വലിയ വന്യമൃഗങ്ങളുടെ വേട്ടയ്ക്കെതിരെ നിയമങ്ങള് കര്ശനമായതോടെ, കള്ളക്കടത്തുകാര് ഇപ്പോള് ലക്ഷ്യമിടുന്നത് അധികമാരും ശ്രദ്ധിക്കാത്ത 'കുഞ്ഞന് ഇരകളെയാണ്'. കെനിയയിലെ പുല്മേടുകളില് നിന്ന് ഏഷ്യയിലെയും യൂറോപ്പിലെയും ആഡംബര മുറികളിലെ ഗ്ലാസ് കൂടുകളിലേക്ക് നീളുന്ന ഈ ഉറുമ്പ് കടത്തിന് പിന്നില് കോടികളുടെ ലാഭമാണുള്ളത്. വെറുമൊരു കൗതുകത്തിനായി വളര്ത്തുന്ന ഈ പ്രാണികളുടെ കള്ളക്കടത്ത്, ഒരു രാജ്യത്തിന്റെ ആവാസവ്യവസ്ഥയെത്തന്നെ തകിടം മറിക്കാന് കെല്പുള്ള ഒരു വന് വിപണിയായി ഇന്ന് മാറിയിരിക്കുന്നു.
ഭീമന് ആഫ്രിക്കന് ഉറുമ്പുകളുടെ അഭാവം കെനിയയുടെ സ്വാഭാവിക പരിസ്ഥിതിയെയും സമ്പദ്വ്യവസ്ഥയെയും ഗുരുതരമായി ബാധിക്കുന്നുണ്ട്. പുല്മേടുകളിലെ വിത്തുകള് ശേഖരിക്കുകയും വിതറുകയും ചെയ്ത് അവിടുത്തെ ജൈവവൈവിധ്യം നിലനിര്ത്തുന്നത് ഈ ഉറുമ്പുകളാണ്. ഇവയുടെ എണ്ണം കുറയുമ്പോള് പുല്മേടുകള് നശിക്കുകയും, ഇത് കന്നുകാലികളുടെ തീറ്റയെ ബാധിച്ച് തദ്ദേശീയരുടെ പാലിന്റെയും വെണ്ണയുടെയും ഉത്പാദനം കുറയ്ക്കുകയും ചെയ്യുന്നു. കൂടാതെ, പുല്മേടുകളെ ആശ്രയിച്ച് കഴിയുന്ന വന്യജീവികളുടെ കുറവിനും, അതുവഴി ടൂറിസം വരുമാനത്തിലെ വലിയ ഇടിവിനും ഇത് കാരണമാകുന്നു.
ഈ ഉറുമ്പ് കടത്ത് അവയെ മോഷ്ടിക്കുന്ന കെനിയക്ക് മാത്രമല്ല, മറിച്ച് അവ എത്തിച്ചേരുന്ന രാജ്യങ്ങള്ക്കും വലിയൊരു ഭീഷണിയാണ്. ആഫ്രിക്കന് ഉറുമ്പുകള് ദക്ഷിണേഷ്യയിലോ വടക്കന് അമേരിക്കയിലോ ഉള്ള കൃഷിയിടങ്ങളില് എത്തിയാല്, അവ അവിടുത്തെ തദ്ദേശീയമല്ലാത്ത അധിനിവേശ ജീവികളായി മാറി കാര്ഷിക വിളകളെ വ്യാപകമായി നശിപ്പിക്കാന് സാധ്യതയുണ്ട്. ജീവജാലങ്ങളെ അവയുടെ സ്വാഭാവിക ആവാസവ്യവസ്ഥയില് നിന്ന് മാറ്റുന്നത് ഗുരുതരമായ പാരിസ്ഥിതിക-സാമ്പത്തിക ആഘാതങ്ങള് ഉണ്ടാക്കുമെന്നാണ് പഠനങ്ങള് മുന്നറിയിപ്പ് നല്കുന്നത്.
ഒരു ഉറുമ്പ് കോളനിയുടെ നിലനില്പ്പിന് ആധാരമായ 'റാണി ഉറുമ്പുകളെയാണ്' കടത്തുകാര് പ്രധാനമായും ലക്ഷ്യം വയ്ക്കുന്നത്. റാണി ഉറുമ്പുകള് ഇല്ലാതാകുന്നതോടെ പുതിയ കോളനികള് രൂപപ്പെടാതെ വരികയും, ഇത് ഉറുമ്പുകളെ ഭക്ഷണമാക്കുന്ന ഈനാംപേച്ചി, ആര്ഡ്വാര്ക്ക് തുടങ്ങിയ വംശനാശഭീഷണി നേരിടുന്ന ജീവികളുടെ നിലനില്പ്പിനെ അപകടത്തിലാക്കുകയും ചെയ്യുന്നു. മണ്ണിലെ ജൈവമാലിന്യങ്ങള് നീക്കം ചെയ്യാനും മണ്ണിനെ ഇളക്കി ഫലഭൂയിഷ്ഠമാക്കാനും സഹായിക്കുന്ന ഉറുമ്പുകളെ കൂട്ടത്തോടെ മാറ്റുന്നത് ഒടുവില് കാര്ഷിക മേഖലയെയും പരിസ്ഥിതി സന്തുലിതാവസ്ഥയെയും തകര്ക്കുകയാണ് ചെയ്യുന്നത്.
