ചൈനയിലെ ഷിന്ജിയാങ്ങിലുള്ള ഒരു സ്കൂളില് കായികമേളയോടനുബന്ധിച്ച് നടന്ന റോബോട്ട് പ്രദര്ശനം അപ്രതീക്ഷിതമായി അപകടഭീഷണി ഉയര്ത്തി. കുട്ടികളെ രസിപ്പിക്കാനായി നൃത്തം ചെയ്തുകൊണ്ടിരുന്ന റോബോട്ട് പെട്ടെന്ന് നിയന്ത്രണം വിട്ട് വിദ്യാര്ത്ഥികള്ക്ക് നേരെ തിരിയുകയായിരുന്നു. റോബോട്ടുകളുടെ സുരക്ഷയെക്കുറിച്ചുള്ള ഗൗരവകരമായ ചര്ച്ചകള്ക്ക് ഈ സംഭവം വഴിതെളിച്ചു. നിലവില് ഇതിന്റെ ദൃശ്യങ്ങള് സോഷ്യല് മീഡിയയില് വ്യാപകമായി പ്രചരിക്കുന്നുണ്ട്.
സ്കൂള് ഗ്രൗണ്ടില് ആയോധനകലകളും നൃത്തച്ചുവടുകളും അവതരിപ്പിച്ചുകൊണ്ട് കാണികളുടെ ശ്രദ്ധ പിടിച്ചുപറ്റുകയായിരുന്നു ആ റോബോട്ട്. പ്രകടനം ആവേശമായതോടെ ഒരു കൂട്ടം വിദ്യാര്ത്ഥികള് റോബോട്ടിനൊപ്പം നൃത്തം ചെയ്യാനായി മൈതാനത്തേക്ക് ഇറങ്ങി. എന്നാല് കുട്ടികള് അടുത്തേക്ക് എത്തിയതോടെ റോബോട്ടിന്റെ താളം തെറ്റുകയും അത് നിലത്ത് വീഴുകയും ചെയ്തു. കുട്ടികളുടെ തിരക്ക് റോബോട്ടിന്റെ സെന്സറുകളെ ആശയക്കുഴപ്പത്തിലാക്കിയതാണ് ഇതിന് കാരണമായതെന്ന് കരുതപ്പെടുന്നു.
നിലത്തുവീണതിന് പിന്നാലെ റോബോട്ട് അക്രമാസക്തമായ രീതിയില് കുങ്ഫു കിക്കുകള് പ്രയോഗിക്കാന് തുടങ്ങിയത് കാണികളെ ഭീതിയിലാഴ്ത്തി. തനിക്ക് ചുറ്റുമുള്ള കുട്ടികളെ ലക്ഷ്യം വെച്ചായിരുന്നു റോബോട്ടിന്റെ ഈ അപ്രതീക്ഷിത നീക്കം. അപകടം മണത്ത വിദ്യാര്ത്ഥികള് ഉടന് തന്നെ പിന്നിലേക്ക് ഓടിമാറി. തുടര്ന്ന് റോബോട്ടിന്റെ നിയന്ത്രിക്കുന്നയാള് ഓടിയെത്തി അതിനെ കൈകളിലെടുത്തതോടെയാണ് രംഗം ശാന്തമായത്. ഭാഗ്യവശാല് സംഭവത്തില് ആര്ക്കും പരിക്കേറ്റിട്ടില്ല.
ചൈനയില് ഇത്തരം സംഭവങ്ങള് ആവര്ത്തിക്കുന്നത് ആശങ്ക വര്ദ്ധിപ്പിക്കുന്നുണ്ട്. ഏതാനും മാസങ്ങള്ക്ക് മുന്പ് ഒരു ചൈനീസ് ഫാക്ടറിയിലെ ഹ്യൂമനോയിഡ് റോബോട്ട് കോഡിംഗിലെ പിഴവ് കാരണം ജീവനക്കാര്ക്ക് നേരെ തിരിഞ്ഞത് വലിയ വാര്ത്തയായിരുന്നു. വിനോദത്തിനും വ്യവസായ ആവശ്യങ്ങള്ക്കുമായി റോബോട്ടുകളെ വ്യാപകമായി ഉപയോഗിക്കുമ്പോള് അവയുടെ സുരക്ഷാ ക്രമീകരണങ്ങളില് കൂടുതല് ജാഗ്രത വേണമെന്ന ആവശ്യമാണ് ഇതോടെ ഉയരുന്നത്.
Reported on Telegram 🤣
The robot went berserk and almost attacked the dancers at a festival in China: the Unitree android malfunctioned severely and started swinging its "iron" in the style of Bruce Lee
Fortunately, it was quickly shut down — a full-blown "fight" didn't… pic.twitter.com/FH38FFrjZV— Beefeater (@Beefeater_Fella) May 3, 2026
