ഇതിഹാസ ഗായിക ആശ ഭേസ്ലെയുടെ വിയോഗം ഇന്ത്യന് സിനിമ ലോകത്തിന് നികത്താനാവാത്ത നഷ്ടമാണ് സൃഷ്ടിച്ചത്. എന്നാല് ആ വേര്പാട് ഏറ്റവും കൂടുതല് തളര്ത്തുന്നത് അവരുടെ നിഴലായി കൂടെയുണ്ടായിരുന്ന കൊച്ചുമകള് സനായ ഭോസ്ലെയെയാണ്. ഇപ്പോഴിതാ മുത്തിശ്ശിയോടുളള തന്റെ ആഴത്തിലുളള സ്നേഹവും അവര് തനിക്ക് പകര്ന്ന് നല്കിയ ജീവിതപാഠങ്ങളും പങ്കുവെച്ചുകൊണ്ട് സനായ സോഷ്യല് മീഡിയയില് കുറിച്ച വാക്കുകളാണ് ആരാധകരുടെ കണ്ണുനിറയ്ക്കുന്നത്.
‘ജീവിതത്തില് ഒരാളുടെ ദു:ഖം മറ്റൊരാളുടെ സന്തോഷമായിരിക്കുമെന്ന് നിങ്ങള് എന്നെ പഠിപ്പിച്ചു. പക്ഷേ ഈ വേര്പാടിലും നിങ്ങള് എന്നോട് മുമ്പത്തേക്കാള് ഏറെ ചേര്ന്നുനില്ക്കുന്നതായി എനിക്ക് തോന്നുന്നു. ഞാന് എടുക്കുന്ന ഓരോ ശ്വാസത്തിലും, ചെയ്യുന്ന ഓരോ പ്രവൃത്തിയിലും നിങ്ങളെ ഞാന് അനുഭവിക്കുന്നു. വീശുന്ന കാറ്റില് നിങ്ങളെ എനിക്ക് അറിയാന് കഴിയുന്നുണ്ട്. എന്റെ ഹൃദയത്തില് എന്നന്നേക്കുമായി പതിഞ്ഞ നിങ്ങളുടെ ആ ചിരി ഇപ്പോഴും എനിക്ക് കേള്ക്കാം. ഇപ്പോള് എനിക്ക് വഴിതെറ്റിയതായി തോന്നുന്നില്ല, പകരം നിങ്ങള് എനിക്ക് നല്കിയ ജീവിതം കൊണ്ട് ഞാന് പൂര്ണ്ണത അനുഭവിക്കുന്നു. ജീവനുള്ളിടത്തോളം കാലം, നിങ്ങള് എന്റെ കൂടെയുണ്ടാകും ’എന്നായിരുന്നു സനായ കുറിച്ചത്. ആശാ ഭോസ്ലെയ്ക്കൊപ്പമുളള ചിത്രങ്ങളും കുറിപ്പിനൊപ്പം സനായ ഇന്സ്റ്റഗ്രാമില് പങ്കുവെച്ചിട്ടുണ്ട്.
ആശാ ഭോസ്ലേയുടെ മകന് ആനന്ദ് ഭോസ്ലേയുടെ മകളായ സനായ, വെറുമൊരു കൊച്ചുമകള് എന്നതിലുപരി ആശാ ഭോസ്ലെയുടെ ഏറ്റവും അടുത്ത സുഹൃത്തും സഹായിയുമായിരുന്നു. പൊതുവേദികളിലും വിദേശയാത്രകളിലും സംഗീത പരിപാടികളിലും ആശാ ഭോസ്ലേയുടെ കൈപിടിച്ച് സനായ എപ്പോഴും ഒപ്പമുണ്ടായിരുന്നു. ആശാ ഭോസ്ലേയുടെ വ്യക്തിപരമായ വിശേഷങ്ങളും ചിത്രങ്ങളും സോഷ്യല് മീഡിയയിലൂടെ ലോകത്തിന് പരിചയപ്പെടുത്തിയിരുന്നതും സനായയായിരുന്നു.
കഴിഞ്ഞ ഏപ്രില് 12 നായിരുന്നു 92 വയസ്സുകാരിയായ ആശാ ഭോസ്ലെ അന്തരിച്ചത്. ഹൃദയ , ശ്വാസകോശ അസുഖങ്ങളെ തുടര്ന്ന് മുംബൈ ബ്രീച്ച് കാന്ഡി ആശുപത്രിയില് ചികിത്സയിലിരിക്കെയായിരുന്നു പ്രിയ ഗായികയുടെ അന്ത്യം. സിനിമ- സാംസ്കാരിക- രാഷ്ട്രീയ രംഗത്തെ പ്രമുഖരും ആരാധകരുമടക്കും പതിനായിരക്കണക്കിന് ആളുകളാണ് ആശാ ഭോ്സെലയ്ക്ക് ആദരാഞ്ജലി അര്പ്പിക്കാനെത്തിയത്.
