കൊൽക്കത്ത: യുഎസ് സ്റ്റേറ്റ് സെക്രട്ടറി മാർക്കോ റൂബിയോ ശനിയാഴ്ച കൊൽക്കത്തയിലെ സെന്റ് തെരേസാസ് മിഷനറീസ് ഓഫ് ചാരിറ്റിയുടെ ആസ്ഥാനമായ മദർ ഹൗസ് സന്ദർശിച്ചു. ലോകമെമ്പാടുമുള്ള പാവപ്പെട്ടവരെയും രോഗികളെയും നിരാലംബരെയും സേവിക്കുന്നതിനായി സമർപ്പിക്കപ്പെട്ട ഇടമാണിത്. തന്റെ ആദ്യത്തെ ഇന്ത്യൻ സന്ദർശനത്തിന്റെ ഭാഗമായി ഇന്ന് രാവിലെ കൊൽക്കത്തയിൽ എത്തിയ റൂബിയോയെ യുഎസ് അംബാസഡർ സെർജിയോ ഗോർ വിമാനത്താവളത്തിൽ സ്വീകരിച്ചു.
റൂബിയോയുടെ ഈ സന്ദർശനത്തോടെ, ഒരു യുഎസ് സ്റ്റേറ്റ് സെക്രട്ടറി കൊൽക്കത്ത നഗരം സന്ദർശിച്ചിട്ട് 14 വർഷം കഴിഞ്ഞുള്ള ഇടവേളയ്ക്കാണ് അവസാനമായിരിക്കുന്നത്. പശ്ചിമ ബംഗാളിൽ ബി.ജെ.പി നേതൃത്വത്തിലുള്ള പുതിയ സർക്കാർ അധികാരമേറ്റ വലിയൊരു രാഷ്ട്രീയ മാറ്റത്തിന് ആഴ്ചകൾക്ക് ശേഷമാണ് ഈ സന്ദർശനം എന്നതും ശ്രദ്ധേയമാണ്.
"സെക്രട്ടറി മാർക്കോ റൂബിയോ കൊൽക്കത്തയിൽ ഇറങ്ങിയിട്ടുണ്ട്. അദ്ദേഹത്തിന്റെ ആദ്യത്തെ ഇന്ത്യൻ പര്യടനമാണിത്. ഇന്ന് വൈകീട്ട് ഞങ്ങൾ ന്യൂഡൽഹിയിൽ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. വ്യാപാരം, സാങ്കേതികവിദ്യ, പ്രതിരോധം, ക്വാഡ് കൂടാതെ വരും ദിവസങ്ങളിൽ ചർച്ച ചെയ്യാനും മുന്നോട്ട് കൊണ്ടുപോകാനുമുള്ള നിരവധി കാര്യങ്ങൾ അജണ്ടയിലുണ്ട്!", ഇന്ത്യയിലെ യുഎസ് അംബാസഡറായ ഗോർ എക്സിൽ കുറിച്ചതിങ്ങനെയായിരുന്നു.
2012 മെയ് മാസത്തിൽ ഹിലരി ക്ലിന്റൺ നഗരം സന്ദർശിച്ചതിന് ശേഷം കൊൽക്കത്ത സന്ദർശിക്കുന്ന ആദ്യ യുഎസ് സ്റ്റേറ്റ് സെക്രട്ടറിയാണ് മാർക്കോ റൂബിയോ. കൊൽക്കത്തയിലെ സന്ദർശനത്തിനിടെ റൂബിയോ നഗരത്തിലെ ചിൽഡ്രൻസ് ഹോമും സന്ദർശിക്കുമെന്ന് യുഎസ് സ്റ്റേറ്റ് ഡിപ്പാർട്ട്മെന്റ് അറിയിച്ചു.
മെയ് 23 മുതൽ 26 വരെ നീണ്ടുനിൽക്കുന്ന റൂബിയോയുടെ ഇന്ത്യൻ പര്യടനത്തിൽ കൊൽക്കത്തയ്ക്ക് പുറമെ ആഗ്ര, ജയ്പൂർ, ന്യൂഡൽഹി എന്നിവയും ഉൾപ്പെടുന്നു. ഇന്ത്യയുമായുള്ള ഊർജ്ജ ചർച്ചകളും ക്വാഡ് രാജ്യങ്ങളിലെ മന്ത്രിമാരുമായുള്ള കൂടിക്കാഴ്ചകളും നിശ്ചയിച്ചിട്ടുള്ളതിനാൽ ഈ സന്ദർശനം ഏറെ നയതന്ത്ര പ്രാധാന്യത്തോടെയാണ് വീക്ഷിക്കപ്പെടുന്നത്.
