ഉയര്ന്ന പദവികളും ലക്ഷങ്ങളുടെ ശമ്പളവും ഉപേക്ഷിച്ച് മറ്റൊരു രാജ്യത്തേക്ക് കുടിയേറുന്നവര് നേരിടുന്ന യാഥാര്ത്ഥ്യങ്ങള് തുറന്നുപറയുകയാണ് മുംബൈ സ്വദേശിനി ശ്വേത ദേശായി. ലണ്ടനില് സീനിയര് തസ്തികയില് ജോലി ചെയ്തിരുന്ന ശ്വേത, ഓസ്ട്രേലിയയിലെ മെല്ബണില് എത്തിയപ്പോള് ജീവിതം കരുപിടിപ്പിക്കാനായി എയര്ബിഎന്ബി ക്ലീനറായി ജോലി ചെയ്ത അനുഭവമാണ് സോഷ്യല് മീഡിയയില് പങ്കുവെച്ചത്.
ലണ്ടനിലെ പ്രമുഖ വെബ്സൈറ്റില് ഹെഡ് ഓഫ് പ്രൊഡക്റ്റ് ആയി ജോലി ചെയ്തിരുന്ന ശ്വേതയ്ക്ക് പ്രതിവര്ഷം ഒരു കോടി രൂപയോളമായിരുന്നു ശമ്പളം. ആഡംബര ജീവിതം നയിച്ചിരുന്ന അവര്, ഭര്ത്താവിന് മെല്ബണില് ജോലി ലഭിച്ചതോടെയാണ് കുടുംബത്തോടൊപ്പം ഓസ്ട്രേലിയയിലേക്ക് മാറിയത്. എന്നാല് അവിടെ ലണ്ടനിലേതിന് സമാനമായ ജോലി കണ്ടെത്താന് സാധിക്കാത്തത് അവരെ കടുത്ത പ്രതിസന്ധിയിലാക്കി.
മാസങ്ങളോളം ജോലിയില്ലാതെ ഇരുന്നതോടെ കടുത്ത മാനസിക വിഷമത്തിലായ ശ്വേത, ഒടുവില് തന്റെ ആഡംബരങ്ങള് മാറ്റിവെച്ച് മുന്നിലെത്തിയ ആദ്യ ജോലി സ്വീകരിച്ചു. അപ്പാര്ട്ട്മെന്റുകള് വൃത്തിയാക്കുന്ന ജോലിയായിരുന്നു അത്. ഒരു ജോലിയും ചെറുതല്ലെന്നും തൊഴിലിന്റെ പേരിലല്ല ഒരാളുടെ മൂല്യം നിശ്ചയിക്കേണ്ടതെന്നും ഈ അനുഭവം തന്നെ പഠിപ്പിച്ചതായി അവര് വീഡിയോയില് പറയുന്നു.
നിലവില് കുട്ടികളെ ഇംഗ്ലീഷ് പഠിപ്പിക്കുകയും സ്വന്തമായി ബിസിനസ് കെട്ടിപ്പടുക്കാനുള്ള ശ്രമത്തിലുമാണ് ശ്വേത. സമാനമായ രീതിയില് ജീവിതത്തില് പ്രതിസന്ധികള് നേരിടുന്ന സ്ത്രീകള്ക്കായി 'ദ റീബില്ഡ് റൂം' എന്ന പേരില് ഒരു വാട്സ്ആപ്പ് കൂട്ടായ്മയും അവര് ആരംഭിച്ചു. പ്രതിസന്ധികളില് തളരാതെ പോരാടാന് ആഗ്രഹിക്കുന്നവര്ക്ക് വലിയ പ്രചോദനമാണ് ശ്വേതയുടെ ഈ ജീവിതകഥ.
