കൊച്ചി: ആണ് സുഹൃത്തിനെ കത്തി കാട്ടി ഭീഷണിപ്പെടുത്തി യുവതിയെ പീഡിപ്പിക്കാന് ശ്രമിച്ച കേസില് ഒളിവിലായിരുന്ന മൂന്നാമനും പിടിയില്. അരൂര് സ്വദേശി സഞ്ജയ് ആണ് ഇന്നലെ പിടിയിലായത്.
കേസിലെ മറ്റു രണ്ടു പ്രതികളായ കൊല്ലം ചാത്തന്നൂര് സ്വദേശി രാഹുല് (39), തിരുവനന്തപുരം ഇടവ സ്വദേശി ഡാനിഷ് (29) എന്നിവര് പിടിയിലായിരുന്നു. സൗത്ത് റെയില്വേ സ്റ്റേഷന്റെ പിന്ഭാഗത്തുള്ള ഒഴിഞ്ഞു കിടക്കുന്ന മറ്റൊരു ഹോട്ടലില്നിന്നാണ് സഞ്ജയ് പോലീസിന്റെ പിടിയിലായത്. ഇയാളാണ് കേസിലെ മുഖ്യപ്രതി.
ചൊച്ചാഴ്ച രാത്രി 9ന് സൗത്ത് റെയില്വേ സ്റ്റേഷന് എതിര്വശത്തു കാടുപിടിച്ചു കിടക്കുന്ന ഹോട്ടല് സമുച്ചയത്തിലായിരുന്നു കുറ്റകൃത്യം. രാത്രിയില് മഴ നനയാതിരിക്കാന് യുവതിയും സുഹൃത്തും ഈ കെട്ടിടത്തിലേക്കു കയറിയെങ്കിലും മഴ കൂടിയതോടെ മുകള് നിലയിലേക്ക് കയറി. ഈ സമയത്ത് അവിടെയിരുന്ന് മദ്യപിക്കുകയായിരുന്ന പ്രതികള് അതിക്രമം കാണിക്കുകയായിരുന്നു. സുഹൃത്തിനെ മര്ദിച്ചു കത്തികാട്ടി ഭീഷണിപ്പെടുത്തിയായിരുന്നു പീഡന ശ്രമം. എന്നാല് യുവതി ഇത് ശക്തമായി ചെറുത്തു.
ഇതിനിടെ, പ്രതികളില് ഒരാളുടെ കയ്യില് കടിച്ച ശേഷം യുവതിയും സുഹൃത്തും ഫയര് എക്സിറ്റിലൂടെ ഇറങ്ങിയോടി രക്ഷപ്പെടുകയായിരുന്നു. തുടര്ന്ന് പോലീസ് കണ്ട്രോള് റൂമില് വിവരം അറിയിച്ചു. പോലീസ് സ്ഥലത്തേക്ക് എത്തുന്നതിനിടയില് പ്രതികള് കടന്നുകളഞ്ഞു. പ്രതികള് സഞ്ചരിച്ച ബൈക്ക് തിരിച്ചറിഞ്ഞതോടെ ഇവരെ പിടികൂടാന് പോലീസിനു കഴിഞ്ഞു. നഗരത്തിലെ ഒരു സ്വകാര്യ സ്ഥാപനത്തില് ജോലി ചെയ്യുകയാണ് യുവതി.
