ബീജിംഗ്: പ്രമുഖ സ്വതന്ത്ര ബ്ലോഗറായ ജെന്നിഫര് സെങ് വലിയൊരു ആരോപണവുമായി വീണ്ടും രംഗത്ത്. യുഎസ് പ്രസിഡന്റ് ഡൊണാള്ഡ് ട്രംപിന്റെ ബീജിംഗ് സന്ദര്ശനത്തിനിടെ, വിദേശ പ്രതിനിധികളെയും പ്രമുഖ സാങ്കേതികവിദ്യാ മേധാവികളെയും നിരീക്ഷിക്കാന് ചൈന വേഷംമാറിയ ചാരന്മാരെ നിയോഗിച്ചതായി ജെന്നിഫര് സെങ് ആരോപിക്കുന്നു.
ബീജിംഗില് നടന്ന ഔദ്യോഗിക വിരുന്നില് ശതകോടീശ്വരൻ എലോണ് മസ്കിന് തൊട്ടുപിന്നില് നിന്ന ഒരു വെയ്റ്റര്, യഥാര്ത്ഥത്തില് ചൈനീസ് സൈന്യത്തിലെ ഉന്നത പദവിയുള്ള ഒരു സജീവ ഉദ്യോഗസ്ഥയാണെന്നാണ് സോഷ്യൽ മീഡിയ പോസ്റ്റുകളിലൂടെ സെങ് വെളിപ്പെടുത്തിയത്.
ചൈനയ്ക്കെതിരെ സെങ് ഇത്തരമൊരു ചാരവൃത്തി ആരോപണം ഉന്നയിക്കുന്നത് ഇതാദ്യമല്ല. 2023-ൽ കാനഡയിൽ ഖാലിസ്ഥാൻ ഭീകരൻ ഹർദീപ് സിംഗ് നിജ്ജാർ കൊല്ലപ്പെട്ടതിന് പിന്നിൽ ചൈനീസ് കമ്മ്യൂണിസ്റ്റ് പാർട്ടിക്ക് പങ്കുണ്ടെന്ന് ഇവർ ആരോപിച്ചിരുന്നു. ഇന്ത്യയും പാശ്ചാത്യ രാജ്യങ്ങളും തമ്മിൽ ഭിന്നതയുണ്ടാക്കി ഇന്ത്യയെ കുടുക്കുക എന്നതായിരുന്നു ചൈനയുടെ ലക്ഷ്യമെന്നാണ് അന്ന് അവർ അവകാശപ്പെട്ടത്.
പ്രസിഡന്റ് ട്രംപിനെ ആദരിക്കുന്നതിനായി സംഘടിപ്പിച്ച വിരുന്നിൽ നിന്നുള്ള രണ്ട് വനിതാ വെയ്റ്റര്മാരുടെ ചിത്രം പങ്കുവെച്ചുകൊണ്ടാണ് സെങ് ഈ ആരോപണം ഉന്നയിച്ചത്. ഈ സ്ത്രീകളുടെ യൂണിഫോമിലുള്ള ചിത്രങ്ങൾ ചൈനീസ് സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ടെന്നും ഇവർ അവകാശപ്പെടുന്നു. എക്സിൽ ഇവർ പങ്കുവെച്ച കുറിപ്പിൽ പറയുന്നത് ഇങ്ങനെയാണ്: "വിസ്ഫോടനാത്മകം! അവൾ ആരാണെന്ന് ഞങ്ങൾ കണ്ടെത്തിയിരിക്കുന്നു - ട്രംപിനെ ആദരിക്കുന്ന വിരുന്നിൽ എലോൺ മസ്കിന് സമീപം നിന്നത് ചൈനീസ് കമ്മ്യൂണിസ്റ്റ് പാർട്ടി അംഗവും പീപ്പിൾസ് ലിബറേഷൻ ആർമിയുടെ ഓണർ ഗാർഡ് സെറിമോണിയൽ ബ്രിഗേഡിലെ ബറ്റാലിയൻ കമാൻഡറുമായ ചെങ് ചെങ് ആണ്.
മറ്റൊരു പോസ്റ്റിൽ, മസ്കിന്റെ പിന്നിൽ നിന്ന ഈ വെയ്റ്റര് മേജർ ചെങ് ചെങ് ആണെന്നും, ചൈനയുടെ സൈനിക ചടങ്ങുകളുടെ പ്രവർത്തന മാനുവലുകൾ തയ്യാറാക്കാൻ വരെ സഹായിച്ച പ്രമുഖ വ്യക്തിത്വമാണ് അവരെന്നും സെങ് ആരോപിച്ചു. ഇതിനുപുറമെ, "ചെങ് ചെങ്ങിന്റെ ചുവന്ന വസ്ത്രത്തിനടിയിൽ തോക്കോ മറ്റോ ഒളിപ്പിച്ചിട്ടുണ്ടാകാമെന്നാണ് ഞാൻ കരുതുന്നത്," എന്നും മറ്റൊരു പോസ്റ്റിൽ സെങ് കൂട്ടിച്ചേർത്തു.
എന്നാൽ, ചൈനീസ് സർക്കാർ ഈ വിഷയത്തിൽ ഇതുവരെ ഔദ്യോഗികമായി പ്രതികരിച്ചിട്ടില്ല. എങ്കിലും, പാശ്ചാത്യ ലക്ഷ്യങ്ങളെ നിരീക്ഷിക്കാൻ ചൈന ഇത്തരം മാർഗ്ഗങ്ങൾ ഉപയോഗിക്കാറുള്ളതായി സുരക്ഷാ വിദഗ്ധർ ചൂണ്ടിക്കാണിക്കുന്നു.
മുൻപ് കാലിഫോർണിയയിലെ യുഎസ് രാഷ്ട്രീയക്കാരെ ലക്ഷ്യമിട്ട് ചൈനീസ് ചാരവനിതയായ ഫാങ് ഫാങ് നടത്തിയ 'ഹണിട്രാപ്പ്' ഓപ്പറേഷൻ ഇതിനൊരു ഉദാഹരണമാണ്. സമാനമായി സാങ്കേതിക വ്യവസായ മേഖലകളിലും നയതന്ത്ര സർക്കിളുകളിലും ചൈനീസ് ചാരന്മാർ നുഴഞ്ഞുകയറുന്നതിനെക്കുറിച്ച് പാശ്ചാത്യ രഹസ്യാന്വേഷണ ഏജൻസികൾ മുൻപും മുന്നറിയിപ്പ് നൽകിയിട്ടുണ്ട്.
