ബോളിവുഡ് താരം വിക്കി കൗശലിന്റെ 38 ാം ജന്മദിനത്തില് ആശംസകള് നേര്ന്ന് പിതാവും പ്രശസ്ത ആക്ഷന് ഡയറക്ടറുമായ ശ്യാം കൗശല് സോഷ്യല് മീഡിയയില് പങ്കുവെച്ച കുറിപ്പ് ശ്രദ്ധനേടുന്നു. മൂത്ത മകനായ വിക്കിയോടുളള സ്നേഹവും അഭിമാനവും നിറഞ്ഞ വാക്കുകളോടെയാണ് അദ്ദേഹം ഹൃദയസ്പര്ശിയായ ആശംസകള് നേര്ന്നത്.
വീട്ടിലെ സോഫയില് തികച്ചും കാഷ്വല് ലുക്കില് വിക്കി കൗശലിനൊപ്പം ഇരിക്കുന്ന മനോഹരമായ ഒരു ചിത്രവും ശ്യാം കൗശല് ഇന്സ്റ്റഗ്രാമില് പങ്കുവെച്ചിട്ടുണ്ട്. സോഷ്യല് മീഡിയയ്ക്ക് വേണ്ടി പോസ് ചെയ്ത ചിത്രമല്ല ഇതെന്നും അച്ഛനും മകനും തമ്മിലുളള സുന്ദരമായ ഒരു നിമിഷമാണിതെന്നും ആരാധകര് കുറിക്കുന്നു.
‘എന്റെ പുത്രന് ജന്മദിനാശംസകൾ. ദൈവത്തിന്റെ അനുഗ്രഹം എപ്പോഴും നിന്റെ കൂടെയുണ്ടാകട്ടെ. എപ്പോഴും സ്നേഹവും ആശംസകളും മാത്രം. നിന്നെപ്പോലൊരു മകനെ ലഭിച്ചതിൽ ഞാൻ ഭാഗ്യവാനും അനുഗ്രഹിക്കപ്പെട്ടവനുമാണ്. ദൈവാനുഗ്രഹം എപ്പോഴും ഉണ്ടാകട്ടെ... ജോർ ദി ജപ്പി (ഒരു ശക്തമായ കെട്ടിപ്പിടിത്തം),’ ശ്യാം കൗശൽ കുറിച്ചു.
വളരെ പെട്ടെന്നാണ് ആരാധകർ ഈ പോസ്റ്റ് ഏറ്റെടുത്തത്. മക്കളുടെ കരിയറിലെയും വ്യക്തിജീവിതത്തിലെയും ഓരോ വിജയങ്ങളും നേട്ടങ്ങളും സോഷ്യൽ മീഡിയയിലൂടെ ആഘോഷമാക്കുന്ന വ്യക്തിയാണ് ശ്യാം കൗശൽ. കഴിഞ്ഞ വർഷം വിക്കി കൗശലിനും കത്രീന കൈഫിനും ആൺകുഞ്ഞ് (വിഹാൻ കൗശൽ) ജനിച്ചപ്പോഴും താൻ മുത്തശ്ശൻ ആയതിന്റെ സന്തോഷം അദ്ദേഹം വികാരഭരിതമായി സോഷ്യൽ മീഡിയയിൽ പങ്കുവെച്ചിരുന്നു.
ബോളിവുഡിലെ ഏറ്റവും മികച്ച ആക്ഷൻ ഡയറക്ടർമാരിൽ ഒരാളാണ് ശ്യാം കൗശൽ. 'ക്രിഷ്', 'ബജ്രംഗി ഭായ്ജാൻ', 'ദംഗൽ', 'പത്മാവത്', 'ഗ്യാങ്സ് ഓഫ് വാസിപൂർ' തുടങ്ങി നിരവധി സൂപ്പർഹിറ്റ് ചിത്രങ്ങളുടെ ആക്ഷൻ രംഗങ്ങൾ ഒരുക്കിയത് അദ്ദേഹമാണ്. പിതാവ് സിനിമയുടെ അണിയറയിൽ തിളങ്ങിയപ്പോൾ മക്കളായ വിക്കി കൗശലും സണ്ണി കൗശലും അഭിനയരംഗത്തെത്തി തങ്ങളുടേതായ ഇടം കണ്ടെത്തുകയായിരുന്നു. നിലവിൽ ബോളിവുഡിലെ മുൻനിര നായകന്മാരിൽ ഒരാളായ വിക്കി കൗശലിന് വലിയ ആരാധക പിന്തുണയാണുള്ളത്
