പകല് സമയങ്ങളില് 48-കാരനായ റിയല് എസ്റ്റേറ്റ് വ്യവസായിയും സര്വ്വകലാശാലാ പ്രൊഫസറും തായ് പാര്ലമെന്റിലെ ഉന്നത ഉദ്യോഗസ്ഥനുമാണ് താനബോണ് സിരികുനാകോണ്കുന്. എന്നാല് ഇപ്പോള് ലോകം മുഴുവന് അദ്ദേഹത്തെ 'സൂപ്പര് തൂം' എന്ന പേരില് ഒരു യഥാര്ത്ഥ സൂപ്പര് ഹീറോയായിട്ടാണ് വാഴ്ത്തുന്നത്. ലോകത്തില് വെച്ച് ഏറ്റവും ഉയര്ന്ന പ്രദേശത്ത് വിജയകരമായി സ്കൈഡൈവിംഗ് ലാന്ഡിംഗ് നടത്തിയെന്ന റെക്കോര്ഡ് ഇപ്പോള് ഇദ്ദേഹം സ്വന്തമാക്കിയിരിക്കുകയാണ്. ചിലിയിലെ 'ഓജോസ് ഡെല് സലാഡോ' എന്ന അഗ്നിപര്വ്വത മേഖലയില്, സമുദ്രനിരപ്പില് നിന്ന് 17,854 അടി (5,442 മീറ്റര്) ഉയരത്തിലാണ് അതിശൈത്യത്തെയും ശക്തമായ കാറ്റിനെയും പ്രതിരോധിച്ച് സൂപ്പര് തൂം ലാന്ഡ് ചെയ്തത്. ഒരു സാധാരണ ടര്ബോപ്രോപ്പ് വിമാനം പറക്കുന്നതിനേക്കാള് ഉയര്ന്ന പ്രദേശത്താണിത്. 2023ല് സ്ഥാപിക്കപ്പെട്ട 17,444 അടി ഉയരത്തിന്റെ മുന് റെക്കോര്ഡാണ് ഇതോടെ തകര്ന്നത്.
പതിറ്റാണ്ടുകളുടെ പരിശീലനമുള്ള ഒരു സ്കൈഡൈവര് ആയിരിക്കും ഇദ്ദേഹമെന്ന് കരുതിയെങ്കില് തെറ്റി. ഇന്റര്നെറ്റില് ആളുകളെ ഏറ്റവും കൂടുതല് അത്ഭുതപ്പെടുത്തുന്നത് അദ്ദേഹത്തിന്റെ കുറഞ്ഞ കാലത്തെ കരിയറാണ്. 2024ല് മാത്രം ആദ്യമായി സ്കൈഡൈവിംഗ് ചെയ്യാന് തുടങ്ങിയ ഇദ്ദേഹം, ഇതിനകം 1,250 തവണ ചാടിക്കഴിഞ്ഞു; അതായത് ഈ കായികവിനോദത്തിലേക്ക് എത്തിയതിനു ശേഷം പ്രതിദിനം ശരാശരി രണ്ട് തവണ വീതം അദ്ദേഹം സ്കൈഡൈവിംഗ് നടത്തിയിട്ടുണ്ട്. തന്റെ ബിസിനസ്സ്, അക്കാദമിക്, രാഷ്ട്രീയ മേഖലകളിലെ കനത്ത ഉത്തരവാദിത്തങ്ങളെ പ്രതിനിധീകരിക്കുന്നതിനാണ് 'തൂം' എന്ന തന്റെ വിളിപ്പേരിനൊപ്പം അദ്ദേഹം 'സൂപ്പര്' എന്ന് കൂടി ചേര്ത്തത്. മനോഹരമായ ധാതുക്കള് നിറഞ്ഞ ഈ അഗ്നിപര്വ്വത പ്രദേശം മുകളില് നിന്ന് കാണുമ്പോള് ഒരു മഴവില്ല് പോലെയാണ് തോന്നിയതെന്ന് അദ്ദേഹം തന്റെ അനുഭവങ്ങള് പങ്കുവെച്ചുകൊണ്ട് പറഞ്ഞു.
ഹാലോ 2, അറ്റകാമ കോപ്റ്റര് തുടങ്ങിയ അന്താരാഷ്ട്ര സംഘങ്ങളുടെ പിന്തുണയോടെയാണ് ഈ ദൗത്യം വിജയകരമായി പൂര്ത്തിയാക്കിയത്. സ്വന്തം രാജ്യമായ തായ്ലന്ഡിന് വലിയ അഭിമാനം നേടിക്കൊടുക്കുക എന്നതായിരുന്നു തന്റെ ലക്ഷ്യമെന്ന് അദ്ദേഹം വ്യക്തമാക്കി. 'എല്ലാ മനുഷ്യരിലും സവിശേഷമായ കഴിവുകള് ഒളിഞ്ഞിരിപ്പുണ്ട്. ഓരോരുത്തര്ക്കും അവരവരുടേതായ രീതിയില് 'സൂപ്പര്' ആകാന് കഴിയും. നിങ്ങളുടെ സ്വപ്നങ്ങളെ തകര്ക്കാന് മറ്റാരെയും അനുവദിക്കരുത്. പൂര്ണ്ണമായ സമര്പ്പണവും അച്ചടക്കവുമുണ്ടെങ്കില് പ്രപഞ്ചം നിങ്ങള്ക്ക് അതിനുള്ള കരുത്ത് നല്കും,' എന്ന അദ്ദേഹത്തിന്റെ പ്രചോദനാത്മകമായ വാക്കുകള് ഇപ്പോള് സോഷ്യല് മീഡിയയില് വലിയ രീതിയില് വൈറലായിക്കൊണ്ടിരിക്കുകയാണ്.
