ആരോഗ്യ സംരക്ഷണത്തിനും അച്ചടക്കത്തിനും പ്രായം ഒരിക്കലും ഒരു തടസ്സമല്ലെന്ന സന്ദേശവുമായി സോഷ്യല് മീഡിയയില് പ്രചരിക്കുന്ന ഒരു ഫിറ്റ്നസ് വീഡിയോ നിരവധിപ്പേര്ക്ക് പ്രചോദനമാകുന്നു. പുലര്ച്ചെ നടത്തിയ 20 കിലോമീറ്റര് ഓട്ടം വിജയകരമായി പൂര്ത്തിയാക്കിയ ഡെറാഡൂണില് നിന്നുള്ള ഒരു ദമ്പതികളാണ് ഈ വീഡിയോയിലുള്ളത്. ഇവരുടെ ദൃഢനിശ്ചയത്തെയും കഠിനാധ്വാനത്തെയും പ്രശംസിച്ച് നിരവധി ആളുകളാണ് ഇപ്പോള് രംഗത്തെത്തിയിരിക്കുന്നത്.
'twofit.to.quit' എന്ന ഇന്സ്റ്റാഗ്രാം പേജിലൂടെയാണ് ഈ വീഡിയോ പങ്കുവെക്കപ്പെട്ടിരിക്കുന്നത്. 50-ാം വയസ്സില്, യാതൊരുവിധ ഒഴികഴിവുകളും പറയാതെ പുലര്ച്ചെ 5:30ന് ഡെറാഡൂണിലെ നിംബുവാലയില് നിന്ന് പുര്കുല് വരെ തങ്ങള് 20 കിലോമീറ്റര് ഓടിയതായി ദമ്പതികള് വീഡിയോയുടെ അടിക്കുറിപ്പില് വ്യക്തമാക്കുന്നു. പ്രായം വെറുമൊരു സംഖ്യ മാത്രമാണെന്നും ഫിറ്റ്നസ് എന്നത് നമ്മള് തിരഞ്ഞെടുക്കുന്ന ഒന്നാണെന്നും വ്യക്തമാക്കുന്ന ഇവര്, അതിരാവിലെയുള്ള തണുപ്പില് ഒരേ വേഗതയില് നഗരത്തിലൂടെ ഓടുന്ന ദൃശ്യങ്ങളാണ് വീഡിയോയിലുള്ളത്. ദീര്ഘദൂര ഓട്ടത്തിന്റെ ക്ഷീണം പ്രകടമായിരുന്നിട്ടും ഒരിടത്തും നിര്ത്താതെ ഇവര് ലക്ഷ്യസ്ഥാനത്തേക്ക് ഓടിയെത്തുകയായിരുന്നു.
നമ്മുടെ ഫിറ്റ്നസ് നിശ്ചയിക്കുന്നത് പ്രായമല്ല, മറിച്ച് നമ്മള് കാണിക്കുന്ന പ്രതിബദ്ധതയും ദിനചര്യയും മാനസികാവസ്ഥയുമാണെന്ന് ഈ വീഡിയോ ഓര്മ്മിപ്പിക്കുന്നു. ദമ്പതികളുടെ ഈ വലിയ ശ്രമം സോഷ്യല് മീഡിയയില് വലിയ രീതിയിലാണ് ശ്രദ്ധിക്കപ്പെട്ടത്. 'നിങ്ങള് രണ്ടുപേരും മികച്ചൊരു ജോലിയാണ് ചെയ്യുന്നത്' എന്നും, 'ആരോഗ്യമാണ് യഥാര്ത്ഥ സമ്പത്ത്' എന്നും തുടങ്ങി ഇരുവരുടെയും ഫിറ്റ്നസിനോടുള്ള താല്പര്യത്തെ അഭിനന്ദിച്ചുകൊണ്ട് നിരവധി പോസിറ്റീവ് കമന്റുകളാണ് വീഡിയോയ്ക്ക് താഴെ വന്നുകൊണ്ടിരിക്കുന്നത്.
