ഇന്ത്യയിലെയും യൂറോപ്പിലെയും ജോലി സംസ്കാരവും ജീവിതരീതിയും തമ്മിലുള്ള പ്രധാന വ്യത്യാസങ്ങള് പങ്കുവെച്ചുകൊണ്ടുള്ള ഒരു യുവതിയുടെ സോഷ്യല് മീഡിയ കുറിപ്പ് ഇപ്പോള് വലിയ രീതിയില് ചര്ച്ചയാവുകയാണ്. ഇന്ത്യയിലെ തിരക്കുപിടിച്ച കോര്പ്പറേറ്റ് ജീവിതത്തില് നിന്നും യൂറോപ്പിലേക്ക് മാറിയ ശേഷമുള്ള തന്റെ അനുഭവങ്ങളാണ് പ്രിയങ്ക എന്ന യുവതി ഇന്സ്റ്റാഗ്രാമിലൂടെ പങ്കുവെച്ചത്. ഇന്ത്യയിലെ ജോലിസ്ഥലങ്ങളിലെ അമിത സമ്മര്ദ്ദവും യൂറോപ്പിലെ സമാധാനപരമായ അന്തരീക്ഷവും തമ്മിലുള്ള വ്യക്തമായ വ്യത്യാസമാണ് ഈ കുറിപ്പില് പ്രതിഫലിക്കുന്നത്.
ഇന്ത്യയില് ജോലി ചെയ്യുമ്പോള് എപ്പോഴും എന്തെങ്കിലും ചെയ്തുകൊണ്ടിരിക്കണമെന്ന നിരന്തരമായ ഓട്ടത്തിലായിരുന്നു താനെന്ന് പ്രിയങ്ക പറയുന്നു. 'ഇന്ത്യയിലായിരുന്നപ്പോള് ജീവിതം വളരെ വേഗത്തിലാണ് പൊയ്ക്കൊണ്ടിരുന്നത്. എപ്പോഴും ഉല്പ്പാദനക്ഷമത കൂട്ടാനും അടുത്ത ലക്ഷ്യത്തിലേക്ക് ഓടിയെത്താനുമുള്ള കടുത്ത സമ്മര്ദ്ദമുണ്ടായിരുന്നു,' അവര് കുറിപ്പില് വ്യക്തമാക്കുന്നു. എന്നാല് യൂറോപ്പിലേക്ക് മാറിയതോടെ ജീവിതത്തിന്റെ വേഗത കുറഞ്ഞതായും, മാനസിക സമാധാനത്തിന് അവിടെ വലിയ പ്രാധാന്യമുണ്ടെന്നും അവര് കൂട്ടിച്ചേര്ക്കുന്നു.
യൂറോപ്യന് ജീവിതം തന്നെ സമയത്തെക്കുറിച്ച് മറ്റൊരു രീതിയില് ചിന്തിക്കാന് പഠിപ്പിച്ചുവെന്നാണ് പ്രിയങ്ക പറയുന്നത്. അവിടെ ആളുകള് പ്രകൃതിയോടൊപ്പം സമയം ചെലവഴിക്കാനും, വൈകുന്നേരങ്ങളില് സുഹൃത്തുക്കളുമായി കാപ്പി കുടിക്കാനും, പുസ്തകങ്ങള് വായിക്കാനും സമയം കണ്ടെത്തുന്നു. കരിയറിലെ വിജയങ്ങള്ക്കപ്പുറം സ്വന്തം സന്തോഷത്തിനും ആരോഗ്യത്തിനുമാണ് അവര് മുന്ഗണന നല്കുന്നത്. ഈയൊരു മാറ്റം തന്റെ ജീവിതത്തില് വലിയ സമാധാനമാണ് കൊണ്ടുവന്നതെന്ന് പ്രിയങ്ക സാക്ഷ്യപ്പെടുത്തുന്നു.
സോഷ്യല് മീഡിയയില് ഈ പോസ്റ്റ് വൈറലായതോടെ അനുകൂലിച്ചും പ്രതികൂലിച്ചും നിരവധി ആളുകളാണ് കമന്റുകളുമായി രംഗത്തെത്തിയത്. ഇന്ത്യയിലെ ഭൂരിഭാഗം ഐടി ജീവനക്കാരും കോര്പ്പറേറ്റ് തൊഴിലാളികളും പ്രിയങ്കയുടെ വാക്കുകളോട് പൂര്ണ്ണമായി യോജിക്കുന്നുണ്ട്. ഇന്ത്യയില് 'വര്ക്ക്ലൈഫ് ബാലന്സ്' അതായത് ജോലിയും ജീവിതവും തമ്മിലുള്ള സന്തുലിതാവസ്ഥ വളരെ മോശമാണെന്ന് പലരും കമന്റുകളില് കുറിച്ചു. അതേസമയം, യൂറോപ്പിലെ ജീവിതം മന്ദഗതിയിലാണെങ്കിലും കരിയറിലെ വേഗത്തിലുള്ള വളര്ച്ചയ്ക്ക് ഇന്ത്യ തന്നെയാണ് മികച്ചതെന്ന അഭിപ്രായവും ചിലര് പങ്കുവെക്കുന്നുണ്ട്.
