചതെന്നും രക്ഷാപ്രവര്ത്തകരുടെ സമയോചിതമായ ഇടപെടലാണ് തന്റെ ജീവന് നിലനിര്ത്തിയതെന്നും അവര് കൂട്ടിച്ചേര്ത്തു.
പ്രകൃതിയുടെ ശക്തിയെ ഒരിക്കലും കുറച്ചുകാണരുതെന്നും സാഹസിക വിനോദങ്ങളില് ഏര്പ്പെടുമ്പോള് അതീവ ജാഗ്രത വേണമെന്നും അര്പിത ഓര്മ്മിപ്പിച്ചു. സാഹചര്യം എപ്പോള് വേണമെങ്കിലും മാറാന് സശാധ്യതയുള്ളതിനാല് കൃത്യമായ മേല്നോട്ടത്തിലും സുരക്ഷാ മാനദണ്ഡങ്ങള് പാലിച്ചും മാത്രമേ ഇത്തരം വിനോദങ്ങള് ചെയ്യാവൂ എന്ന് സ്വന്തം അനുഭവം മുന്നിര്ത്തി അവര് മുന്നറിയിപ്പ് നല്കുന്നു.
