കോട്ടയം: സി.പി.എമ്മിനെയും പിണറായി വിജയനെയും വിമര്ശിച്ചു കേരളാ കോണ്ഗ്രസ് (എം) സ്റ്റിയറിങ് കമ്മിറ്റിയോഗം. പിണറായിതന്നെ നയിച്ചാല് ബംഗാളിനു സമാനമായ അവസ്ഥയിലേക്കു കേരളവും പോകുമെന്ന് അംഗങ്ങള് ചൂണ്ടിക്കാട്ടി. തെരഞ്ഞെടുപ്പ് തോല്വി വിലയിരുത്താന് ചേര്ന്ന സ്റ്റിയറിങ് കമ്മിറ്റി യോഗത്തിലാണു വിമര്ശനമുയര്ന്നത്.
മുന്നണി മാറ്റത്തിനുള്ള അവസരം വന്നപ്പോള് അതു നടപ്പാക്കാനായില്ലെന്നു പല അംഗങ്ങളും ചൂണ്ടിക്കാട്ടി. 'മന്ത്രിയായിരുന്ന റോഷി അഗസ്റ്റിനും എം.എല്.എയായിരുന്ന പ്രമോദ് നാരായണനും തുടരും എന്നു സാമൂഹിക മാധ്യമങ്ങളില് പോസ്റ്റ് ഇട്ടതു രണ്ടു ചേരിയുണ്ടെന്ന പ്രതീതി സൃഷ്ടിച്ചു. കേരളാ കോണ്ഗ്രസിനെ സ്നേഹിക്കുന്ന പൊതുസമൂഹത്തില് മറിച്ചുള്ള ചിന്തകളുണ്ടാക്കി. സി.പി.എം. പ്രവര്ത്തകര് ക്രോസ് വോട്ട് ചെയ്തതും പരാജയത്തിനു കാരണമായി. സി.പി.എം. വോട്ടുകള് കൃത്യമായി എല്.ഡി.എഫിനെത്തിയില്ല. ന്യൂനപക്ഷ വോട്ടുകളും കിട്ടിയില്ല. എന്നാല്, ചില മേഖലകളില് ന്യൂനപക്ഷ വോട്ടുകള് ലഭിക്കുകയും ചെയ്തു. ഭരണവിരുദ്ധതയെ അതിജീവിക്കാന് സ്ഥാനാര്ഥികളുടെ ജനകീയതയ്ക്കു കഴിഞ്ഞില്ല. വികസനവും ക്ഷേമവും നടത്തി നന്നായി ഭരിക്കുക എന്നതുമാത്രമല്ല ചെയ്ത കാര്യങ്ങള് ബോധ്യപ്പെടുത്തേണ്ട ഉത്തരവാദിത്വംകൂടി നേതൃത്വത്തിനുണ്ടായിരുന്നു'-സിറ്റിയറിങ് കമ്മിറ്റിയംഗങ്ങള് ചൂണ്ടിക്കാട്ടി.
കേരളാ കോണ്ഗ്രസ് (എം) വോട്ടുകളില് ചോര്ച്ചയുണ്ടായിട്ടില്ലെന്നും സി.പി.എം. അണികള് ക്രോസ് വോട്ട് ചെയ്തതായി സ്റ്റിയറിങ് കമ്മിറ്റി യോഗത്തില് വിമര്ശനമുയര്ന്നുവെന്നും യോഗത്തിനുശേഷം ചെയര്മാന് ജോസ് കെ. മാണി മാധ്യമപ്രവര്ത്തകരോടു പറഞ്ഞു. സി.പി.എം. ഇക്കാര്യം പരിശോധിക്കണം. എല്.ഡി.എഫ്. യോഗത്തില് മുഖം നോക്കാതെ കാര്യങ്ങള് പറയും. കഴിഞ്ഞ യോഗത്തില് ചില കാര്യങ്ങള് പറഞ്ഞു.
എവിടെയാണു പ്രശ്നമുണ്ടായതെന്നു പരിശോധിക്കും. കേരളാ കോണ്ഗ്രസ് (എം) മത്സരിച്ച മേഖലകളിലെല്ലാം വിശകലനം നടത്തി. താഴേത്തട്ടില് പരിശോധിച്ചാല്മാത്രമേ യഥാര്ഥ കാരണം മനസിലാകൂ. ഇതിനായി ജില്ലാതല നേതൃയോഗം ചേരും. ഓരോ പ്രദേശത്തെയും റിപ്പോര്ട്ട് ഈ മാസം അവസാനത്തോടെ ലഭിക്കും. പരാജയം വിശദമായി പരിശോധിക്കും. ആര്.എസ്.എസും എല്.ഡി.എഫും തമ്മില് ധാരണയുണ്ടെന്ന ആരോപണം വലിയ തിരിച്ചടിയായി. ഇതു പ്രതിരോധിക്കാന് കഴിയാതെ പോയി. ഇതിലൂടെയാണു ന്യൂനപക്ഷ വോട്ടുകള് വ്യാപകമായി നഷ്ടപ്പെട്ടത്-ജോസ് കെ. മാണി പറഞ്ഞു. വൈസ് ചെയര്മാന്മാരായ തോമസ് ചാഴികാടന്, ഡോ.എന്. ജയരാജ്, സെക്രട്ടറി ജനറല് സ്റ്റീഫന് ജോര്ജ്, റോഷി അഗസ്റ്റിന്, ജോബ് മൈക്കിള്, സെബാസ്റ്റ്യന് കുളത്തുങ്കല്, പ്രമോദ് നരായണന് തുടങ്ങിയവരും വാര്ത്താസമ്മേളനത്തില് പങ്കെടുത്തു.
