പരമപൂജ്യനായ ദലൈലാമയുമായുളള കൂടിക്കാഴ്ചയ്ക്ക് പിന്നാലെ ഹൃദയസ്പര്ശിയായ കുറിപ്പും ചിത്രങ്ങളും പങ്കുവെച്ച് ബോളിവുഡ് നടി ഭൂമി പെഡ്നേക്കര്. ദലൈലാമയെ കണ്ട അനുഭവം തന്നില് വലിയ വൈകാരിക സ്വാധീനമാണ് ഉണ്ടാക്കിയതെന്നും വാക്കുകള്ക്ക് അതീതമായ അനുഭവമായിരുന്നു അതെന്നും നടി സോഷ്യല് മീഡിയയില് കുറിച്ചു.
ആശ്രമത്തിലെ ശാന്തമായ അന്തരീക്ഷത്തില് ദലൈലാമയെ വണങ്ങുന്നതും സംഭാഷണത്തിനിടയില് വികാരധീനയാകുന്നതുമായ ചിത്രങ്ങളാണ് ഭൂമി പങ്കുവെച്ചിട്ടുളളത്. ദലൈലാമയുടെ സാന്നിധ്യം തനിക്ക് നല്കിയ സമാധാനത്തെക്കുറിച്ചും താരം കുറിപ്പില് വ്യക്തമാക്കുന്നുണ്ട്.
‘പരമപൂജ്യനായ ദലൈലാമയുടെ സാന്നിധ്യത്തിൽ എല്ലാം വളരെ ലളിതവും ശാന്തവുമായി തോന്നി. അവിടെനിന്ന് ഇറങ്ങി നടന്നപ്പോഴാണ് എന്റെ കവിളിലൂടെ കണ്ണീർ ഒഴുകുന്നത് ഞാൻ അറിഞ്ഞത്. എനിക്ക് വാക്കുകളാൽ വിവരിക്കാൻ കഴിയാത്ത, എന്നാൽ ആഴത്തിൽ അനുഭവിക്കാൻ മാത്രം സാധിക്കുന്ന ഒന്നായിരുന്നു അത്. ഇത്തരം മാന്ത്രിക നിമിഷങ്ങൾ നമുക്ക് ലഭിച്ച ജീവിതത്തോടുള്ള കൃതജ്ഞതയാൽ എന്റെ ഹൃദയം നിറയ്ക്കുന്നു. ഇത്രയും സമാധാനവും കാരുണ്യവും നിറഞ്ഞ ഒരു നിമിഷം അനുഭവിക്കാൻ കഴിഞ്ഞതിൽ ഞാൻ അനുഗൃഹീതയാണ്. ജീവിതകാലം മുഴുവൻ ഞാൻ ഈ ഓർമ്മ കാത്തുസൂക്ഷിക്കും,’ ഭൂമി കുറിച്ചു.
താരത്തിന്റെ പോസ്റ്റ് ഇതിനോടകം തന്നെ സോഷ്യൽ മീഡിയയിൽ തരംഗമായി മാറിയിരിക്കുകയാണ്. അതേസമയം, അഭിനയരംഗത്തും സജീവ ചർച്ചകളിലാണ് ഭൂമി പെഡ്നേക്കർ. യാമി ഗൗതം പ്രധാന വേഷത്തിലെത്തിയ 'ആർട്ടിക്കിൾ 370' എന്ന ചിത്രത്തിന്റെ അണിയറപ്രവർത്തകർ ഒരുക്കുന്ന പുതിയ കോർട്ട്റൂം ഡ്രാമയിൽ ഭൂമി പ്രധാന വേഷത്തിലെത്തുമെന്നാണ് റിപ്പോർട്ടുകൾ.
