പശ്ചിമേഷ്യയിലെ സംഘര്ഷത്തെത്തുടര്ന്ന് അന്താരാഷ്ട്ര വിപണിയിലുണ്ടായ വിലക്കയറ്റം പ്രതിരോധിക്കാന് പ്രധാനമന്ത്രി നരേന്ദ്ര മോദി മുന്നോട്ടുവെച്ച നിര്ദ്ദേശങ്ങളാണ് ഇപ്പോള് സോഷ്യല് മീഡിയയില് ചര്ച്ചയാകുന്നത്. സ്വര്ണ്ണ ഉപഭോഗം കുറയ്ക്കുക, പൊതുഗതാഗതം ഉപയോഗിക്കുക, ചരക്കുനീക്കത്തിന് റെയില്വേയെ ആശ്രയിക്കുക തുടങ്ങിയ നിര്ദ്ദേശങ്ങള്ക്കൊപ്പം അദ്ദേഹം പങ്കുവെച്ച 'വര്ക്ക് ഫ്രം ഹോം' എന്ന ആശയമാണ് ശ്രദ്ധാകേന്ദ്രം. ഇന്ധന ഉപഭോഗം കുറയ്ക്കാനും സാമ്പത്തിക ആഘാതം ലഘൂകരിക്കാനും വീട്ടിലിരുന്നുള്ള ജോലി സഹായിക്കുമെന്നാണ് പ്രധാനമന്ത്രി വ്യക്തമാക്കിയത്.
കോവിഡ് കാലത്തിന് ശേഷം വീണ്ടും സജീവമാകുന്ന വര്ക്ക് ഫ്രം ഹോം ആഹ്വാനത്തെ രാജ്യത്തെ പ്രൊഫഷണലുകള് വലിയ ആവേശത്തോടെയാണ് സ്വീകരിച്ചിരിക്കുന്നത്. സോഷ്യല് മീഡിയ പ്ലാറ്റ്ഫോമുകളില് പ്രധാനമന്ത്രിയുടെ നിര്ദ്ദേശത്തെ സ്വാഗതം ചെയ്തുകൊണ്ട് നിരവധി പേരാണ് പോസ്റ്റുകള് പങ്കുവെക്കുന്നത്. ഓഫീസുകളിലേക്കുള്ള യാത്രകള് ഒഴിവാകുന്നതോടെ ഇന്ധനച്ചെലവില് വലിയ ലാഭം ഉണ്ടാക്കാന് കഴിയുമെന്ന പ്രതീക്ഷയിലാണ് ജീവനക്കാര്.
ഓഫീസിലേക്കുള്ള ദൈനംദിന യാത്രകള് ഒഴിവാക്കിയാല് ശമ്പളത്തിന്റെ പകുതിയോളം ലാഭിക്കാന് കഴിയുമെന്ന് പല ഉദ്യോഗാര്ത്ഥികളും എക്സ് പോലുള്ള പ്ലാറ്റ്ഫോമുകളില് കുറിച്ചു. അനാവശ്യമായി ഇന്ധനം കത്തിച്ച് ട്രാഫിക് ബ്ലോക്കുകളില് സമയം കളയുന്നതിനേക്കാള് ഗുണകരമാണ് വീട്ടിലിരുന്ന് ജോലി ചെയ്യുന്നതെന്ന് ഭൂരിഭാഗം പേരും അഭിപ്രായപ്പെടുന്നു. ഐടി മേഖലയില് ഇത് പ്രായോഗികമാണെന്ന് മാത്രമല്ല, ജീവനക്കാരുടെ ഉല്പ്പാദനക്ഷമത വര്ധിപ്പിക്കുമെന്നും ഇവര് വാദിക്കുന്നു.
പ്രധാനമന്ത്രിയുടെ ഈ നിര്ദ്ദേശം നടപ്പിലാക്കാന് കമ്പനികള് തയ്യാറാകണമെന്ന ആവശ്യവും ഇപ്പോള് ശക്തമാണ്. ഐടി ഉള്പ്പെടെയുള്ള പല തൊഴില് മേഖലകളിലും വര്ക്ക് ഫ്രം ഹോം രീതി നടപ്പിലാക്കാന് സാങ്കേതികമായി തടസ്സങ്ങളില്ലെന്ന് പ്രൊഫഷണലുകള് ചൂണ്ടിക്കാട്ടുന്നു. നിലവിലെ ആഗോള സാമ്പത്തിക പ്രതിസന്ധികള്ക്കിടയില് വ്യക്തികള്ക്കും രാജ്യത്തിനും ഒരുപോലെ ഗുണകരമാകുന്ന ഇത്തരം തൊഴില് രീതികള് അനിവാര്യമാണെന്നാണ് ഉയരുന്ന അഭിപ്രായം.
