ബോളിവുഡിന്റെ എവർഗ്രീൻ താരം അനിൽ കപൂറും ഭാര്യ സുനിത കപൂറും തങ്ങളുടെ 42-ാം വിവാഹവാർഷികം ആഘോഷിക്കുകയാണ്. 53 വർഷത്തെ ഒരുമിച്ചുള്ള ജീവിതത്തിന്റെ ഓർമ്മകൾ പുതുക്കിക്കൊണ്ട് താരം സോഷ്യൽ മീഡിയയിൽ പങ്കുവെച്ച കുറിപ്പ് ഇപ്പോൾ ആരാധകരുടെ ഹൃദയം കവരുകയാണ്. കടന്നുപോകുന്ന ഓരോ വർഷവും മുൻപത്തേതിനേക്കാൾ കൂടുതൽ അർത്ഥപൂർണ്ണമായിട്ടാണ് തനിക്ക് തോന്നുന്നതെന്ന് അനിൽ കപൂർ കുറിച്ചു.
ഏറ്റവും ലളിതമായി നടന്ന തങ്ങളുടെ വിവാഹത്തെക്കുറിച്ച് താരം കുറിപ്പിൽ ഓർക്കുന്നുണ്ട്. വലിയ ആർഭാടങ്ങളോ ഹണിമൂണോ ഒന്നുമില്ലാതെ, മാതാപിതാക്കളുടെയും അടുത്ത സുഹൃത്തുക്കളുടെയും സാന്നിധ്യത്തിൽ വെറും മുപ്പത് മിനിറ്റ് കൊണ്ടാണ് തങ്ങൾ വിവാഹിതരായത്. എന്നാൽ ആ മുപ്പത് മിനിറ്റ് 53 വർഷത്തെ നീണ്ട ഒരുമിച്ചുള്ള ജീവിതത്തിലേക്ക് വഴിമാറുമെന്ന് താൻ ഒരിക്കലും കരുതിയിരുന്നില്ലെന്നും, തങ്ങളുടെ വിവാഹം സ്വർഗ്ഗത്തിൽ നിശ്ചയിക്കപ്പെട്ടതായിരുന്നു എന്നും താരം കൂട്ടിച്ചേർത്തു.
‘42 വർഷത്തെ ദാമ്പത്യം. 53 വർഷത്തെ ഒരുമിച്ചുള്ള ജീവിതം. എന്തുകൊണ്ടോ, കടന്നുപോകുന്ന ഓരോ വർഷവും മുൻപത്തേതിനേക്കാൾ കൂടുതൽ അർത്ഥപൂർണ്ണമായിട്ടാണ് തോന്നുന്നത്.
ഏറ്റവും ലളിതമായ ഒരു വിവാഹമായിരുന്നു നമ്മുടേത്. വലിയ ആർഭാടങ്ങളോ ഹണിമൂണോ ഒന്നുമില്ലാതെ വെറും മുപ്പത് മിനിറ്റ് കൊണ്ട് അത് കഴിഞ്ഞു. നമ്മുടെ മാതാപിതാക്കളും അടുത്ത കുറച്ചുപേരും പിന്നെ നമ്മൾ ഇരുവരും മാത്രം. ആ മുപ്പത് മിനിറ്റ് 53 വർഷങ്ങളിലേക്ക് നീളുമെന്ന് ഞാൻ ഒരിക്കലും കരുതിയിരുന്നില്ല. പറയാറുള്ളതുപോലെ, വിവാഹങ്ങൾ സ്വർഗ്ഗത്തിലാണ് നിശ്ചയിക്കപ്പെടുന്നത്. നമ്മുടേത് തീർച്ചയായും അങ്ങനെയായിരുന്നു.
ഞാൻ മുൻപും പറഞ്ഞിട്ടുണ്ട്, ഇപ്പോഴും അത് തന്നെ ആവർത്തിക്കുന്നു, ഈ പറയുന്ന എല്ലാത്തിനും കാരണം നീയാണ്. എനിക്ക് എന്റെ എല്ലാ സ്വപ്നങ്ങളുടെയും പുറകെ പോകാൻ കഴിഞ്ഞതും, എല്ലാ റിസ്കുകളും എടുക്കാൻ സാധിച്ചതും, ഓരോ ഷൂട്ടിംഗ് സെറ്റിലും എനിക്ക് പൂർണ്ണമനസ്സോടെ നിൽക്കാൻ കഴിഞ്ഞതുമെല്ലാം നീ കാരണമാണ്. കാരണം, സ്നേഹത്തോടെയും ആത്മവിശ്വാസത്തോടെയും നീ എല്ലാം കാത്തുസൂക്ഷിക്കുന്നുണ്ടെന്ന് എനിക്ക് ഉറപ്പായിരുന്നു.
ഈ 53 വർഷവും, ഓരോ ദിവസവും എന്നെത്തന്നെ നിന്റെ പങ്കാളിയായി തിരഞ്ഞെടുത്തതിന് നന്ദി. അതിലെ ഒരു നിമിഷം പോലും ഞാൻ നിസ്സാരമായി കാണുന്നില്ല. എന്റെ പ്രിയ സുഹൃത്തിന്, എന്റെ പങ്കാളിക്ക്, എന്റെ എല്ലാമെല്ലാമായവൾക്ക്... വിവാഹവാർഷിക ആശംസകൾ, എന്റെ സ്നേഹമേ. ഇനിയും നമ്മെ കാത്തിരിക്കുന്ന നമ്മുടെ അനന്തമായ നാളുകളിലേക്ക്... ’ സുനിതയ്ക്കൊപ്പമുളള ചിത്രങ്ങള് പങ്കുവെച്ചുകൊണ്ട് അനില് കപൂര് കുറിച്ചു.
താരങ്ങളും ആരാധകരുമടക്കം നിരവധി പേരാണ് ഈ ദമ്പതികൾക്ക് ആശംസകളുമായി രംഗത്തെത്തുന്നത്.1984-ലായിരുന്നു അനിൽ കപൂറും സുനിത കപൂറും വിവാഹിതരായത്. ബോളിവുഡ് നടി സോനം കപൂർ, നടൻ ഹർഷ് വർദ്ധൻ കപൂർ, നിർമ്മാതാവ് റിയ കപൂർ എന്നിവർ ഈ ദമ്പതികളുടെ മക്കളാണ്.
