കേരള നിയമസഭ തെരഞ്ഞെടുപ്പ് ഫലം വന്നതിനു പിന്നാലെ കുറിപ്പ് പങ്കുവെച്ച് ഗായകന് ജി വേണുഗോപാല്. വോട്ടിങ് ദിനത്തില് സമ്മിതിദായരുടെ മുഖത്ത് താന് കണ്ട നിശ്ചയദാര്ഢ്യമാണ് ഫലപ്രഖ്യാപനത്തില് പ്രതിഫലിച്ചതെന്ന് വേണുഗോപാല് കുറിച്ചു. തിരിച്ചു പിടിക്കാനാകാത്ത പരാജയങ്ങളും തകര്ക്കാനാകാത്ത അപാര വിജയങ്ങളുമില്ലെന്ന് വ്യക്തമാക്കിയ ഗായകന് രാഷ്ട്രീയത്തിലും പൊതു പ്രവര്ത്തനത്തിലും പുതുരക്തം ഉദയം ചെയ്യട്ടെയെന്നും അദ്ദേഹം കൂട്ടിച്ചേര്ത്തു.
ജി വേണു ഗോപാലിന്റെ ഫേസ്ബുക്ക് കുറിപ്പ്
വയസ്സ് 21 മുതൽ മുടങ്ങാതെ ഇലക്ഷനുകൾക്ക് വോട്ട് ചെയ്യാറുണ്ട്. ഒന്നൊഴിയാതെ ! ഇലക്ഷന് വരി നിന്ന് വോട്ട് ചെയ്യുമ്പോൾ കൂടെ നിൽക്കുന്നവരുടെയും, അന്നത്തെ ടി വി മാധ്യമങ്ങളിലൂടെ കാണുന്നവരുടെയും മുഖങ്ങൾ ഞാൻ ശ്രദ്ധിക്കാറുണ്ട്. മുഖം പലപ്പോഴും മനസ്സിൻ്റെ കണ്ണാടിയാണ്. വോട്ടിൻ്റെ ഗതിയുടേയും ആകാം അത്! ഒരു പാർട്ടി പ്രവർത്തകൻ്റെ മേലങ്കിയോ അന്ധമായ ആത്മവിശ്വാസമോ കൈമുതലില്ലാതെ നിഷ്പക്ഷനും തിരിച്ചറിവുമുളള ഒരു സാദാ വോട്ടറുടെ ബുദ്ധി, സാധാരണ മനുഷ്യ മനസ്സുകളുടെ ഗതിവിഗതികളുടെ ഒരു എകദേശ ധാരണ, ഇത് രണ്ടും ഉണ്ടെങ്കിൽ ഇതെങ്ങോട്ടേയ്ക്കാണ് പോകുന്നത് എന്ന് പിടി കിട്ടും.
വലിയ ക്രാന്തദർശിയൊന്നും ആകേണ്ട കാര്യമില്ല. വോട്ടിങ്ങ് ദിനത്തിൽ ഞാൻ ഇക്കാര്യം പോസ്റ്റ് ചെയ്തിരുന്നു. വോട്ടേർസിൻ്റെ മുഖത്ത് കണ്ട തീവ്രമായ നിശ്ചയദാർഢ്യത്തെക്കുറിച്ച്. ആഴക്കടലിൽ സ്ഥിരമായി മീൻ പിടിക്കുന്നവൻ, മീനിൻ്റെ സാന്നിദ്ധ്യവും വലിപ്പവും മനസ്സിൽ അളന്ന് കുറിച്ച് തിട്ടപ്പെടുത്തി ചൂണ്ടയും ഇരയും കൃത്യമായി നിക്ഷേപിക്കുന്ന ഒരു ലക്ഷണം! ഇലക്ഷൻ ദിനത്തിലെ വോട്ടർമാരുടെ മുഖത്തെ നിശ്ചയദാർഢ്യവും കൂടിയ പോളിംഗ് ശതമാനവും പത്തു വർഷം തുടർച്ചയായി ഭരിക്കുന്ന ഏതൊരു ഗവൺമെൻ്റിൻ്റേയും മുട്ട് ഇടിപ്പിക്കും, ചങ്കിടിപ്പ് കൂട്ടും! ആത്മവിശ്വാസത്തിന് മേലെ വേറെയെന്തെങ്കിലും കൈവശമുണ്ടെങ്കിലേ , ഈ ചിഹ്നങ്ങൾ ഭരണപക്ഷത്തിൻ്റെ വിജയമായി കണക്കാക്കാൻ സാധിക്കുകയുള്ളൂ.
ഇലക്ഷൻ ദിനത്തിൽ അങ്ങേയറ്റത്തെ അച്ചടക്കത്തോടെ വളരെ വൈകുവോളം വരി നിന്ന് വോട്ട് രേഖപ്പെടുത്തിയ ആ സാധാരണ സമ്മതിദായകൻ്റെ മുഖത്ത് കണ്ട കടുത്ത തീരുമാനമുണ്ടല്ലോ? അതാണ് ഇന്ന് ഈ ഫലപ്രഖ്യാപന ദിനത്തിലെ വിജയങ്ങളിലും തോൽവികളിലും മാത്രമല്ല, വിജയികളുടെ അഭൂതപൂർവ്വമായ ഭൂരിപക്ഷങ്ങളിലും തകർന്നടിഞ്ഞ പാർട്ടി കോട്ടകളിലും ദൃശ്യമാകുന്നത്.
തിരിച്ച് പിടിക്കാനാകാത്ത പരാജയങ്ങളൊന്നുമില്ല. തകർത്തു തരിപ്പണമാക്കാൻ സാധിക്കാത്ത അപാര വിജയങ്ങളുമില്ല. രാഷ്ട്രീയത്തിലും പൊതു പ്രവർത്തനത്തിലും പുതുരക്തം ഉദയം ചെയ്യട്ടെ. വിനയത്തോടെ, ഉൾക്കാഴ്ചയോടെ പരാജയം വിശകലനം ചെയ്യപ്പെടട്ടെ. എളിമയോടെ വിജയികൾ പ്രവർത്തിക്കട്ടെ. അവരുടെ പ്രവർത്തനങ്ങൾക്ക് വിലയിടാൻ ഇനി അഞ്ചു വർഷം മാത്രം. ഓരോ ചൂണ്ടുവിരലിലും പടരുന്ന മഷി എന്നും അവരെ കാത്തിരിക്കുന്നുണ്ട്! VG
അതേസമയം നിയമസഭ തെരഞ്ഞെടുപ്പില് 102 സീറ്റുമായി ഉജ്ജ്വല വിജയമാണ് യുഡിഎഫ് നേടിയത്. 35 സീറ്റുകളില് മാത്രമാണ് എല്ഡിഎഫിന് വിജയിക്കാനായത്. എന്ഡിഎ 3 സീറ്റുകളും നേടി.
