ന്യൂകാമ്പ്: ലാ ലിഗയുടെ ചരിത്രതാളുകളിൽ സുവർണ്ണാക്ഷരങ്ങളാൽ പേരെഴുതിച്ചേർത്ത് സ്പാനിഷ് ചാമ്പ്യന്മാരായ ബാഴ്സലോണ. സൂപ്പർ താരം റാഫിഞ്ഞ ഇരട്ട ഗോളുകളോടെ പടനയിച്ച മത്സരത്തിൽ റയൽ ബെറ്റിസിനെ തറപ്പറ്റിച്ചാണ് കാറ്റലൻ പട ഈ അവിസ്മരണീയ നേട്ടം സ്വന്തമാക്കിയത്. ഇതോടെ 38 മത്സരങ്ങളുള്ള ഒരു ലാ ലിഗ സീസണിൽ, സ്വന്തം തട്ടകത്തിൽ കളിച്ച 19 പോരാട്ടങ്ങളിലും വിജയം വരിച്ച ചരിത്രത്തിലെ ആദ്യ ടീമെന്ന ഖ്യാതി ബാഴ്സലോണയ്ക്ക് സ്വന്തമായി.
ഹോം ഗ്രൗണ്ടിലെ അജയ്യരായ ബാഴ്സയുടെ കരുത്ത് കാട്ടുന്നതായിരുന്നു മത്സരത്തിലെ മുന്നേറ്റങ്ങൾ. മത്സരത്തിന്റെ തുടക്കത്തിൽ തന്നെ ബ്രസീലി യൻ വിംഗർ റാഫിഞ്ഞ ബാഴ്സയെ മുന്നിലെത്തിച്ചു. ലഭിച്ച ഫ്രീ കിക്ക് ബെറ്റിസ് ഗോൾകീപ്പർ അൽവാരോ വാലെസിന് ഒരവസരവും നൽകാതെ താരം വലയിലേക്ക് പായിക്കുകയായിരുന്നു. രണ്ടാം പകുതിയിൽ റാഫിഞ്ഞ ലീഡ് ഉയർത്തി. മുൻ ആഴ്സണൽ താരവും ബെറ്റിസ് നായകനുമായ ഹെക്ടർ ബെല്ലെറിൻ വരുത്തിയ ഗുരുതരമായ പാസിംഗ് പിഴവ് മുതലെടുത്താണ് താരം തന്റെ രണ്ടാം ഗോൾ അനായാസം സ്കോർ ചെയ്തത്.
ഇതിനിടയിൽ, അടുത്ത സീസണിലെ ചാമ്പ്യൻസ് ലീഗ് ഉറപ്പിച്ച ബെറ്റിസിന് ഒരു പെനാൽറ്റിയിലൂടെ തിരിച്ചടിക്കാൻ അവസരം ലഭിച്ചു. ഗാവി ബോക്സിൽ ഇസ്കോയെ വീഴ്ത്തിയതിന് ലഭിച്ച കിക്ക്, മുൻ റയൽ മാഡ്രിഡ് താരം കൂടിയായ ഇസ്കോ ലക്ഷ്യത്തിലെത്തിച്ചു. എന്നാൽ അധികം വൈകാതെ, 20 വാര അകലെ നിന്ന് ഡിഫൻഡർ ജോവോ കാൻസെലോ തൊടുത്ത വിസ്മയകരമായ കേർവിംഗ് ഷോട്ട് ബാഴ്സലോണയുടെ രണ്ട് ഗോളിന്റെ വ്യക്തമായ ലീഡ് വീണ്ടെടുത്തു നൽകി.
കഴിഞ്ഞ വാരത്തിൽ റയൽ മാഡ്രിഡിനെ വീഴ്ത്തി ലാ ലിഗ കിരീടം ചൂടിയ ഹാൻസി ഫ്ലിക്കിന്റെ ഈ സംഘം, ഹോം മത്സരങ്ങളെല്ലാം ജയിക്കുന്ന ചരിത്രത്തിലെ പതിനൊന്നാമത്തെ സ്പാനിഷ് ടീമാണ്. ഇതിനുമുമ്പ് 1985-86-ൽ റയൽ മാഡ്രിഡ് 17 ഹോം മത്സരങ്ങൾ ജയിച്ച ശേഷമുള്ള ആദ്യത്തെ സമ്പൂർണ്ണ വിജയ റെക്കോർഡാണിത്. ബാഴ്സയാകട്ടെ, ഇതിനുമുമ്പ് 1959-60 സീസണിലാണ് ഈ നേട്ടം സ്വന്തമാക്കിയത്.
ഈ സീസണിൽ മൂന്ന് വ്യത്യസ്ത സ്റ്റേഡിയങ്ങൾ (ഇസ്റ്റാഡി ജോഹാൻ ക്രൈഫ്, ബാഴ്സലോണ ഒളിമ്പിക് സ്റ്റേഡിയം, നവീകരിച്ച നൗ കാമ്പ്) മാറിമാറി ഉപയോഗിക്കേണ്ടി വന്നിട്ടും ബാഴ്സയുടെ ഹോം ഗ്രൗണ്ടിലെ കുതിപ്പിന് കോട്ടമൊന്നും തട്ടിയില്ല. ഈ സീസണിൽ എല്ലാ ടൂർണമെന്റുകളിലുമായി സ്വന്തം മണ്ണിൽ ബാഴ്സ തോറ്റത് ചാമ്പ്യൻസ് ലീഗിൽ പിഎസ്ജി (PSG), അത്ലറ്റിക്കോ മാഡ്രിഡ് എന്നിവർക്കെതിരെ മാത്രമാണ്.
മത്സരത്തിന്റെ അവസാന മിനിറ്റുകളിൽ സബ്സ്റ്റിറ്റ്യൂട്ട് ചെയ്യപ്പെട്ട് കളം വിട്ട സൂപ്പർ സ്ട്രൈക്കർ റോബർട്ട് ലെവൻഡോവ്സ്കിക്ക് സ്റ്റേഡിയം എഴുന്നേറ്റുനിന്ന് ആദരവ് നൽകി. 2022-ൽ ക്ലബ്ബിലെത്തിയതു മുതൽ ബാഴ്സയ്ക്കായി 191 മത്സരങ്ങളിൽ നിന്ന് 119 ഗോളുകൾ അടിച്ചുകൂട്ടിയ 37-കാരനായ പോളിഷ് താരം, ഈ വേനൽക്കാലത്തോടെ കരാർ പൂർത്തിയാക്കി ക്ലബ്ബ് വിടും. അടുത്ത ശനിയാഴ്ച വലൻസിയക്കെതിരെ അവരുടെ തട്ടകത്തിലാണ് ബാഴ്സലോണയുടെ ഈ സീസണിലെ അവസാന മത്സരം.
